ޣައްޒާގައި އެހީގެ ހުރިހާ މަސައްކަތެއް ހުއްޓިއްޖެ: އދ

އިޒްރޭލުން ކެނޑިނޭޅި ހަމަލާ ދެމުން ގެންދާ ފަލަސްތީނުގެ ޣައްޒާގައި އދ.ގެ އިން ކުރިއަށްގެންދާ އެހީ ފޯރުކޮށްދިނުމުގެ މަސައްކަތް ދީރުލް ބަލަހް ސަރަހައްދު ހުސްކުރަން އިޒްރޭލުން އެންގުމުގެ ސަބަބުން އެއްކޮށް ކަހަލަ ގޮތަށް ހުއްޓިއްޖެ އެވެ.

އދ.ގެ އިސް އޮފިޝަލަކު އޭއެފްޕީއަށް ވިދާޅުވީ އެހީ ފޯރުކޮށްދިނުމުގެ މަސައްކަތުގައި އުޅޭ މީހުންގެ ހަބަކަށް ވެފައިވާ ސަރަހައްދު ހުސްކުރަން އެންގުމުން ވަރަށް ގިނަ އޮޕަރޭޝަންތައް ހުއްޓާލަން ޖެހިފައިވާ ކަމަށެވެ.

އިޒްރޭލުގެ އަސްކަރިއްޔާއިން ހޯމަ ދުވަހު ބުނީ ދީރުއަލް ބަލަހްގައި އުޅޭ "ޓެރަރިސްޓުން" ނަށް އަމާޒުކޮށް، ހަމާސްގެ ބާކީ ހުރި "އިންފްރާސްޓްރަކްޗާ" ނައްތާލުމަށް މަސައްކަތް ކުރަމުން އަންނަ ކަމަށެވެ. އެހެންވެ އެ ސަރަހައްދުން ހުރިހާ އެންމެން ދިއުމަށް ވަނީ އަންގައިފަ އެވެ.

އދ.ގެ ހިއުމެނިޓޭރިއަން އެޖެންސީ (އޯސީއެޗްއޭ) އިން ބުނީ އދ. އާއި އެންޖީއޯގެ އެހީގައި މަސައްކަތްކުރާ 15 ތަނަކާއި އދ.ގެ ހަތަރު ގުދަނެއްގެ އޮޕަރޭޝަނަށް އިޒްރޭލުގެ އިންޒާރުތަކާ ހެދި ބުރޫއަރާފައިވާ ކަމަށެވެ.

އދއިން ޣައްޒާގެ އޮޕަރޭޝަންތައް ހުއްޓާލާފައިވާކަމަށް ބުނުމާ އެކު، ސެކްރެޓަރީ ޖެނެރަލް އެންޓޯނިއޯ ގުޓަރޭޒްގެ ތަރުޖަމާނު ސްޓެފަން ޑުޖާރިކް ވިދާޅުވީ ފަލަސްތީނު ރެފިއުޖީންނާ ބެހޭ އދ.ގެ އެޖެންސީން ފިޔަވަޅުތައް އެޅި ނަމަވެސް އޮޕަރޭޝަންތައް ކުރިއަށް ގެންދާ ކަމަށެވެ.

ހަމާސް އިން މިދިޔަ އަހަރުގެ އޮކްޓޫބަރު ހަތް ވަނަ ދުވަހު އިޒްރޭލަށް ހަމަލާދީ 1،199 މީހަކު މަރާލުމާ އެކު އިޒްރޭލުން ޣައްޒާއަށް ދެމުން ގެންދާ ހަމަލާތަކުގައި މިހާތަނަށް ފަލަސްތީނުގެ 40،435 މީހަކު ވަނީ ޝަހީދުވެފަ އެވެ.