ދައުވާއަށް އިންކާރު ކުރަން، ޓެރަރިޒަމްގެ އަމަލެއް ނުހިންގަން: އަމީން

އެމްޑީޕީގެ ވެރިކަމުގައި މިހާރުގެ ރައީސް އަބްދުﷲ ޔާމީން ހައްޔަރުކުރި މައްސަލާގައި އޭރުގެ ޑިފެންސް މިނިސްޓަރު އަމީން ފައިސަލްގެ މައްޗަަށް ކުރާ ޓެރަރިޒަމްގެ ދައުވާއަށް އޭނާ މިއަދު އިންކާރުކުރައްވައިފި އެވެ.

ޖުލައި، 2010 ގައި ރައީސް ޔާމީން ހައްޔަރުކޮށް، ސިފައިންގެ ބެލުމުގެ ދަށުން ކ. އާރަށުގައި އެމަނިކުފާނު ބަންދުކޮށްފައި ބެހެއްޓި މައްސަލާގައި އަމީނަށް ކުރާ ޓެރަރިޒަމްގެ ދައުވާގެ އަޑުއެހުމުގައި އެ ދައުވާ އަށް އިންކާރުކޮށް، އޭނާގެ ވަކީލް އަބްދުﷲ ހަސީން ވިދާޅުވީ ޓެރަރިޒަމްގެ އެއްވެސް އަމަލެއް އަމީން ހިންގަވާފައި ނުވާނެ ކަމަށެވެ. އަދި އެއީ ތަހުގީގުކޮށް، ދައުވާ ކުރެވޭނެ މައްސަލައެއް ނޫން ކަމަށް ވެސް ވަކީލް ވިދާޅުވި އެވެ.

އެ މައްސަލައިގެ ލިޔުންތައް ލިބުނީ މިއަދު ކަމަށް ވާތީ އަމީންގެ ފަރާތުން އެ ދައުވާއަށް މިއަދު ތަފްސީލުކޮށް ޖަވާބެއް ނުދެ އެވެ. ތަފްސީލުކޮށް ޖަވާބު ދިނުމަށް އިތުރު ފުރުސަތަކަށް ހަސީން އެދިވަޑައިގަތުމުން ގާޒީ އިބްރާހިމް އަލީ ވަނީ 15 ދުވަހުގެ މުއްދަތެއް ދެއްވައިފަ އެވެ.

ދެން އޮންނަ އަޑުއެހުމެއްގައި ތަފްސީލުކޮށް ޖަވާބު ދިނުމާއި ދެ ފަރާތުން ހެކި ހުށަހެޅުން އޮންނާނެ ކަމަށް ގާޒީ ވިދާޅުވި އެވެ.

އަމީންގެ ބަލި ހާލަތު ހުރި ގޮތުން އޭނާ ރާއްޖެއިން ބޭރަށް ވަޑައިގަތުމުގެ ހުއްދަ އަށް އަމީންގެ ފަރާތުން މިއަދު ވެސް އެދުނެވެ. އަމީނަކީ ހިތުގެ ބަލި ހުރި ބޭފުޅެއް ކަމަށާއި އޭނާ އަށް ރާއްޖެއިން ފަރުވާ ކުރެވެން ނެތް ކަމަށް ޑޮކްޓަރުން ދިން ލިޔުންތައް ވެސް ކޯޓަށް ހުށަހަޅާފައިވާނެ ކަމަށް ހަސީން ވިދާޅުވި އެވެ.

ގާޒީ ވިދާޅުވީ އެކަމާ މެދު އިދާރީ ގޮތުން ގޮތެއް ނިންމުމަށް ފަހު އަންގަވާނެ ކަމަށެވެ.

އެ ދައުވާ ސާބިތުވެއްޖެ ނަމަ 10 އަހަރާއި 15 އަހަރާ ދެމެދުގެ ޖަލު ހުކުމެއް އަމީންގެ މައްޗަށް އަންނާނެ އެވެ.

ސިފައިންގެ ބެލުމުގެ ދަށުގައި ރައީސް ޔާމީން އޭރު ބަންދުކޮށްފައި ބެހެއްޓީ ސަރުކާރު ވައްޓާލަން އުޅުނުކަމުގެ ތުހުމަތުގައި ފުލުހުން އެމަނިކުފާނު ހައްޔަރު ކުރުމުން އެމަނިކުފާނު ދޫކޮށްލަން ސުޕްރީމް ކޯޓުން ވެސް އަންގާފައި ވަނިކޮށެވެ. ހިމާޔަތް ދޭން ކަމަށް ބުނެ ރައީސް ޔާމީންގެ ނުރުހުމުގައި އެމަނިކުފާނު ބަންދުކުރި މައްސަލާގައި އެމަނިކުފާނަށް ބަދަލު ދޭން ސިވިލް ކޯޓުން އޮތީ ހުކުމްކޮށްފަ އެވެ.

އެ މައްސަލަ ދައުލަތުން އިސްތިއުނާފް ކޮށްފައި ވަނިކޮށް، އެމަނިކުފާނު ވެރިކަމަށް ވަޑައިގެން ބަދަލުގެ ފައިސާ ބޭނުންފުޅުނުވާ ކަމަށް އެންގެވުމުން އިސްތިއުނާފްގެ މައްސަލަ ދައުލަތުން އަނބުރާ ގެނައީ އެވެ.