ބޮންޑުގެ އިންޓްރެސްޓް ނުދެއްކުމުން ލަންކާ އަށް ދައުވާކޮށްފި

ސޮވެރިން ބޮންޑުތަކުގެ އިންޓްރެސްޓް ނުދައްކައިގެން، ލަންޑަންގެ ހެމިލްޓަން ރިޒާވް ބޭންކުން ސްރީ ލަންކާގެ މައްޗަށް ދައުވާކޮށްފި އެވެ.

ބޭރުގެ ގިނަ ހަބަރުތަކުން ރިޕޯޓުކޮށްފައި ވާގޮތުން، އިގްތިސޯދީ ކާރިސާއަކާ ކުރިމަތިވެފައިވާ ލަންކާ ގޮވައިގެން ދައުވާ ކުރަން ނިންމައިފައި ވަނީ އެ ގައުމުން ހެމިލްޓަން ބޭންކަށް ވިއްކި ދެ ސޮވެރިން ބޮންޑަކަށް ދައްކަން ޖެހޭ އިންޓްރެސް ކަނޑައެޅިފައިވާ ތާރިހަށް ނުދެއްކި، އިތުރަށް ދިން މަސް ދުވަހުގެ މުއްދަތު ހަމަވުމުންނެވެ. އެއީ ކިހާވަަރެއް ކަން ހާމައެެއްނުކުރެ އެވެ.

ބޮންޑަކީ ވަކި މުއްދަތެއްގެ ތެރޭގައި ހަލާސްކުރާ ގޮތަށް އެކި ގައުމުތަކާއި ބޭންކުތަކުން ނަގާ ލޯނެކެވެ. ބޮންޑުގެ އަސްލު އަދަދު ދައްކަންޖެހޭ ތާރީހުގެ ކުރިން، ކަނޑައެޅޭ އުސޫލަކުން ބަރާބަރަށް އިންޓްރެސްޓް ދައްކަން ޖެހޭނެ އެވެ. މިއީ އިނގިރޭސިންގެ އަތްދަށުން މިނިވަންވުމަށް ފަހު ލަންކާ އަށް ބޮންޑެއްގެ އިންޓްރެސްޓް ނުދެއްކުނު ފުރަތަމަ ފަހަރެވެ.

ހެމިލްޓަން ބެންކުގައި ހުރި ލަންކާގެ ބޮންޑުތައް 250 މިލިއަން ޑޮލަރަށް ވުރެ ގިނަ އެވެ. ޕްރިންސިޕަލް އަދަދު ދެއްކުމަށް އެއްބަސްވެފައި ވަނީ އަންނަ މަހު 25 ވަނަ ދުވަހުގެ ކުރިންނެވެ.

ހެމިލްޓަން ބޭންކުން އިއްޔެ ވަނީ އިންޓްރެސްޓާ އެކު ބޮންޑުގެ ފައިސާ ހޯދުމަށްޓަކައި އެމެރިކާގެ ނިއުޔޯކްގައި ހުރި ފެޑެރަލް ކޯޓަކަށް ދައުވާ ހުށަހަޅައިފަ އެވެ.

ދައުވާގައި ބުނެފައިވާ ގޮތުން އެ ފައިސާ އަނބުރާ ނުދެއްކީ ރާޖަޕަކްސަ އާއިލާ ހިމެނޭހެން ލަންކާ ސަރުކާރުގެ އިސްވެރިން އަޑީގައި ތިބެ ގަސްތުގަ އެވެ. އަދި އެ ލޯނަށް ފައިސާ ނުދައްކައި އެހެން ލޯނުތައް ހަލާސް ކުރުމަށް ލަންކާ އިން ވާހަކަ ދައްކައި، މަޝްވަރާ ކުރާ ކަމަށް ވެސް ވަނީ ތުހުމަތުކޮށްފަ އެވެ.

"އެ ލޯނުތައް ނުދައްކާތީ އަހަރެމެންނަށް ވަރަށް ބޮޑަށް އެބަ ގެއްލުންވޭ،" ހެމިލްޓަން ބޭންކުން ބުންޏެވެ.

ލަންކާގެ ބޮޑެތި ބައެއް ކުންފުނިތަކަކުން އެއްވެ، ހެމިލްޓަން ބޭންކުގެ ލޯނު ހަލާސް ކުރުމާ ގުޅޭ ވާހަކަތައް ފަށާނެ ކަމަށް ލަފާކުރެވޭ ކަމަށް ހަބަރުތައް ބުނެ އެވެ.

އެ ގައުމަށް މިހާރު ކުރިމަތިވެފައިވާ އިގްތިސޯދީ ކާރިސާ އަކީ، ފަހުގެ ތާރީހެއްގައި ދިމާވި އެންމެ ބޮޑު ކާރިސާ އެވެ. ތެލާއި، ގޭސް ފަދަ ތަކެތި ލިބުން ދަތިވެފައިވާ އެ ގައުމުގެ ރައްޔިތުން ހާލުގައި ޖެހި، ގިނަ ބަޔަކު އަންނަނީ ސަރުކާރާ ދެކޮޅަށް އަޑުއުފުލަމުންނެވެ.