ކުރިން ވެސް ހީކުރެވުނު ގޮތަށް މިއީ ރޮނާލްޑޯގެ ފަހު ޔޫރޯ

ފްރޭންކްފާޓް (ޖުލައި 2) - މިހާރު ކުރިއަށްދާ ޔޫރޯ މުބާރާތަކީ، ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އޭނާގެ ކެރިއަރުގައި ކުޅޭނެ އެންމެ ފަހު ޔޫރޯ ކަން އޭނާ ކަށަވަރު ކޮށްދީފި އެވެ.

ރޭ ކުޅުނު ގަދަ 16 ގެ މެޗުގައި ސްލޮވީނިއާއާ ދެކޮޅަށް ޕެނަލްޓީ ޝޫޓައުޓް ކާމިޔާބު ކުރުމަށް ފަހު ޕޯޗުގަލްގެ އާރުޓީޕީ ޓީވީއަށް ދިން އިންޓަވިއުގައި ރޮނާލްޑޯ ވަނީ މިއަހަރުގެ މުބާރާތަކީ އޭނާގެ ފަހު ޔޫރޯ ކަން ހާމަކޮށްފަ އެވެ.

"އެއްވެސް ޝައްކެއް ނެތް ގޮތުގައި މިއީ އަހަރެންގެ ފަހު ޔޫރަޕިއަން ޗެމްޕިއަންޝިޕް،" ޔޫރޯ 2016 ކާމިޔާބުކުރި ޕޯޗުގަލް ޓީމުގެ ކެޕްޓަން ރޮނާލްޑޯ ބުންޏެވެ.

ރޭގެ މެޗުގެ އިތުރު ވަގުތުގައި ޕޯޗުގަލް އަށް ލިބުނު ޕެނަލްޓީ، ރޮނާލްޑޯ އަތުން ވަނީ ނާކާމިޔާބު ވެފަ އެވެ.

މިއަހަރުގެ މުބާރާތުގައި މިހާތަނަށް އަދި ލަނޑެއް ނުޖެހުނަސް، ރޮނާލްޑޯއަކީ ޔޫރޯ މުބާރާތުގެ ތާރީހުގައި ވެސް އެންމެ ގިނަ ގޯލު ޖަހާފައިވާ ކުޅުންތެރިޔާ އެވެ. އޭނާ ވަނީ މުބާރާތުގައި ޖުމްލަ 14 ގޯލު ޖަހައިފަ އެވެ.

މިއީ އުމުރުން 39 އަހަރުގެ ކެޕްޓަން ރޮނާލްޑޯ ކުޅޭ ރެކޯޑް ހަވަނަ ޔޫރޯ މުބާރާތެވެ. އޭނާ ވަނީ ޓީމު ކުއާޓާ ފައިނަލަށް ގެންދިޔުމުގައި މުހިއްމު ދައުރެއް އަދާކޮށްފަ އެވެ.

ކުއާޓާގައި އަންނަ ހުކުރު ދުވަހުގެ ރޭ ފްރާންސާ ދެކޮޅަށް ޕޯޗުގަލް ނުކުންނާނެ އެވެ.