ތޫނު ހަތިޔާރު ގާނޫނު ހިންގަން ސަރުކާރާއި މަޖިލީހުން ސަމާލުކަމެއް ނުދޭ: ހައި ކޯޓް

ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނު ތަންފީޒު ކުރަން ސަރުކާރާއި ރައްޔިތުންގެ މަޖިލީހުން ސަމާލުކަން ނުދޭ ކަމަށް ހައި ކޯޓުގެ ހުކުމެއްގައި މިއަދު ބުނެފި އެވެ.

ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރަށް ހަމަލާދިން ކަމަށް ތުހުމަތުވާ މީހުން ބަންދުން ދޫކޮށްލި މައްސަލަ ދައުލަތުން އިސްތިއުނާފް ކުރުމުން ހައި ކޯޓުން ކުރި ހުކުމުގައިވަނީ ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ދަށުން ސަރުކާރުން ގަވާއިދު ހަދައި، މަޖިލީހުގެ ގައުމީ ސަލާމަތާބެހޭ ކޮމެޓީއަށް ހުށަހަޅަން ޖެހޭ ކަމަށެވެ. އެކަމަކު 13 އަހަރުވީއިރު އެކަން ކޮށްފައި ނެތުމަކީ ގާނޫނު ހިންގަން ސަމާލުކަން ނުދޭކަން ހާމަކޮށްދޭ ކަމެއް ކަމަށް އެ ހުކުމުގައިވެ އެވެ.

"މި ގާނޫނު ހިންގުމުގައި ވެރިކަން ހިންގުމުގެ ބާރުންނާއި ގާނޫނު ހެދުމުގެ ބާރުން ސަމާލުކަމެއް ނުދޭކަން މި ގާނޫނަށް އަމަލު ކުރަން ފެށިތާ 13 އަހަރު ފުރެން ދާއިރު، މި ގާނޫނުގެ ދަށުން ހަދަންޖެހޭ ހަމަ އެއްވެސް ގަވާއިދެއް ހަދައި، ގެޒެޓްކޮށްފައި ނުވުމުން އަންގައިދޭ." ހައި ކޯޓުގެ ހުކުމުގައިވެ އެވެ.

ހުކުމުގައިވާ ގޮތުން އެ ގާނޫނަކީ ތޫނު ހަތިޔާރު ބޭނުންކޮށްގެން ހިންގާ އަމަލުތަކާ ދެކޮޅަށް ހަރުކަށި އުސޫލުތަކެއް ތައާރަފްކުރި ގާނޫނެއް ކަމަށް ވިޔަސް، ގާނޫނުގެ މަގްސަދަށް ބެލުމެއް ނެތި ގާނޫނު މާނަ ކުރަމުން ދިއުމުގެ ސަބަބުން އެ ގާނޫނު މިހާރު އޮތީ "ދަތް ނެތް ސިންގާއެއް" ފަދަ ގޮތަކަށެވެ. އެގޮތުން ނުރައްކާތެރި ހަތިޔާރު ބޭނުންކޮށްގެން ހިންގާ މިފަދަ އަމަލުތަކަށް އަދިވެސް މަޑުޖެހުމެއް ނެތް ކަން ހުކުމުގައި ފާހަގަކުރި އެވެ.

"މި ގާނޫނު ވެގެން ގޮސްފައިވަނީ ހަރުކަށި އުސޫލުތަކެއް އެ ގާނޫނު ހުރި ނަމަވެސް ތަންފީޒުކުރަން ޖެހޭ ވަގުތު ދަތް ނެތް ސިންގާއެއްގެ ގޮތުގައި." ހައި ކޯޓުގެ ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވެ އެވެ.

ފަނޑިޔާރު މުހައްމަދު ނިޔާޒް ރިޔާސަތު ބެލެހެއްޓެވި ބެންޗުގައި ދެން ތިއްބެވީ ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ޝަނީޒެވެ.