ލިވަޕޫލް ވިއްކާލާކަށް ނޫޅެން، ހޯދަނީ އިންވެސްސްޓަރެއް: އޯނަރު

ލިވަޕޫލް (ފެބްރުއަރީ 21) - ލިވަޕޫލް ވިއްކާލަން ނޫޅޭ ކަމަށާއި ހޯދަނީ ކްލަބަށް އިންވެސްޓް ކުރާނެ ފަރާތެއް ކަމަށް، އެ ޓީމުގެ އޯނަރު އެމެރިކާގެ ޖޯން ހެންރީ ވިދާޅުވެއްޖެ އެވެ.

ލިވަޕޫލް ހިންގާ، ފޭންވޭ ސްޕޯޓްސް ގޫރޫޕުން، ނޮވެމްބަރު މަހު ނެރުނު ބަޔާނުގައި ބުނެފައި ވަނީ ލިވަޕޫލުގެ މަސްލަހަތަށް އެންމެ ރަނގަޅު ނަމަ ކްލަބަށް އިންވެސްޓަރެއް ގެންނާނެ ކަމަށެވެ.

އެމެރިކާގެ ބޮސްޓަން ސްޕޯޓްސް ޖާނަލް އަށް ދިން އިންޓަވިއުގައި ހެންރީ ވިދާޅުވީ އޭނާގެ އިންވެސްޓް އިންގްލެންޑްގައި ކުރިއަށްގެންދާނެ ކަމަށެވެ.

"އަހަރެމެން ލިވަޕޫލް ވިއްކާލަނީ ހޭ؟ ނޫން،" ފެންމަތިވަމުންދާ ސުވާލުތަކަށް ޖަވާބު ދެމުން ހެންރީ ވިދާޅުވި އެވެ.

"އިންވެސްޓަރުންނާ އެބަ ވާހަކަ ދައްކަން ހޭ؟ އާނ އެކަން އެބަ ކުރަން. އެހެން ގޮތެއް ވެދާނެ. އެކަމަކު އެއީ ކްލަބް ވިއްކާލުމެއް ނޫން."

އޭނާގެ ކުންފުނިން ލިވަޕޫލް ގަތީ 2010 ގައި 358 މިލިއަން ޑޮލަރަށެވެ. އެއީ މިހާރު ކްލަބްތައް ގަންނަ އަގުން ބަލަނަމަ ކުޑަ އަދަދެކެވެ. ލިވާޕޫލާ އެންމެ ވާދަވެރި ކްލަވް މެންޗެސްޓާ ޔުނައިޓެޑް ވިއްކާލަން ބާޒާރަށް މިހާރު ވަނީ ނެރެފަ އެވެ. އެ ކްލަބް ގަތުމުގެ މޫނު މަތީ އަގަކީ ގާތްގަނޑަކަށް 7 ބިލިއަން ޑޮލަރެވެ. އެމެރިކާގެ މަހުޖަނު ޓޮޑް ބޮއެލީ ޗެލްސީ މިދިޔަ އަހަރު ގަތީ 5 ބިލިއަން ޑޮލަރަށް ވުރެ ބޮޑު އަގެއްގަ އެވެ.