ކޮންމެ ސީޒަނެއްގައި ކޯޗުން ބަދަލުވަނީ ކްލަބްގެ ޓެކްނިކަލް އެނަލިސިސްގެ މައްސަލައަކުން ނޫން

ކޮންމެ ސީޒަނެއްގައި ކޯޗުން ބަދަލު ކުރަން ޖެހުނަސް ކޯޗުން ހޯދުމުގައި ޓެކްނިކަލް އެނަލިލިސް ގޯސް ނޫން ކަމަށް މާޒިޔާގެ ޖެނަރަލް ސެކްރެޓަރީ އަބްދުﷲ ވައްހާބު ވިދާޅުވެއްޖެ އެވެ.

މިދިޔަ ތިން ސީޒަނުގައި ވެސް މާޒިޔާއިން ވަނީ ވަކި ހިސާބަކުން ކޯޗު ބަދަލުކޮށްފަ އެވެ.

ވައްހާބު ވިދާޅުވީ މާޒިޔާއިން އުއްމީދުތަކާ އެއްވަރަށް މަސައްކަތް ނުވަދެވިއްޖެނަމަ ކޮންމެ ހިސާބަކުން ވެސް ކޯޗު ބަދަލު ކުރަން ޖެހިދާނެ ކަމަށެވެ.

"ކޯޗު ބަދަލުވެދާނެ މުބާރާތް ފެށުމުގެ ކުރިން ވެސް. މެޗެއްގެ ރިޒަލްޓް އަންނަ ގޮތުން ވެސް ކޯޗަކު ބަދަލުވެދާނެ. އެއީ ކޯޗު ދަށްވެގެނެއް ނޫން،" ވައްހާބު ވިދާޅުވި އެވެ.

"އެ ވަގުތަށް އެންމެ ރަނގަޅު ޑެސިޝަން މާޒިޔާއިން ނަގާނެ. މި ގޮތަށް ނެގި ކޮންމެ ޑެސިޝަނެއްގައި މާޒިޔާ އަށް ވަނީ ކާމިޔާބު ވެފައި."

އޭނާ ވިދާޅުވީ އޭއެފްސީ ކަޕްގައި މާޒިޔާ އަށް ކުރިއަށް ނުދެވުނަސް ލޯކަލް މުބާރާތްތަކުގައި އެ ބަދަލުގެ ސަބަބުން ކާމިޔާބު ލިބޭ ކަމަށެވެ.

"ޓެކްނިކަލް އެނަލިލިސް ހެދުމުގެ އަޅުގަނޑުމެންގެ އެއްވެސް މައްސަލައެއް ނޫޅޭނެ،" ވައްހާބު ވިދާޅުވި އެވެ.

މާޒިޔާގެ އާ ކޯޗަކަށް، ސާބިއާގެ ޑްރެގަން ޑުކަނޮވިޗް ހަމަޖައްސައިފަ އެވެ. އުމުރުން 54 ގެ ޑުކޮނަވިޗަކީ މާޒިޔާ އަށް އިރުޝާދު ދޭ، ބިދޭސީ ހަ ވަނަ ކޯޗެވެ.

ރާއްޖޭގެ ފުޓްބޯޅަ ހުއްޓިފައިވާ ވަގުތު، އެ ޓީމާ ހަވާލުވި ޑުކަނޮވިޗަށް އެންމެ ފުރަތަމަ އޮތީ އޮކްޓޯބަރު މަހު ފަށާ އޭއެފްސީ ޗެލެންޖް ލީގެވެ.