ހައްޖު ކޯޕަރޭޝަން ހިންގާފައި އޮތީ އަހަރަކު 40 މިލިއަން ރުފިޔާގެ ގެއްލުމުގައި: ޝަކީލް

މޯލްޑިވްސް ހައްޖު ކޯޕަރޭޝަން މިހާތަނަށް ހިންގަމުން ދިޔައީ އަހަރަކު 40 މިލިއަން ރުފިޔާގެ ގެއްލުމުގައި ކަމުގައި ވިޔަސް، އާމްދަނީ އިތުރުކުރަން މިހާރު ފަށާފައިވާ މަސައްކަތްތަކާ އެކު ފައިދާ އިތުރު ކުރެވޭނެ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި ޝަކީލް ވިދާޅުވީ ފާއިތުވި 11 އަހަރުގެ ތެރޭގައި ހައްޖު ކޯޕަރޭޝަން ގެއްލުމުގައި ހިންގި ނަމަވެސް އެ ކުންފުނި ހަރުދަނާ ކުރުމަށް މި ސަރުކާރުން މަސައްކަތްތަކެއް ކުރަމުން އަންނަ ކަމަށެވެ.

ޝަކީލް ވިދާޅުވި ގޮތުގައި ކުރިން އެ ކުންފުނި ހިންގާފައިވަނީ އެތަން އުފެއްދި މަގްސަދާ އެއްގޮތަކަށް ނޫނެވެ. އޭނާ ވިދާޅުވީ އެ ކޯޕަރޭޝަން އުފެއްދީ ހެޔޮ އަގެއްގައި މީހުން ހައްޖަށް ގެންދިއުމާ އެކު ހައްޖަށް ދިއުމަށް މީހުން ދޭ ފައިސާ އިން އާމްދަނީ ލިބޭނެ އިތުރު ގޮތްތަކެއް ހޯދައި އިތުރަށް ހެޔޮ އަގެއް ހޯދުމަށް ކަމަށެވެ.

އެކަމަކު މިހާތަނަށް ކުންފުނިން ހިންގީ ހައްޖާއި އުމްރާއަށް މީހުން ގެންދާ ގްރޫޕެއްގެ ގޮތުގައި ކަމަށާއި އޭގެ ސަބަބުން ވަރަށް ބޮޑު ދަރަންޏެއް އެބަ އޮތް ކަމަށް އޭނާ ވިދާޅުވި އެވެ.

"ހައްޖު ކޯޕަރޭޝަން އުފެއްދި މަގްސަދަކާ އެެއްގޮތަކަށް ނޫން މިދިޔަ 11 އަހަރުގެ ތެރޭގައި ހިންގާފައި މިވަނީ. އެހެން ދަންނަވަން މިޖެހުނީ ހައްޖު ކޯޕަރޭޝަންގެ މަގުސަދެއް އެއީ ހެޔޮ އަގުގައި މީހުން ހައްޖަށް ގެންދިއުން. އޭގެ އިތުރުން ހައްޖަށް ދިއުމަށް ރައްޔިތުން މި ޖަމާކުރާ ފައިސާ އިން އާމްދަނީ ލިބޭނެ ގޮތްތަކެއް ހޯދައިގެން ކުޑަ އަގެއްގައި މި ހިދުމަތް ދިނުމުގެ މަސައްކަތް ކުރުން އޮންނަނީ،" ޝަކީލް ވިދާޅުވި އެވެ.

"30 މިލިއަނުން 40 މިލިއަނުން ކޮންމެ އަހަރަކު ގެއްލުމުގައި ހައްޖު ކޯޕަރޭޝަން ހިންގަމުން އައިސްފައި މިވަނީ،"

ޝަކީލް ވިދާޅުވީ ހައްޖަށް މީހުން ގެންދަން މިހާރު ކަނޑައަޅާފައިވާ އަގަކީ މީގެ 11 އަހަރު ކުރިން ކަނޑައަޅާފައިވާ އަގެއް ކަމަށެވެ. އެކަމަކު މިހާރު ސައުދީ އަރަބިއާގެ ސަރުކާރުން ވެސް ގިނަ ޓެކްސްތަކެއް ނަގަމުންދާއިރު، އެއާލައިން ޓިކެޓުގެ އަގު ބޮޑުވެ، އެކޮމޮޑޭޝަންގެ އަގު ބޮޑުވެފައިވާ ކަމަށް އޭނާ ވިދާޅުވި އެވެ.

