ދިވެހި ފުލުހުންގެ އިސްވެރިން އެފްބީއައިއާއެކު މައުލޫމާތު ހޯދުމުގެ ބައްދަލުވުންތަކެއް ބާއްވައިފި

އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) ގެ މުހިންމު ޑިޕާޓްމަންޓްތަކާއެކު، މައުލޫމާތު ހޯދުމުގެ ބައްދަލުވުންތަކެއް ދިވެހި ފުލުހުން ބާއްވައިފި އެވެ.

ފުލުހުންގެ އެންމެ އިސްވެރިންގެ ޓީމަކާއެކު އެމެރިކާގައި މިހާރު ހުންނެވި ޕޮލިސް ކޮމިޝަނަރު މުހައްމަދު ހަމީދު މިއަދު ކުރެއްވި ޓުވީޓެއްގައި ވިދާޅުވީ، އެއް ހަފުތާގެ އެ ދަތުރުގައި އެފްބީއައިގެ އިތުރުން އެމެރިކާގެ ދަ ޖަސްޓިސް ޑިޕާޓްމަންޓާއި ނިއު ޔޯކްގެ ޕޮލިސް ޑިޕާޓްމަންޓް (އެންވައިޕީޑީ) ގެ އޮފިޝަލުންނާ ވެސް ބައްދަލުކުރެއްވި ކަމަށެވެ.

ރާއްޖެ އާއި އެމެރިކާ ގުޅިގެން ކައުންޓާ ޓެރަރިޒަމްގެ މައްސަލަތަކުގައި މަސައްކަތް ކުރުމާއި މައުލޫމާތު ބަދަލުކުރުމާއި ޓެރަަރިސްޓް ސްކްރީނިން ހެދުމާއި ކުށްތައް ކޮންޓްރޯލް ކުރުމުގެ ގާބިލްކަން އިތުރުކުރުމާއި ތަހުގީގުކުރުން ވަރުގަދަކުރުމަށް ކުރެވިދާނެ ކަންކަމާ ގުޅޭ ގޮތުން އެ ބައްދަލުވުންތަކުގައި މައުލޫމާތު ހޯދި ކަމަށް ސީޕީ ވިދާޅުވި އެވެ.

އެމެރިކާގެ ޖަސްޓިސް ޑިޕާޓްމަންޓުން ހަރަދުކުރި އެ ދަތުރުގައި ސީޕީ ހަމީދުގެ އިތުރުން ޑެޕިއުޓީ ކޮމިޝަނަރު އަބްދުލް މަންނާނު ޔޫސުފާއި އެސިސްޓެންޓް ޕޮލިސް ކޮމިޝަނަރު މުހައްމަދު ރިޔާޒު އަދި ތަހުގީގުކުރާ ބައެއް އިސްވެރިން ބައިވެރިވެވަޑައިގެންނެވިއިރު އެއީ "ސްޓަޑީ ޓުއާ" އެކެވެ.

އެ ދަތުރުގައި ފުލުހުންގެ އިސްވެރިން ވަނީ ނިއު ޔޯކުގައި ހުންނަވާ އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދާ ވެސް އިއްޔެ ބައްދަލުކޮށްފަ އެވެ.