އެޑްމިޝަން ފޯމުގައި ޓްރާންސްޖެންޑާ އޮޕްޝަން ޖެހުނީ އޮޅުމަކުން: ޣިޔާސުއްދީން ސްކޫލް

ޣިޔާސުއްދީން އިންޓަނޭޝަނަލް ސްކޫލް (ޖީއައިއެސް) ގެ އެޑްމިޝަން ފޯމުގައި ޓްރާންސްޖެންޑާ ހިމެނުނީ އޮޅުމަކުން ކަމަށް އެ ސްކޫލުން މިއަދު ބުނެފި އެވެ.

ޖީއައިއެސް އިން ނެރުނު ބަޔާނެއްގައި ބުނީ، މި އަހަރު ގްރޭޑް 1 ގެ ދަރިވަރުންގެ އެޑްމިޝަން ފޯމުގައި ޖެންޑާ މެނޫގެ ދަށުން ޓްރާންސްޖެންޑާ އިހުތިޔާރު ކުރުމުގެ އޮޕްޝަން ހިމެނުނީ އިންޑިއާ އާއި އެހެން ގައުމުތަކުގައި ހިންގާ ސްކޫލްތަކުގެ އެދުމުގެ މަތިން އީއާރުޕީ ނިޒާމަށް ގެނައި ބަދަލަކާ ގުޅިގެން ކަމަށެވެ.

އެ ބަދަލު ޖީއައިއެސްގެ ފޯމަށް ވެސް އައިސްފައި ވަނީ ސްކޫލްގެ ފަރާތުން ފޯމުތައް ޗެކް ނުކުރުމުގެ ސަބަބުން ކަމަށް އެ ބަޔާނުގައި ވެ އެވެ.

އެ މައްސަލަ ފާހަގަވުމުން ވަގުތުން އެޑްމިޝަން ބަންދުކޮށް، ޑިވަލޮޕަރުންނަށް އެކަން އަންގައި އިސްލާހު ކޮށްފައިވާ ކަމަށް އެ ސްކޫލުން ބުންޏެވެ.

"...މިދިޔަ 14 އަހަރު ތެރޭގައި އަޅުގަނޑުމެން އަބަދުވެސް މި ގެންދަނީ ރާއްޖޭގެ އަހުލާގީ އަދި ދީނީ ހަމަތައް ހިފަހައްޓައި ގާނޫނާއި ގަވައިދުތަކަށް ހުރުމަތްތެރިކޮށް ހިތައި އިސްލާމީ އުސޫލުތައް ދަމަހައްޓަމުން،" ޣިޔާސުއްދީން އިންޓަނޭޝަނަލް ސްކޫލްގެ ބަޔާނުގައި ބުންޏެވެ.

ޖީއައިއެސް އިން ބުނިގޮތުގައި އެ ސްކޫލްގެ އެޑްމިޝަނަށް އަލުން ހުޅުވާލާނީ އަންނަ އަންގާރަ ދުވަހުގެ ހެނދުނު 8:00 ގަ އެވެ.