އިދިކޮޅުގެ ދޮގުތަކާއި އޮޅުވާލުންތަކަށް ރައްދު ނުދީ ތިބުމަކީ ލިބުނު ގެއްލުމެއް: ރައީސް

ރިޔާސީ އިންތިހާބުގެ ފުރަތަމަ ބުރުގައި އުއްމީދުކުރި ވަރުގެ ނަތީޖާއެއް ނުލިބުނު އެންމެ ބޮޑު އެއް ސަބަބަކީ ގައުމުގެ މިނިވަންކަމާއި އިސްތިގާލު ގެއްލޭ ކަމަށް އިދިކޮޅު ފަރާތްތަކުން ފަތުރަމުންދިޔަ ދޮގުތަކާއި އޮޅުވާލުންތަކަށް ރައްދުނުދީ ކެމްޕޭން ކުުރިއަށް ގެންދިއުން ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

އިންތިހާބުގެ ފުރަތަމަ ބުރުގައި ރައީސްގެ މައްޗަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކުރި ހޯއްދެވީ ލައްކައަކަށް ވުރެން ގިނަ ވޯޓާ އެކުގަ އެވެ.

އިންތިހާބުގެ ނަތީޖާއާ ގުޅޭ ގޮތުން "ރާއްޖެ ޓީވީ" އަށް ދެއްވި އިންޓަވިއުގައި ރައީސް ވިދާޅުވީ ބޭރުގެ ސިފައިން ރާއްޖޭގެ ތިބި ކަމަށް ވެސް ކަނޑައެޅިގެން ދޮގު ވާހަކަތަކެއް ފަތުރަމުންދިޔަ ކަމަށެވެ. އެ ތުހުމަތުތަކުގެ ހަގީގަތް ހާމަކުރަންޖެހޭ ކަމަށާއި އެކަން ކުރާނެ ކަމަށް ރައީސް ވިދާޅުވި އެވެ.

"ދޮގު ވާހަކަތަކެއް ކިޔައިދީގެން ގަބޫލުކުރެވޭ ވަރަށް ރައްޔިތުންގެ ބޮލަށް ވައްދާފައި އެބަހުރި. އެއީ އެއްވެސް ކަހަލަ ހަގީގަތެއް އޮތް ވާހަކައެއް ނޫން. އަޅުގަނޑުމެންނަކަށެއް އެއަކަށް ރައްޔިތުންނަށް އޮޅުންފިލުވައިދޭ ވަރަށް ކެމްޕޭން ތެރެއަކު މަސައްކަތް ކުރެވިފައެއް ނެތް،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އޭގެ އިތުރުން ވެސް ވަރަށް ގިނަ "މިސްޓޭކްސް" ހެދިފައި އެބަހުއްޓެވެ. އުއްމީދުކުރި ނަތީޖާ ނުލިބުނީ ވޯޓުލާން ނުކުތް އަދަދާއި އެމްޑީޕީއަށް ނެރެވުނު އަދަދު ވެސް މަދުވެގެން ކަމަށް ވިދާޅުވި އެވެ.

އެމަނިކުފާނު ވިދާޅުވީ އިދާރީ ގޮތުން ރަނގަޅު ކުރަން ޖެހޭ ކަންކަން ދެވަނަ ބުރުގައި ރަނގަޅުކުރަން ޖެހޭ ކަމަށެވެ.

"އަޅުގަނޑުމެންގެ ހުރިހާ ދާއިރާއެއްގައި ޕްލެޖްވޯޓު ހުރި ވަރާއި، ވޯޓު ދޭން ނިންމައިގެން ތިބި ވަރަށް ގިނަ މީހުން ވޯޓުނުލާ އެބަތިބި. ބައެއް ރަށްރަށުގައި ޕްލެޖުގެ ތެރެއިން 300-400 ވޯޓު ނުލެވި އެބަހުރި،" ރައީސް ވިދާޅުވި އެވެ.

"މީހުން ނެރުމުގައި އަޅުގަނޑުމެންނަށް ކުރިން ކުރާ ވަރަށް މަސައްކަތްނުކުރެވި ހުރި ކަމަށް އެބަފެނޭ. އިރާދަކުރެއްވިއްޔާ މި ކަންތައްތައް ބަދަލުވީމަ އަޅުގަނޑުމެންގެ ޕްލެޖް ވޯޓަށް ބަލާއިރު މިއީ ނުވާނެ ކަމެއް ކަމަށް ނުފެނޭ،" ރައީސް ވިދާޅުވި އެވެ.

އެމަނިކުފާނު ވިދާޅުވީ ދެވަނަ ބުރަށް ކޯލިޝަން ހަދަން ބައެއް ޕާޓީތަކާ ވާހަކަދައްކަމުން އަންނަ ކަމަށެވެ. ބައެއް ޕާޓީތަކުން ފެހި ސިގްނަލް ލިބިފައިވާ ކަމަށް ވިދާޅުވި އެވެ.

ރައީސް ވިދާޅުވި ގޮތުގައި ރަސްމީކޮށް އެކަން އިއުލާންކުރެވޭ ހިސާބަށް ނުދެ އެވެ. ދެވަނަ ބުރުގައި އެ ފަރާތްތަކާ އެކު ކޯލިޝަނަކުން ނުކުމެވިއްޖެ ނަމަ ފުދޭވަރެއްގެ ކުރިއެރުމެއް ލިބޭނެކަން ރައީސް ފާހަގަކުރެއްވި އެވެ.

ރައީސް އެދިވަޑައިގަތީ މި ގައުމު ވެއްޓޭ އަނދަވަޅުން ސަލާމަތްކުރަން އެންމެން މަސައްކަތްކޮށްދިނުމަށެވެ.

"އަޅުގަނޑުގެ އެދުމަކީ ގައުމު ގޮސް މިވެއްޓޭ އަނދަވަޅުން ސަލާމަތްކުރަން އިތުރު ހިތްވަރެއް ލައިގެން މަސައްކަތް ކުރައްވާށޭ. ނޫނިއްޔާ އަޅުގަނޑުމެންނަށް ފެންނަ މަންޒަރު ވަރަށް ބަނަ. ވަރަށް އަނދިރިކޮށް މި ފެންނަނީ. އަނެއް ކެންޑިޑޭޓުގެ ލިންކްތައް ބަލާއިރުގައި އަޅުގަނޑުމެން ބިރުގަންނަ ކަހަލަ އެތައް ކަމެއް އެބަފެނޭ. ހުރިހާ ރައްޔިތުންނަށް އަޅުގަނޑު ދަންނަވާނީ އެންމެން އެކީގައި ގޮސް ކާމިޔާބުކުރަން ޖެހެއޭ," ރައީސް ވިދާޅުވި އެވެ.