ޓްރެފިކަށް ލުއި ކުރަން ސަބުދެލިމަގު ހުޅުވާލަނީ

އަމީނީމަގު ހަދަމުންދާތީ ޓްރެފިކަށް ދިމާވެފައިވާ މައްސަލަ ހައްލު ކުރުމަށް، ހިރިޔާ ސްކޫލުގެ އުތުރަށް އޮންނަ ސަބުދެލި މަގު ހުޅުވާލަން ނިންމައިފި އެެވެ.

މީގެ ހަ އަހަރު ކުރިން އެ މަގު ބަންދުކުރީ މިހާރުގެ ރައީސް ޑރ. މުހައްމަދު މުއިއްޒުގެ ހައުސިން މިނިސްޓަރު ކަމުގައި ލަގްޒަރީ ހައުސިން ޕްރޮޖެކްޓެއް ހިންގުމަށެވެ. ކޮރަަލް ބުލެވާޑުުގެ ނަމުގައި ރަސްފަންނު ސަރަހައްދުގައި ކުރިއަށް ގެންދިއުމަށް ދޫކޮށްފައިވާ ބިމުގައި މިއަދާ ހަމައަށް ވެސް އެއްވެސް މަސައްކަތެއް ނުކުރެ އެވެ.

ޕަބްލިކް ވޯކްސް މިނިސްޓްރީން މިއަދު އެކްސްގައި ކުރެއްވި ޕޯސްޓެއްގައި ބުނީ އެ މަގު ހުޅުވުމުގެ މަސައްކަތަކީ އަމީނީ މަގު ހެދުމުގެ ޕްރޮޖެކްޓާ ގުޅިގެން މާފަންނުގައި ދިމާވެފައިވާ ޓްރެފިކް މައްސަލައަށް ހައްލެއް ގެނައުމައްޓަކައި ރައީސް މުއިއްޒު އިރުޝާދުގެ މަތިން ކުރަން ފެށި މަސައްކަތެއް ކަމަށެވެ.

އެ މަގު އަލުން ހުޅުވުމަށް، މަގު ސާފު ކުރުމުގެ މަސައްކަތް މިނިސްޓްރީގެ ޕަބްލިކް ވޯކްސް ޔުނިޓުގެ މުވައްޒަފުން ކުރަމުންދާކަމަށް މިނިސްޓްރީން ބުންޏެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ސިންގަޕޫރު ކުންފުނި ޗަންހުއާ ކޮންސްޓްރަކްޝަނަށް އެ މަޝްރޫއު ހަވާލުކުރީ 2020ގެ ނިޔަލަށް ނިންމުމަށެވެ. އަދި އެ ތަނުގެ ހަތަރު ޓަވަރުން 120 ފްލެޓް ސަރުކާރަށް ދޭން ޖެހޭ ގޮތަށް އެ ތަން ހެދުމަށް އޭރު ބިންގާ ވެސް އެޅި އެވެ.

ނަމަވެސް ފަހުން އެ މަޝްރޫއު ހުޅުމާލެއަށް ބަދަލު ކުރުމުން އެ ބިމުގައި އެއްވެސް މަސައްކަތެއް ނުކޮށް އޮތީ ބަންދުކޮށްފަ އެވެ.