ތިނަދޫގެ ފްލެޓްތަކުގެ މަސައްކަތް ނިންމާލައިފި

ގދ. ތިނަދޫގައި އިމާރާތް ކުރި 120 ފްލެޓްގެ މަސައްކަތް ނިންމާލައިފި އެވެ.

ތިން ކޮޓަރީގެ އެ ފްލެޓްތަކަށް ކުރިމަތިލުމުގެ ފުރުސަތު، މިދިޔަ ޖޫން މަހު ހަމަވި އިރު 850 މީހުން ވަނީ ފްލެޓަށް ކުރިމަތިލައިފަ އެވެ.

ތިނަދޫ ކައުންސިލް މެމްބަރު ސައުދު އަލީ ވިދާޅުވީ ފްލެޓްތަކުގެ މަސައްކަތް އެއްކޮށްހެން ނިމިފައިވާއިރު މިހާރު ކުރިއަށް ދަނީ ބިންގަނޑު ލެވެލްކޮށް، އެ ސަރަހައްދު ރީތިކުރުމުގެ މަސައްކަތް ކަމަށެވެ. އަދި އެ މަސައްކަތް ނިމުނުހާ އަވަހަކަށް، ފްލެޓްތައް މީހުންނާ ހަވާލު ކުރުމުގެ މަސައްކަތް މިނިސްޓްރީން ކުރާނެ ކަމަށް ވިދާޅުވި އެވެ.

ހައުސިން މިނިސްޓްރީން މިހާރު ވެސް އަންނަނީ ފްލެޓަށް ކުރިމަތިލާފައިވާ މީހުންގެ ފޯމުތައް އިވެލުއޭޓް ކުރަމުންނެވެ.

ތިނަދޫގައި އަޅާ ފްލެޓްތަކުގެ ތެރެއިން 25 ފްލެޓް ދިނުމަށް ހަމަޖެހިފައިވަނީ ރަށުން ބޭރު މީހުންނަށެވެ.

ސައުދު ވިދާޅުވީ އެ ފްލެޓަށް 250 މީހުން ކުރިމަތިލާފައިވާ ކަމަށެވެ. އަދި ރަށުގެ މީހުންނަށް ދޫކުރާ 80 ފްލެޓަށް 650 މީހުން ކުރިމަތިލާފައިވާ ކަމަށް ވެސް އޭނާ ވިދާޅުވި އެވެ. ބާކީ 15 ފްލެޓް ވިއްކާލުމަށް ވަނީ ހަމަޖެހިފަ އެވެ.

މި ފްލެޓަށް ފައިސާ ދައްކަން ޖެހެނީ 20 އަހަރަށް ބަހާލައިގެން މަހަކު 3،000 ރުފިޔާގެ މަގުންނެވެ. ޑައުންޕޭމަންޓު ގޮތުގައި ދައްކަން ޖެހެނީ 25،000 ރުފިޔާ އެވެ.