ޓޫރިޒަމް ފުޅާކުރަން ދުރު އަތޮޅުތަކަށް ފްލައިޓް އިތުރުކުރަން ޖެހޭ: އެމްޔޫ މަނިކު

މާލެއާ ދުރު އަތޮޅުތަކަށް ޓޫރިޒަމް ފުޅާކުރަން އޮތް ހުރަހަކީ އެކަށީގެންވާ ވަރަށް ފްލައިޓް ދަތުރުތައް ނުކުރެވުން ކަމަށާއި ދުރު އަތޮޅުތަކަށް ފްލައިޓް އިތުރުކުރަން ޖެހޭ ކަމަށް ޓޫރިޒަމް އިންޑަސްޓްރީގެ މައި ޖަމިއްޔާ މޯލްޑިވްސް އެސޯސިއޭޝަން ފޯ ޓުއަރިޒަމް އިންޑަސްޓްރީ (މަޓީ)ގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) މިއަދު ވިދާޅުވެއްޖެ އެވެ.

ޓޫރިޒަމް ދުވަހާ ގުޅިގެން ޕީއެސްއެމުން ގެނެސްދިން ޕެނަލް ޑިސްކަޝަންގައި ރާއްޖޭގެ ޓޫރިޒަމް ދާއިރާގެ އެއް ބާނީ އެމްޔޫ މަނިކު ވިދާޅުވީ ޓޫރިޒަމް ދާއިރާ ފެށި އިރު ވެސް ކ. އަތޮޅުން އަރި އަތޮޅަށް ޓޫރިޒަމް ފުޅާކުރަން އޮތް އެންމެ ބޮޑު ގޮންޖެހުމަކީ ފަސޭހައިން އަވަހަށް ދަތުރު ނުކުރެވުން ކަމަށެވެ. ނަމަވެސް، ސީޕްލޭންގެ ދަތުރުތައް ފެށުމާ އެކު، ބާރު ސްޕީޑުގައި އަރި އަތޮޅުގައި ޓޫރިޒަމް ފުޅާ ކުރެވުނު ކަމަށް ވިދާޅުވި އެވެ.

އެމްޔޫ މަނިކު ވިދާޅުވި ގޮތުގައި ރާއްޖޭގެ އެހެން އަތޮޅުތަކަށް ވެސް ޓޫރިޒަމް ކުރިއަށް ގެންދަން އޮތް ގޮންޖެހުމަކީ ދަތުރުފަތުރު ކުރުމަށް ހުރި ހުރަސްތަކެވެ.

"ހެލިކޮޕްޓަރު ސީޕްލޭން ދުއްވަން ފެށީމާ މިކަން ހިނގައިގަތީ. ހަމަ އެގޮތަށް ރާއްޖޭގެ ދުރު އަތޮޅުތަކުގައި ވެސް ހިނގައި ނުގަންނާނެ [ދަތުރު ގިނަ ނުކޮށް]. އަޅުގަނޑުމެން އެއާޕޯޓު ހަދައިފިން. އެކަމަކު ހެދިޔަސް އެ ތަނަކަށް ފްލައިޓެއް ނުދޭ. އެ ތަނަށް ފްރިކުއެންޓް ފްލައިިން ހެދިއްޖިއްޔާ ނޫނީ ހިނގައި ނުގަންނާނެ،" ރާއްޖެ އަށް ޓޫރިޒަމް ތައާރަފު ކުރުމުގައި ބުރަ މަސައްކަތްތަކެއް ކުރެއްވި އެމްޔޫ މަނިކު ވިދާޅުވި އެވެ.

އޭނާ ވިދާޅުވީ، ޓޫރިޒަމް ހިނގައިގަންނަން މަގު ފަހިވާނީ ދަތުރު ކުރެވޭނެ ގޮތްތައް ފަހިވެގެން ކަމަށެވެ. ގއ. އަދި ގދ. އަތޮޅު ހިސާބުގައި ރިސޯޓުތައް ހިންގަނީ ވަރަށް ގިނަ ދަތިތަކާ އެކު ކަމަށް ވިދާޅުވި އެވެ.

އެ ހިސާބުތަކުގައި ރިސޯޓުތައް އިތުރު ކުރެވޭނީ، އެމްޔޫ މަނިކު ދެކެވަޑައިގަންނަވާ ގޮތުގައި، ކޮންމެ ދުވަހަކު ތިން ހަތަރު ފްލައިޓުގެ ދަތުރުތަކުންނެވެ.

އޭނާ ވިދާޅުވީ، މިކަމަށް ހައްލުތަކެއް ހޯދަން މަސައްކަތް ކުރުން ވަރަށް މުހިއްމު ކަމަށެވެ.

"ކޮމާޝަލީ ފީޒަބަލްއެއް ނުވޭ މިކަމެއް. އެއާޕޯޓުތައް އެޅިއަސް، އެންމެ ދެ ފްލައިޓުން ކިހިނެއްތޯ މިކަން ކުރެވޭނީ. ކަނެކްޓިވިޓީ ވަރަށް މުހިއްމު،" އޭނާ ވިދާޅުވި އެވެ.

އެ ޕެނަލްގައި އިންނެވި ޓޫރިޒަމް ދާއިރާގެ ތަޖުރިބާކާރު އަދި ކްރައުން އެންޑް ޗަމްޕާގެ ހިއްސާދާރު، ހުސައިން އަފީފު ވިދާޅުވީ، ހުސް އެކަނި އެއާޕޯޓެއް އެޅިއަސް މައްސަލައަށް ހައްލެއް ނުލިބޭ ކަމަށެވެ. އެއާޕޯޓު ފުރިހަމައަށް ހިންގޭނެ ގޮތްތަކެއް ވެސް ހޯދަން ޖެހޭ ކަމަށް އޭނާ ވިދާޅުވި އެވެ.

"ވަރަށް މުހިއްމު ކަމެއް އަޅުގަނޑުމެން މިކަމުގައި ޒިންމާ ނެގުން. ހުސް އެކަނި އެއާޕޯޓެއް ހެދިއަކަސް މި ކަމެއް ނުވާނެ. އެ އާޕޯޓެއް ހިންގޭނެ ގޮތެއް ވެސް ރާވަން ޖެހޭނެ،" ޗަމްޕާ އަފީފު ވިދާޅުވި އެވެ.