"އެކަމަކު މިއިން އެއްވެސް ކަމަކަށް ސަމާލުކަން ދީފައިވާ ތަނެއް އަޅުގަނޑަކަށް ނުފެނޭ ހަވާލުވީއިރު ވެސް،" އެކަމުގައި ކަންބޮޑުވުން ފާޅު ކުރައްވައި، ޝަކީލް ވިދާޅުވި އެވެ.

ސަރުކާރަށް ވަރަށް ބޮޑަށް ބަރޯސާވެގެން މީގެ ކުރިން އެ ކޯޕަރޭޝަން ހިންގަމުން އައި ނަމަވެސް މިހާރު މަސައްކަތް ކުރަމުންދަނީ އޭރު ހިންގުމުގައި ހުރި ގޯސްތައް ބަލައި ރަނގަޅު ކުރުމަށް ކަމަށް އޭނާ ވިދާޅުވި އެވެ.

ޝަކީލް ވިދާޅުވީ އެ މަގާމު އޭނާއާ ހަވާލު ކުރައްވަމުން ރައީސް ޑރ. މުހައްމަދު މުއިއްޒު ވެސް އެދިވަޑައިގަތީ އެ ކުންފުންޏަކީ ފައިދާވާ އަމިއްލަ ފައި މައްޗަށް ތެދުވެފައިވާ ތަނަކަށް ހަދައިދިނުމަށް ކަމަށެވެ.

ހައްޖުގެ އަޅުކަމުގެ ކަންކަން އެންމެ ރަނގަޅު އަގެއްގައި ފޯރުކޮށްދެވޭނީ ވެސް އެތަނަކީ ފައިދާވާ ތަނަކަށް ބަދަލު ކުރެވިގެން ކަމަށް އޭނާ ތަކުރާރުކޮށް ވިދާޅުވި އެވެ.

ޝަކީލް ވިދާޅުވި ގޮތުގައި ރިއަލްއެސްޓޭޓްގެ ދާއިރާއަށް ވަނުމަށް އެ ކުންފުނިން މަސައްކަތް ކުރާ ސަބަބަކީ ވެސް އެއީ އެވެ.

ހުޅުމާލޭގައި ހައްޖު ކޯޕަރޭޝަނުން ހައުސިން މަޝްރޫއުއެއް ހިންގަން ނިންމައި، އެ އިމާރާތުގެ ޑިޒައިންގެ މަސައްކަތް ފަހި ދިރިއުޅުން ކޯޕަރޭޝަނާ މިހާރު ވަނީ ހަވާލުކޮށްފަ އެވެ. އެ ކުންފުނިން މިދިޔަ މެއި މަހު ވަނީ ހުޅުމާލެއިން ދެ ބިމެއް ގަނެފަ އެވެ. އޭގެ ތެރެއިން އެއް ބިމުގައި ނުވަ ފްލޯގެ އޮފީސް އިމާރާތެއް އެޅުމުގެ މަސައްކަތް މި މަހު ވަނީ ފަށައިފަ އެވެ. އެއީ 5،000 އަކަފޫޓުގެ ބިމެއްގަ އެވެ.

ޝަކީލް ވިދާޅުވީ ރިއަލްއެސްޓޭޓަކީ ރަނގަޅު އާމްދަނީއެއް ލިބޭނެ ދާއިރާއެއް ކަމަށެވެ. އަދި އިސްލާމިކް ޓޫރިޒަމް ފަދަ ރާއްޖެއަށް ރަނގަޅު އިތުރު ދާއިރާތައް އެބަ ހުރި ކަމަށާއި ކުރިއަށް އޮތް ދުވަސްތަކުގައި އާމްދަނީ އިތުރު ކުރުމަށް އެކި މަސައްކަތްތައް ކުރެވޭނެ ކަމަށް ވިދާޅުވި އެވެ.

އޭގެ ސަބަބުން ހައްޖަށް ދިއުމުގެ އަގު ހެޔޮވެގެން ދާނެ ކަމަށް އޭނާ ވިދާޅުވި އެވެ.

ހައްޖު ކޯޕަރޭޝަނުން މިހާރު ކުރިއަށް ގެންދާ އޮފީސް އިމާރާތުގެ މަޝްރޫއު ހަވާލު ކޮށްފައިވަނީ ކޮންޓްރެކްޓާ ފައިނޭންސް އުސޫލުން 79.1 މިލިއަން ރުފިޔާއަށް މެޑްޓެކް މޯލްޑިވްސް ޕްރައިވެޓް ލިމިޓެޑާ އެވެ. އެ މަސައްކަތް ހަވާލުކުރީ ދޮޅު އަހަރު ދުވަސް ތެރޭގައި ނިންމަން ޖެހޭ ގޮތަށެވެ.