ހޫތީންނަށް އީރާނުން ފޮނުވި މިސައިލްގެ ބައިތަކެއް އަތުލައިގެންފިން: އެމެރިކާ

ރަތްކަނޑުގައި އުޅަނދުތަކަށް ހަމަލާދޭ ހޫތީ ހަނގުރާމަވެރިންނަށް އީރާނުން ފޮނުވި މިސައިލްގެ ބައިތަކެއް ހުރި ބޯޓެއް އަރަބި ކަނޑުން އަތުލައިގެންފައިވާ ކަމަށް އެމެރިކާއިން އިއްޔެ ބުނެފި އެވެ.

މިއީ ފަލަސްތީނުގެ ޣައްޒާއަށް އިޒްރޭލުން މިދިޔަ އަހަރު ހަމަލާ ދޭން ފެށުމުން އެކަމުގެ ރައްދެއްގެ ގޮތުން ރަތްކަނޑުގައި ހޫތީން ހަމަލާދޭން ފެށި ފަހުން އެމެރިކާއިން ހިންގި މިފަދަ ފުރަތަމަ އޮޕަރޭޝަނެވެ.

އެމެރިކާގެ ސެންޓްރަލް ކޮމާންޑުން އެކްސްގައި އާންމުކުރި ބަޔާނެއްގައި ބުނީ އެމެރިކާގެ ނޭވީ ސީލް އިން ހިންގި އޮޕަރޭޝަންގައި އުޅަނދު އަތުލައިގަތީ ބުރާސްފަތި ދުވަހު ސޯމާލިއާ ބޭރުން އެއްވެސް ގައުމަކަށް ނިސްބަތްވާ ނުވާ ކަނޑުގެ ސަރަހައްދުން ކަމަށެވެ. އަތުލައިގަތް ބޯޓުގައި އީރާނުގައި އުފައްދާ ބެލަސްޓިކް މިސައިލާއި ކްރޫޒް މިސައިލްގެ ބައިތައް ހުރި ކަަމަށް ބަޔާނުގައިވެ އެވެ.

ނޭވީ ސީލްގެ ދެ މީހަކު ކަނޑަށް ގެއްލިފައިވާ ކަމަށް މީގެ ކުރިން ރިޕޯޓްކޮށްފައި ވާއިރު މިއީ މި އޮޕަރޭޝަންގައި ގެއްލުނު ދެ މީހުން ކަމަށް ވެސް ބަޔާނުގައި ބުނެފައިވެ އެވެ. މި ދެ މީހުން ހޯދަން ވަރަށް ބޮޑު އޮޕަރޭޝަނެއް ކުރިއަށްދާ ކަމަށް ސެންޓްރަލް ކޮމާންޑުގެ ވެރިޔާ މައިކެލް ކުރީލާ ވިދާޅުވި އެވެ.

"މިއީ ހޫތީން އުޅަނދުތަކަށް ހަމަލާދޭން ފެށި ފަހުން، އީރާނުން ހޫތީންނަށް ފޮނުވި އެޑްވާންސްޑް ކޮންވެންޝަނަލް ވެޕަން [އޭސީޑަބްލިޔު] އަތުލައިގަނެވުނު ފުރަތަމަ ފަހަރު،" ސެންޓްކޮމްގެ ބަޔާނުގައިވެ އެވެ.

އަތުލައިގަތް ތަކެތީގެ ތެރޭގައި ހިމެނޭ އެއްޗެހި ބޭނުންކޮށްގެން ހަދާފައިވާ ހަތިޔާރު، ހަނގުރާމައާ އެއްވެސް ގުޅުމެއް ނެތް ކާގޯ އުޅަނދުތަކަށް ބިރު ދައްކައި ގެއްލުން ދިނުމަށް ބޭނުންކުރާ ކަމުގެ ހެކި މިހާތަނަށް ލިބިފައިވާ ކަމަށް ވެސް ބަޔާނުގައިވެ އެވެ.

ހަތިޔާރު އުފުލީ ސޯމާލިއާ ސަރަހައްދުގައި ބޭނުންކުރާ އިހުގެ ކަނޑު އުޅަނދު ކަމަށްވާ "ދޯ" އެއްގައި ކަމަށާއި އޭގައި 14 މީހަކު ތިބި ކަމަށް އެމެރިކާއިން ބުންޏެވެ. ދޯ އަކީ ރިޔާނެގި ދޯންޏެއް ގޮތަށް އޮންނަ އުޅަނދެކެވެ.

ދޯގައި ތިބި މީހުންނަކީ ކޮން ބައެއްކަން ދެނެގަތުމުގެ މަސައްކަތްކުރަމުން އަންނަ ކަމަށާއި އެ އުޅަނދަކީ ރައްކާތެރި އެއްޗަކަށް ނުވާތީ ފައްތާލާފައިވާ ކަމަށް ވެސް ބަޔާނުގައިވެ އެވެ. --އޭއެފްޕީ