2045 ވަނަ އަހަރުގެ ތަސައްވުރު ދައްކައިދޭ "ދަ އިޔާ 2045" ފޮތް ނެރެފި

އުގެއިލް ފައުންޑޭޝަނުން ހިންގާ "ދަ ސާކަލް" އެކަޑަމީގެ ޕްރޮގްރާމުތަކުގައި ކިޔަވާ ދަރިވަރުން ތައްޔާރު ކުރި ފޮތް "ދަ އިޔާ 2024" ނެރެފި އެވެ.

އެ ފޮތް އިފްތިތާހުކުރުމަށް ބޭއްވި ހާއްސަ ރަސްމިއްޔާތެއްގައި އެ ފޮތް ނެރެދެއްވީ އެޗްޑީސީގެ މެނޭޖިން ޑިރެކްޓަރު އަދި ސީއީއޯ އަހުމަދު އާތިފް އެވެ. އެ ފޮތަކީ އުގެއިލް ފައުންޑޭޝަނާއި އެޗްޑީސީން ގުޅިގެން ނެރުނު ފޮތެކެވެ. އެ ފޮތަކީ 2045 ވަނަ އަހަރު ދުނިޔެ އޮންނާނެ ގޮތް ކަމަށް ދަރިވަރުން ކުރާ އުއްމީދާއި، ތަސައްވުރު ހިމަނައިގެން ތައްޔާރު ކޮށްފައިވާ ފޮތެކެވެ.

"ދަ ސާކަލް"ގެ އެކި ޕްރޮގްރާމުތަކުގެ ދަށުން ދަރިވަރުންގެ ބައެއް އިލްމީ މަސައްކަތްތައް ޕަބްލިޝްކުރުން ފަދަ ފުރުސަތުތައް ފަހިކޮށްދެމުން އަންނަ ކަމަށް އެ އެކަޑަމީއިން ބުނެ އެވެ. އެ އެކަޑަމީއިން ބުނި ގޮތުގައި ބޮޑެތި މީހުންނާއި ކުޑަކުދިންނަށް އަމާޒުކޮށް އެ އެކަޑަމީއިން ކުރިއަށް ގެންދާ ޕްރޮގްރާމުތަކަށް އެޗްޑީސީގެ އެހީތެރިކަން އަންނަނީ ލިބެމުންނެވެ.

ދަސާކަލްގެ ޕްރޮގްރާމްތަކުގެ ތެރޭގައި ލީޑާސް އޮފް ޓުމޯރޯ, ކޯޑިން އެންޑް ކްރިޓިކަލް ތިންކިން, އެޑްވާންސްޑް ކޯޑިންގް އަދި ކްރިއޭޓިވް އިންގްލިޝް ފަދަ ޕްރޮގުރާމުތައް ހިމެނެއެވެ. އެ ޕްރޮގްރާމްތަކުގެ މައިގަނޑު މަގުސަދަކީ އެކި ކަންކަމާ ގުޅޭ މައުލޫމާތުތައް ފޯރުކޮށްދީ، ދަރިވަރުންގެ ވިސްނުން ތަރައްގީކޮށް ދިރިއުޅުމުގެ އެކި މަރުޙަލާތަކުގައި ބޭނުންކުރެވޭނެ މުހިންމު ހުނަރުތައް ދަސްކޮށްދިނުމެވެ.