ހަކީމީގެ މުދާތައް މަންމަ ނަންމަތީގައި، ކުރީގެ އަންހެނުންނަށް އެއްޗެއް ލިބޭ ގޮތެއް ނުވި

ޕީއެސްޖީ އަށް ކުޅޭ މޮރޮކޯ ޑިފެންޑަރު އަޝްރަފް ހަކީމީގެ މުދަލާއި ފައިސާ، އޭނާގެ މަންމަގެ ނަން މައްޗަށް ބަދަލުކޮށްފައިވާތީވެ، އޭނާގެ މިލްކިއްޔާތުން ބައެއް ހޯދުމަށް ކުރީގެ އަންހެނުން ހިބާ އަބޫކް ކުރި މަސައްކަތް ނާކާމިޔާބުވެއްޖެ ކަމަށް މީޑިއާ ރިޕޯޓްތައް ބުނެފި އެވެ.

ހަކީމީގެ ކިބައިން ހިބާ ވަރިވާން މަސައްކަތް ފެށީ، އުމުރުން 24 އަހަރަކުގެ އަންހެނަކު މިދިޔަ ފެބްރުއަރީ މަހު ހަކީމީގެ މައްޗަށް ރޭޕުގެ ތުހުމަތުކުރުމުންނެވެ. އެ މައްސަލަ ފުލުހުން އަންނަނީ ބަލަމުންނެވެ.

އެކަމަކު ހިބާ ބުނެފައިވަނީ ރޭޕްގެ ތުހުމަތުގެ ކުރިން ވެސް ހަކީމީ ކައިރިން ވަރިވާން ނިންމާފައިވާ ކަމަށެވެ. ވަރިވުމުގެ މަރުހަލާ އަށް ފަހު ހިބާ ކޯޓުގައި އެދުނީ ހަކީމީގެ މިލްކިއްޔާތުގައިވާ މުދަލާއި އެކައުންޓުގައި ހުރި ފައިސާގެ 50 ޕަސެންޓް އޭނާ އަށް ނަގައިިދިނުމަށެވެ. އެކަމަކު ކޯޓުން ބެލިއިރު، ހަކީމީގެ މިލްކިއްޔާތުގައި އެއްވެސް އެއްޗެއް ނެތެވެ.

ރިޕޯޓްތައް ބުނާ ގޮތުގައި ހަކީމީ ވަނީ އެ ހުރިހާ މުދަލަކާއި، ފައިސާއެއް މަންމަ ފާތިމާގެ ނަން މައްޗަށް ބަދަލުކޮށްފަ އެވެ. އެއީ މި މައްސަލަ ފެންމަތިވުމުން މުދާތައް ސަލާމަތްކުރަން ކުރި ކަމެއް ކަމެއް ނުވަތަ މާކުރިން ވެސް ވެސް ކޮށްފައިވާކަމެއް ކަމެއް ނޭގެ އެވެ.

ހަކީމީ އަކީ އޭނާގެ މަންމަ ދެކެ ވަރަށް ލޯބިވާ އަދި އެކަން އަމަލުން ދައްކާ ކުޅުންތެރިޔެކެވެ. މިދިޔަ އަހަރުގެ ވޯލްޑް ކަޕުގެ ސެމީ ފައިނަލަށް މޮރޮކޯ ކުރި ދަތުރުގައި ވެސް ކޮންމެ މެޗަކަށް ފަހު އޭނާ މަންމައާ އެކު އުފާފާޅުކުރެ އެވެ.

ރެއާލް މެޑްރިޑާއި ބޮރޫޝިއާ ޑޯޓްމަންޑާއި އިންޓަ މިލާނުގެ ކުރީގެ ކުޅުންތެރިޔާ އަށް ގަތަރުގެ މަހުޖަނުން ހިންގާ ޕީއެސްޖީން އަހަރަކު މުސާރައިގެ ގޮތުގައި 12 މިލިއަން ޑޮލަރު ދެ އެވެ.

މޮރޮކޯ އާއިލާއަކަށް، ސްޕެއިނުގައި އުފަންވި ހަކީމީގެ ކުރީގެ އަންހެނުން ހިބާ އަކީ، ޓިއުނީޝިއާ އާއިލާއަކަށް ސްޕެއިނުގައި އުފަންވި އެ ގައުމުގެ ފިލްމީ ތަރިއެކެވެ. ހަކީމީ އަށް ވުރެ 12 އަހަރު ދޮށީ ހިބާއާ ކައިވެނިކޮށްގެން އޭނާ އަށް ދެ ކުދިން ލިބިފައިވެ އެވެ.