މައްސަލަ ބޮޑުވި އަރަބިއްޔާގެ ޕީޓީއޭ އުވާލައި، އާ މެމްބަރުން ހޮވައިފި

މައްސަލަ ބޮޑުވި އަރަބިއްޔާ ސްކޫލުގެ ޕީޓީއޭ އެޑިއުކޭޝަން މިނިސްޓްރީން އުވާލައި، އާ ކޮމިޓީއެއް އުފައްދައިފި އެވެ.

މިނިސްޓަރު ޑރ. އިސްމާއިލް ޝަފީއު "މިހާރު" އަށް ވިދާޅުވީ، ޕީޓީއޭއަކީ ސްކޫލު ހަރުދަނާކުރުމުގައި މުހިއްމު ރޯލެއް އަދާކުރާ ބައެއް ކަމަށެވެ.

އެހެންވެ، ގާބިލް ބަޔަކާއެކީގައި ކުރިއަށް ގެންދިއުމަކީ މަސްލަހަތަށް ވެސް ރަނގަޅު ކަމަކަށް ވާތީ، އަރަބިއްޔާގައި އާ ޕީޓީއޭ ކޮމިޓީއެއް އުފައްދަން މިދިޔަ ނޮވެމްބަރު 22 ގައި އެ ސްކޫލަށް އެންގި ކަމަށް އޭނާ ވިދާޅުވި އެވެ.

އެއާ އެއްގޮތަށް، އެ ސްކޫލުން ވަނީ ޕީޓީއޭއަށް އާ މެމްބަރުން ހޮވައި، އެކަން މިނިސްޓްރީއަށް މިދިޔަ ޑިސެމްބަރު 13 ގައި އަންގައިފަ އެވެ.

ކޮންމެ ދިރާސީ އާ އަހަރަކަށް ހޮވާ ޕީޓީއޭގެ ނައިބު ރައީސަކަށް މި ފަހަރު ހޮވުނީ ޔޫސުފް އަބްދުﷲ އެވެ. އޭނާ ވަނީ، އަންނަ މަހު ބާއްވާ މަޖިލިސް އިންތިހާބުގައި ނައިފަރު ދާއިރާއަށް ކުރިމަތިލައިފަ އެވެ.

އަރަބިއްޔާގެ ޕީޓީއޭގެ މައްސަލަ މީގެ ކުރިން ވެސް ބޮޑުވި އެވެ. އެ ސްކޫލުން ކުރިން ބޭނުންކުރި އިމާރާތް ބާވެ، ގެއްލުން ލިބިފައިވާތީ ޕީޓީއޭގެ ނަމުގައި ސްކޫލަށް ނޭނގި ޕްރެސް ކޮންފަރެންސްތައް ވެސް ބޭއްވި އެވެ.