ނަގުދު ފައިސާ ލިބޭ ބީއެމްއެލް އިސްލާމިކް ޕާސަނަލް ފައިނޭންސަށް އޮންލައިންކޮށް އެދެވޭގޮތް ހަދައިފި

ބީއެމްއެލްގެ އިންޓަނެޓް ބޭންކިން އާއި މޮބައިލް އެޕްލިކޭޝަން މެދުވެރިކޮށް އެ ބޭންކުގެ އިސްލާމިކް ޕާސަނަލް ފައިނޭންސަށް އެދެވޭ ގޮތް ހަދައިފި އެވެ.

އިސްލާމިކް ޕާސަނަލް ފައިނޭންސަކީ މުސާރަ ލިބޭ މީހުންނަށާއި ރިޓަޔަމަންޓް ޕެންޝަން ލިބޭ މީހުންނަށް ހާއްސަކޮށްގެން 300،000ރ. އާ ހަމައަށް ދޫކުރާ ފައިނޭންސެކެވެ. އެ ހިދުމަތުގެ ދަށުން މުދާ ގަތުމުގެ އިތުރުން ނަގުދު ފައިސާގެ ގޮތުގައި ވެސް ފައިނޭންސް ލިބޭނެ އެވެ.

ބީއެމްއެލް އިސްލާމިކް ޕާސަނަލް ފައިނޭންސިން މެދުވެރިކޮށް ނަގުދު ފައިސާ ނެގޭ ހިދުމަތް ފޯރުކޮށްދެނީ އިސްލާމިކް ބޭންކިންގެ އުސޫލެއް ކަމުގައިވާ "ތަވައްރުގް" އުސޫލުންނެވެ.

މަހުން މަހަށް މުސާރަ ނުލިބޭ މީހުންނަށް ބީއެމްއެލް އިސްލާމިކް އިން ވަނީ ޕާސަނަލް ފައިނޭންސިން މައިކްރޯ ހުޅުވާފަ އެވެ. ޕާސަނަލް ފައިނޭންސިން މައިކްރޯ މެދުވެރިކޮށް 25،000ރ. އާ ހަމައަށް ފައިސާ ދޫކުރާނެ އެވެ.

ޕާސަނަލް ފައިނޭންސް އާއި ޕާސަނަލް ފައިނޭންސިން މައިކްރޯ ނަގާ ކަސްޓަމަރުންނަށް ފައިސާ އަނބުރާ ދައްކަން ފަސް އަހަރުގެ މުއްދަތެއް ލިބޭނެ އެވެ.

ބީއެމްއެލް ލުއި އެކްސްޕްރެސް އަދި ލުއި މައިކްރޯ ނަގާފައިވާ ކަސްޓަމަރުންނަށް ވެސް އެ ފެސިލިޓީތައް މެދުވެރިކޮށް ރީފައިނޭންސް ކުރެވޭނެ އެވެ.