ފަތުވާ މަޖިލިސް ހަރަކާތްތެރިކުރުވަން ޝަހީމް ގޮވާލައްވައިފި

ދީނީ ހިޔާލު ތަފާތުވުންތައް އުފެދޭ މައްސަލަތަކުގައި އެންމެ ފަހު ބަސް ބުނާ ފަތުވާ މަޖިލިސް ޕެރެލައިޒްވެފައި އޮތް އޮތުން ނިމުމަކަށް ގެނެސް، އެ މަޖިލިސް ހަރަކާތްތެރި ކުރުވަން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް މިއަދު ގޮވާލައްވައިފި އެވެ.

ޔޯގާ ހެދުމާ ގުޅޭގޮތުން ދީނީ އިލްމުވެރިންގެ މެދުގައި ބޮޑެތި ހިޔާލު ތަފާތުވުންތަކެއް އުފެދިފައިވާ މި ދަނޑިވަޅުގައި ޝަހީމް ކުރެއްވި ޓްވީޓުގައި ވަނީ ދީނީ ގޮތުން ބައިބައިވުމަށް ޖާގަ ނުދީ، ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ ދަށުން އުފައްދާފައިވާ ފަތުވާ މަޖިލިސް ހަރަކާތްތެރިކުރުމަށް އެދިވަޑައިގެންފަ އެވެ.

ފަތުވާ މަޖިލީހުގެ ވެބްސައިޓުގައިވާ ގޮތުން ފަސް މެމްބަރުން ތިއްބަވާ މަޖިލީހުގައި މި ވަގުތު ހުންނެވީ އެ މަޖިލީހުގެ ރައީސް، ޝެއިހު ޑރ. މުހައްމަދު ރަޝީދު އިބްރާހިމް އެކަންޏެވެ. ބާކީ ތިއްބެވި މެމްބަރުންގެ ދައުރު ވަނީ ހަމަވެފަ އެވެ.

ފަސް އަހަރަށް އައްޔަންކުރައްވާ މެމްބަރުންގެ ތެރެއިން އެންމެ ފަހުން ހަމަވީ ޑރ. މޫސާ އަންވަރު ހަސަނާއި އިސްހާގު މުހައްމަދުފުޅުގެ ދައުރެވެ. އެއީ މިދިޔަ ފެބްރުއަރީ އެކެއްގަ އެވެ. ނަމަވެސް އޭގެ ފަހުން އެއްވެސް މެމްބަރެއް އައްޔަން ނުކުރެ އެވެ.

ޔޯގާގެ މައްސަލައިގައި ފަތުވާ މަޖިލީހުން ގޮތެއް ނުނިންމާތީ އެ މަޖިލީހަށް ވަނީ ބޮޑެތި ފާޑުކިޔުންތައް އަމާޒުވެފަ އެވެ. އެކަމަކު، ފަތުވާއެއް ނުނެރި ލަސްވަމުން ދަނީ ވެސް އެކަން ކުރެވޭނެ ވަރަށް މެމްބަރުން ނެތިގެންނެވެ.

ފަތުވާ މަޖިލީހުގެ މައްސަލައިގައި މިދިޔަ މަހު ކުރެއްވި ޓްވީޓުގައި ވެސް ޝަހީމް ވިދާޅުވީ ދައުލަތުގައި ފަތުވާގެ ރަސްމީ ހަރުދަނާ ނިޒާމެއް ގާއިމްކުރަންޖެހޭ ކަމަށެވެ.

އިސްލާމީ އެހެން ގައުމުތަކުގައި ދީނީ އެއްބައިވަންތަކާއި ފިކުރީ އަމާންކަން ގާއިމްކުރުމަށް ދައުލަތުގައި ފަތުވާ ކައުންސިލް އުފައްދައި ރަނގަޅަށް ހިނގަމުންދިޔަ ނަމަވެސް ރާއްޖޭގެ ފަތުވާ މަޖިލީހުގެ މެމްބަރުންގެ ދައުރު ހަމަވެގެން ދިޔައިރު ވެސް އާ މެމްބަރުން އައްޔަންނުކޮށް ލަސްވަމުންދާތީ ވެސް ޝަހީމް ވަނީ ކަންބޮޑުވުން ފާޅުކުރައްވައިފަ އެވެ.

