މުމްބާއީގެ 30،000 ސަޕޯޓަރުން ކުރިމަތީ ހިލާލަށް އުނދަގޫ މޮޅެއް

ނަވީ މުމްބާއީ (ނޮވެމްބަރު 11) - އޭއެފްސީ ޗެމްޕިއަންސް ލީގުގައި މުމްބާއީ ސިޓީގެ 30،000 ސަޕޯޓަރުން ކުރިމަތީ ކުޅެ 2-0 އިން އަލް ހިލާލް މޮޅުވެއްޖެ އެވެ.

ސައުދީގައި މުމްބާއީ ކޮޅަށް ހަ ގޯލު ޖަހައި ބޮޑު ތަފާތަކުން ހިލާލް މޮޅުވި ނަމަވެސް ރޭގެ މެޗުގައި އެޓީމަށް ގޯލު ޖެހުނީ މުމްބާއީން އެކަކު މަދުކޮށް ކުޅެނިކޮށެވެ. ދެވަނަ ހާފުގެ 10 ވަނަ މިނިޓުގައި މެހެތާބް ސިންގަށް ރަތް ކާޑު ދެއްކީ ރުބެން ނެވޭސް އަށް ކުރި ފައުލަކާ ގުޅިގެންނެވެ.

އޭގެ ކުޑަ އިރުކޮޅެއް ފަހުން ހިލާލުން ލީޑު ނެގި ގޯލު ޖަހައިދިނީ މައިކަލް އެވެ. އަދި މެޗު ނިމެން ފަސް މިނިޓަށް ވެފައި ވަނިކޮށް ލީޑު ފުޅާ ކޮށްދިނީ އެލެކްސެންޑަ މިޓްރޮވިޗް އެވެ.

މިއާ އެކު ހަތަރު މެޗު ކުޅެގެން ގުރޫޕް ޑީގެ އެއްވަނައިގައި ހިލާލް އޮތީ 10 ޕޮއިންޓާ އެކު އެވެ. އުޒްބަކިސްތާނުގެ ނަވްބަހޯ ވެސް 2-1 އިން އިރާނުގެ ނައްސާޖީ މަޒަންދަރަންގެ މައްޗަށް ކުރި ހޯދައިގެން 10 ޕޮއިންޓް ހަމަކުރި ނަމަވެސް ގޯލުގެ ތަފާތުން އެޓީމު އޮތީ ދެވަނައިގަ އެވެ.

އިރާގުގެ އެއާ ފޯސް ކްލަބް އަތުން، ކަރީމް ބެންޒެމާ އާއި އެންގޯލޯ ކަންޓޭގެ އަލް އިއްތިހާދު ވަނީ 2-0 އިން ބަލިވެފަ އެވެ.

އިރާގުގައި ބެންޒެމާ އާއި ކަންޓޭ ފުލްކޮށް ކުޅުނު ނަމަވެސް ގޯލު ޖަހަން މާ ގިނަ ފުރުސަތެއް އެޓީމަށް ހޯދިފައެއް ނުވެ އެވެ.

އިއްތިހާދު ބަލިވި ނަމަވެސް އެޓީމު އޮތީ ހަތަރު މެޗުން ނުވަ ޕޮއިންޓް ހޯދައިގެން ގުރޫޕް ސީގެ އެއްވަނައިގަ އެވެ. ދެވަނައިގައި އޮތް އިރާނުގެ ސެފަހާން އާއި ތިންވަނައިގައި އޮތް އެއާ ފޯސް ކްލަބަށް ވެސް ވަނީ ހަތް ޕޮއިންޓް ލިބިފަ އެވެ.

ސެފަހަން ވަނީ ރޭ 9-0 ގެ ބޮޑު ތަފާތަކުން އުޒްބަކިސްތާނުގެ އޭޖީއެމްކޭ ބަލިކޮށްފަ އެވެ. އިއްތިހާދުން މިދިޔަ މަހު ސެފަހާން އާ ދެކޮޅަށް އިރާނުގައި ކުޅެން އެގައުމަށް ދިޔަ ނަމަވެސް، މެޗެއް ނުކުޅެ އެވެ.

އިރާނުގައި ސެފަހާން އާ ދެކޮޅަށް ނުކުޅުނީ އެގައުމުގެ ކުރީގެ އަސްކަރީ ޖެނަރަލް ގާސިމް ސުލައިމާނީގެ ސޫރަ ރަމްޒުވާ ގޮތަށް މޮނިއުމެންޓެއް ދަނޑުގައި ހުރުމުން އިއްތިހާދުން މެޗު ކުޅެން ދެކޮޅު ހެދުމުންނެވެ.

މިއާ ގުޅިގެން އޭއެފްސީން ވަނީ ސެފަހާން އިން ގަވާއިދާ ހިލާފުވި ކަމަށް ބަލައި 3-0 ގެ ނަތީޖާއަކުން އިއްތިހާދު މޮޅުވީ ކަމަށް ބަލައިފަ އެވެ.

ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކުޅޭ ސައުދީގެ އައް ނަސްރު، މިރޭ 11 ޖަހާއިރު ގަތަރުގައި އެގައުމުގެ އައް ދުހެއިލް އާ ދެކޮޅަށް ކުޅޭނެ އެވެ. ނަސްރު ވަނީ ގުރޫޕް ސްޓޭޖުގައި މިހާތަނަށް ކުޅުނު ތިން މެޗު ވެސް ކާމިޔާބު ކޮށްފަ އެވެ.