އިފްތާރް މީލް ޕެކްތަކާ އެކު ބިދޭސީންނަށް އުފާވެރިކަން

މިޝަން ފޯ މައިގްރަންޓް ވޯކާސް މޯލްޑިވްސް (އެމްއެމްޑަބްލިއުއެމް) އާއި އުރީދޫ މޯލްޑިވްސް ގުޅިގެން ބިދޭސީ މަސައްކަތްތެރިންނަށް ހާއްސަކޮށްގެން ކުރިއަށްގެންދާ އިފްތާރް މީލް ޕެކް ބެހުމުގެ ހަރަކާތް މި އަހަރު ވެސް ކުރިއަށް ގެންދެ އެވެ.

ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނަށް އެހީތެރިކަން ފޯރުކޮށްދިނުމަށްޓަކައި ކުރިއަށްގެންދާ މި ހަރަކާތުގައި ދުވާލަކު ގާތްގަނޑަކަށް 200 އެއްހާ މީލް ޕެކް ބެހުމަށް ވަނީ ނިންމައިފަ އެވެ. އެމްއެމްޑަބްލިއުއެމް އާއި އުރީދޫގެ ވޮލަންޓިއަރުން ވެގެން މީލް ޕެކްތައް ބަހަމުންދަނީ މާލެ އާއި ހުޅުމާލޭގެ ބިދޭސީން ގިނަ ސަރަހައްދުތަކުގަ އެވެ.

މި ހަރަކާތުގައި މިހާތަނަށް 500 މީލް ޕެކްސް ވަނީ ބަހއިފަ އެވެ.

މި ހަރަކާތުގައި އާންމުންނަށް ބައިވެރިވެވޭނެ އިންތިޒާމު ހަމަޖެހިފައިވާއިރު, އިފްތާރް މީލް ޕެކެއް ހަދިޔާކުރުމަށް ބޭނުންވާ ފަރާތްތަކަށް އެމްއެމްޑަބްލިއުއެމް އާ ގުޅިގެން އެކަން ކުރިއަށް ގެންދެވޭނެ އެވެ.

"ޑޮނޭޓް އަ މީލް, ހެލްޕް ސޭވް އަ ލައިފް" މި މޮޓޯގެ ދަށުން ކުރިއަށްގެންދާ މި ހަރަކާތަށް އާންމުންގެ ފަރާތުން ވަނީ ބޮޑު ތަރުހީބެއް ލިބިފަ އެވެ. އޭގެ އިތުރުން މި ހަރަކާތުގައި ވީހާ ވެސް ގިނަ ބައެއްގެ އެއްބާރުލުމާއި އެހީތެރިކަން ލިބުމަކީ އުރީދޫ އާއި, އެމްއެމްޑަބްލިއުއެމްގެ އިތުރުން މި ހަރަކާތުގައި ބައިވެރިވާ ދަ ސްޕޭސް އެލްއެލްޕީގެ ވެސް ވަރަށް ބޮޑު އެދުމެކެވެ.

މި ހަރަކާތުގައި މިދިޔަ ރޯދަ މަހު 4500 ޕެކް ބަހާފައިވެ އެވެ.