ޝަހީމް ވިދާޅުވީ މި ޒަމާނުގައި އިސްލާމީ ޔުނިވާސިޓީތަކުން ތައުލީމް ހާސިލްކޮށް، ސިޔާސީ ނުފޫޒުން އެއްކިބާވެފައިވާ ބޭފުޅުން ފަތުވާ ކައުންސިލަށް އައްޔަންކޮށް ފަތުވާގެ ރަސްމީ އިލްމީ ސައްހަ މަސްދަރު ކަށަވަރުކޮށް ގައުމުގެ ދީނީ އެއްބައިވަންތަކަން ހިމާޔަތްކުރުން މުހިއްމު ކަމަށެވެ.

އެ މައްސަލައިގައި، އަދާލަތު ޕާޓީގެ އިލްމުވެރިންގެ މަޖިލީހުން ދިރާސާކޮށް މި ފަހުން ނެރުނު ރިޕޯޓުގައި ބުނީ ޔޯގާއަކީ ޝިރުކުގެ އަމަލެއް ކަމަށެވެ. އެހެންވެ، އެކަން ހުއްޓުވައިދިނުމަށް ރައީސް އިބްރާހިމް މުހައްމަދު ސޯލިހުގެ އަރިހުން ވަނީ އެދިފަ އެވެ.

ނަމަވެސް އޭގެ ފަހުން، ކުރީގެ ރައީސް މައުމޫން އަބްދުލް ގައްޔޫމް ވަނީ ޝިރުކުގެ އަމަލެއް ނެތް ނަމަ ޔޯގާ ހެދުމަކީ ހަރާމް ކަމެއް ކަމެއް ނޫން ކަމަށް ވިދާޅުވެފަ އެވެ. އެކަމަކު، 100 އަށްވުރެ ގިނަ އިލްމުވެރިންގެ ބައިވެރިވުމާއެކު، އިލްމުވެރިންގެ ގުޅުމުން މިއަދު ނެރުނު ރިޕޯޓުގައި ބުނީ ކަސްރަތެއްގެ ގޮތުގައި ނުވަތަ އެ ނޫން ނަމެއްގައި ވެސް ޔޯގާ ހެދުމާއި ޔޯގާގެ ހަރަކާތްތަކުގައި ބައިވެރިވުމަކީ މުސްލިމުންގެ މައްޗަށް ހަރާމް ކަމެއް ކަމަށެވެ.

ފަތުވާ ދޭ މަޖިލީހުގައި ތިއްބަވަނީ މިނިސްޓަރުގެ ލަފާގެ މަތިން އައްޔަން ކުރައްވާ މެމްބަރަކާއި ގައުމީ ޔުނިވަސިޓީ ނުވަތަ އިސްލާމިކް ޔުނިވަސިޓީގެ އެކަޑަމިކް މުވައްޒަފުންގެ ތެރެއިން ރައީސް އައްޔަން ކުރައްވާ މެމްބަރަކާއި ރައީސް ތަމްސީލް ކުރައްވާ ތިން މެމްބަރުންނެވެ.

އިސްލާމީ ފަތުވާދޭ މަޖިލީހަކީ ރާއްޖޭގައި ދީނީ ގޮތުން ހިޔާލު ތަފާތުވުން އުފެދޭ ކަންކަމުގައި، ސަރުކާރަށާއި ރައްޔިތުންނަށް ދީނީ ފަތުވާ ފޯރުކޮށްދިނުމަށާއި ފިގްހީ އާ މައްސަލަތަކުގެ ދިރާސާތައްކޮށް އެކަންކަމާ ގުޅޭ ދިނީ ލަފާ ފޯރުކޮށް ދިނުމަށް އުފެއްދި މަޖިލީހެކެވެ.

އެ މަޖިލީހުން އެންމެ ފަހުން ފަތުވާއެއް ނެރެފައިވަނީ ކޮވިޑުގެ ދުވަސްވަރު ގައިދުރުކޮށް ނަމާދުކުރުމާ ގުޅޭގޮތުން މާޗު 14، 2021 ގަ އެވެ.