މަރުވެފައި އޮއްވައި ފެނުނީ ޑްރަގްގެ މައްސަލައެއްގައި 25 އަހަރުގެ ޖަލުހުކުމެއް ކޮށް، ދޫކޮށްލާފައި ހުރި މީހެއް!

ބަނޑޭރިކޮށީގެ އެޕާޓްމެންޓެއްގައި މަރުވެފައި އޮއްވައި އިއްޔެ ހަވީރު ފެނުނު މީހާ އަކީ 25 އަހަރުގެ ޖަލު ހުކުމެއްގައި ހުރި ނަމަވެސް، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަހު ދުވަސްކޮޅު މާފު ދީ، ދޫކޮށްލާފައި ހުރި މީހެއްކަން އެނގިއްޖެ އެވެ.

"މިހާރު" އަށް އެނގިފައިވާ ގޮތުގައި އެ އެޕާޓްމަންޓުން ފެނުނީ ގދ. ހޯނޑެއްދޫ، ހައްމާދު ސައީދު، 30، އެވެ.

އެ ރަށުން "މިހާރު" އާ ވާހަކަ ދެއްކި މީހަކު ބުނީ، ހައްމާދު ދިރިއުޅެނީ އޭނާގެ އާއިލާއާ އެކު މާލޭގައި ކަމަށެވެ. އެއީ މީގެ ކުރިން މަސްތުވާތަކެތީގެ ބޮޑެތި މައްސަލަތަކުގައި ހައްޔަރުކޮށްފައިވާ މީހެއް ކަމަށް ވެސް ހޯނޑެއްދޫން ވާހަކަ ދެއްކި މީހާ ބުންޏެވެ.

ދިރުވާލައިގެން ރާއްޖެ އަށް ޑްރަގް އެތެރެކުރަން އުޅެނިކޮށް އެއާޕޯޓުން ހައްމާދު އަތުލައިގަނެ، 25 އަހަރުގެ ޖަލު ހުކުމެއް ކޮށްފައިވާ ކަމަށާއި އޭނާ ދޫކޮށްލީ މިދިޔަ އަހަރު ކަމަށް ވެސް އެ ރަށުން ވާހަކަ ދެއްކި މީހާ ބުންޏެވެ.

ފުލުހުން ބުނީ އެ މީހާގެ ހަށިގަނޑު ފެނިފައިވަނީ ފުލުހުންނަށް ލިބުނު މައުލޫމާތަކާ ގުޅިގެން ބަނޑޭރިކޮށީގެ އެޕާޓްމެންޓެއް ބަލައި ފާސްކުރުމުން ކަމަށެވެ. އެއީ އެއްވެސް ބަޔަކު ދިރިނޫޅޭ އެޕާޓްމެންޓެއް ކަން ޔަގީން ވެފައިވާ ކަމަށް ވެސް ފުލުހުން ވަނީ ބުނެފަ އެވެ.

އެ މަރާ ގުޅޭ އިތުރު މައުލޫމާތުތައް ފުލުހުން އަދި ހާމައެއް ނުކުރެ އެވެ. އެއީ ކާކު ކަމާއި އެޕާޓްމަންޓު ބަލައި ފާސްކުރަން ޖެހުނު ސަބަބު ވެސް ފުލުހުން ނުބުނެ އެވެ.

ނަމަވެސް މައުލޫމާތު ލިބިފައިވާ ގޮތުގައި މަރުވެފައި އޮއްވާ ފެނުނު ހައްމާދުގެ ހަށިގަނޑު އޮތީ ވަރަށް ބޮޑަށް ކުނިވެފަ އެވެ. އޭނާ މަރުވެފައި އޮންނަތާ ތިން ދުވަސް ވެފައިވާ ކަން ވެސް ވަނީ އެނގިފަ އެވެ.

ފުލުހުން ވަނީ ހައްމާދުގެ ހަށިގަނޑު އޮޓޮޕްސީ ހަދަން ނިންމައިފަ އެވެ. އާންމު ގޮތެއްގައި މިފަދަ މަރުތަކުގައި އޮޓޮޕްސީ ހަދަނީ ފުލުހުންނަށް ޝައްކު ކުރެވޭ ކަންތައްތަކެއް ހުރުމުންނެވެ.