ބާރަށު ސްކޫލް ޕްރިންސިޕަލްގެ ސައިކަލުގައި ރޯކޮށްލައިފި

ހއ. ބާރަށު ސްކޫލުގެ ޕްރިންސިޕަލް އަމްޖަދު ހުސެއިންގެ ސައިކަލުގައި ރޯކޮށްލި މައްސަލަ ފުލުހުން ތަހުގީގުކުރަން ފަށައިފި އެވެ.

އަމްޖަދު ދިރިއުޅުއްވާ ގޭގެ ގޯތިތެރެއަށް ބަޔަކު ވަދެ އެ ގޯތި ތެރޭގައި ހުރި އޭނާގެ ސައިކަލުގައި ރޯކޮށްލީ ރޭ ދަންވަރުގެ ވަގުތެއްގަ އެވެ. ސައިކަލު ބޭނުން ނުކުރެވޭ ވަރަށް ހަލާކުވި އިރު އަލިފާނުގެ ސަބަބުން ގެއަށް ވެސް ކޮންމެވެސް ވަރަކަށް ގެއްލުންވި އެވެ.

ފުލުހުން ބުނީ ބާރަށުގައި ސައިކަލެއްގައި ރޯކޮށްލި މައްސަލަ ތަހުގީގު ކުރަމުން އަންނަ ކަމަށެވެ.

ބާރަށު ކައުންސިލުގެ ރައީސް ސޮފްއަތު މުހައްމަދު "މިހާރު" އަށް ވިދާޅުވީ، ނ. ވެލިދުއަށް ނިސްބަތްވާ އަމްޖަދު ބާރަށު ސްކޫލުގެ ވަޒީފާ އަދާކުރައްވަން އެ ރަށަށް އާއިލާއާ އެކު ދިރިއުޅުން ބަދަލުކޮށްގެން އުޅޭތާ މިހާރު އަހަރެއް ވެދާނެ ކަމަށެވެ.

ޕްރިންސިޕަލް ދިރިއުޅުއްވާ ގޭގައި ހުންނަނީ ވަށައި ފާރު ރާނާފައި ކަމަށް ވެސް ސޮފްއަތު ވިދާޅުވި އެވެ. އެ ގޭ ތެރެއަށް އެކަން ކުރި ބަޔަކު ވަން ގޮތެއް ސީދާ ނޭނގުނަސް ނުކުމެގެން ދިޔައީ ގޭގެ ދޮރު އެތެރެއިން ހުޅުވައިގެން ކަމަށް އޭނާ ވިދާޅުވި އެވެ.

ސޮފްއަތު ވިދާޅުވީ މި ހާދިސާއާ ގުޅިގެން އަމްޖަދު އެހެން ރަށަކަށް ބަދަލުވާން ނިންމަވާފައިވާ ކަމަށެވެ.

އަމްޖަދު ދިރިއުޅުއްވި ގެއަކީ ކުޑަކުދިން ވެސް ދިރިއުޅޭ ގެއަކަށްވާއިރު އެ ކުދިންނަށް ވެސް މިކަމުން އަސަރު ކުރާނެތީ ސޮފްއަތު ކަންބޮޑުވުން ފާޅުކުރެއްވި އެވެ.

"މިހާރު" އިން އަމްޖަދު އަށް ގުޅުމުން ފޯނެއް ނުނަންގަވަ އެވެ. އެހެންވެ އޭނާގެ ބަހެއް ނުލިބުނެވެ.