ހއ. ދިއްދޫގައި 75 ފްލެޓް އަޅަން 120 މިލިއަން ރުފިޔާ އަށް ހަވާލުކޮށްފި

ހއ. ދިއްދޫގައި 75 ފްލެޓް އަޅަން 120 މިލިއަން ރުފިޔާ އަށް އެސްޖޭ ކޮންސްޓްރަކްޝަން ޕްރައިވެޓް ލިމިޑެޓާ ހަވާލުކޮށްފި އެވެ.

ހައުސިން މިނިސްޓްރީން ބުނީ ދައުލަތުގެ ޕީއެސްއައިޕީ ބަޖެޓުން ހަރަދުކޮށްގެން ހިންގާ އެ މަޝްރޫއު އެސްޖޭ ކޮންސްޓްރަކްޝަނާ ހަވާލުކުރީ އިއްޔެ އެ އިދާރާގައި ބޭއްވި ރަސްމިއްޔާތެއްގައި ކަމަށެވެ.

އެ މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ، ހައުސިން ޑިޕާޓްމަންޓްގެ ޑިރެކްޓާ ޖެނެރަލް އަހްމަދު ވިޝާން ނަސީމެވެ. އެސްޖޭގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ޝާހިދެވެ.

އެ މަޝްރޫއު ހަވާލުކުރީ އެއް އަހަރު ދުވަހުގެ ތެރޭގައި މަސައްކަތް ނިންމަން ޖެހޭ ގޮތަށެވެ.

މަޝްރޫއުގެ ތަފުސީލު

- 700 އަކަފޫޓުގެ ދެ ބުރީގެ 75 ފްލެޓް

- ކޮންމެ ފްލެޓެއްގައި ތިން ކޮޓަރި، ތިން ފާހާނާ، ސިޓިން ރޫމް، ބަދިގެ، ކާގެ، ލޯންޑަރީ އަދި ސްޓޯ ރޫމެއް.

- ކޮންމެ ޔުނިޓެއް ވަށައިގެން އަލިކުރުން.

- ޕާކެއް ހެދުން.

- ޕާކިން ޒޯނެއް ހެދުން.

ސަރުކާރުން އަންނަނީ މި އަހަރުގެ ތެރޭގައި ވަރަށް ގިނަ ރަށްރަށުގައި ހައުސިން މަޝްރޫއުތައް ފެށުމަށް ތައްޔާރުވަމުންނެވެ. ފިނޭންސް މިނިސްޓްރީން ވަނީ ހަތް ރަށެއްގައި ހައުސިން މަޝްރޫއުތައް ހިންގުމަށް، އެ މަސައްކަތް ކުރާނެ ބަޔަކު ހޯދަން މި އަހަރު ކުރީކޮޅު ހުޅުވާލައިފަ އެވެ.