އިންޑިއާގައި ހުރި ޓްވިޓާގެ ދެ އޮފީހެއް ބަންދުކޮށްފި

ޓްވިޓާއިން އިންޑިއާގައި ހިންގާ ތިން އޮފީހުގެ ތެރެއިން ދެ އޮފީހެއް ބަންދުކޮށް، އެ ތަނުގެ މުވައްޒަފުންނަށް ގޭގައި މަސައްކަތް ކުރަން އަންގައިފި އެވެ.

"ބްލޫމްބާގް" އިން ރިޕޯޓުކުރި ގޮތުގައި، ބަންދުކުރަން އަންގާފައި ވަނީ އިންޑިއާގެ ނިއު ދިއްލީ އާއި މުމްބާއީގައި ހުރި ޓްވިޓާ އޮފީހެވެ. އިންޖިނިއަރުން ގިނައިން ތިބި، ބެންގަލޫރުގެ އޮފީސް އަދި ބަންދެއް ނުކުރެ އެވެ.

ޓްވިޓާއާ ހަވާލުވުމަށް ފަހު، ހަރަދުކުޑަ ކުރުމުގެ މަގްސަދުގައި ބިލިއަނަރު އީލޮން މަސްކު ވަނީ އިންޑިއާގައި ތިބި އެކުންފުނީގެ 200 އަށް ވުރެ ގިނަ މުވައްޒަފުންގެ ތެރެއިން 90 ޕަސެންޓް މީހުން ވަޒީފާއިން ވަކިކޮށްފައި ކަމަށް އިންޑިއާގެ މީޑިއާއިން ކުރިން ރިޕޯޓްކޮށްފައިވެ އެވެ.

ދާދި ފަހުން ޓްވިޓާއިން ވަނީ އެ ކުންފުނިން ސިންގަޕޫރުގައި ހިންގަމުން އައި އޮފީހެއް ވެސް ކުލި ނުދެއްކިގެން ބަންދުކޮށް، މުވައްޒަފުންތައް ގެއަށް ފޮނުވާލައިފަ އެވެ.

އެމެރިކާގެ ސެން ފްރެންސިސްކޯ އަދި އިނގިރޭސިވިލާތުގެ ލަންޑަންގެ ގިނަ އޮފީސްތަކެއް ހިންގާ އިމާރާތްތަކުގެ ވެރިން ވަނީ ކުލީގެ ގޮތުގައި ދައްކަން ޖެހޭ އެތައް މިލިއަން ޑޮލަރެއް ނުދައްކައިގެން، ޓްވިޓާއާ ދެކޮޅަށް ދައުވާ ވެސް ކޮށްފަ އެވެ.

"ސްޕޭސް އެކްސް" އަދި "ޓެސްލާ" ގެ ވެސް ސީއީއޯ، އީލޮން ޓްވިޓާގެ ސީއީއޯގެ މަގާމާ ހަވާލުވުމަށް ފަހު މިދިޔަ އަހަރުގެ އޮކްޓޯބަރު މަހުގެ ނިޔަލަށް ވަނީ އެ ކުންފުނީގެ ދެބައިކުޅަ އެއްބަޔަށް ވުރެ ގިނަ މުވައްޒަފުން ވަޒީފާއިން ވަކިކޮށްފަ އެވެ.