ވިންޓާ ސީޒަނަށް އެމްއޭސީއެލް އިން އާ ބެގޭޖް ހޭންޑްލިން ސިސްޓަމެއް ތައާރަފުކުރަނީ

މި އަހަރުގެ ވިންޓާ ސީޒަނަށް ތައްޔާރުވަމުން އަންނައިރު، ވެލާނާ އިންޓަނޭޝަނަލް އެއާޕޯޓުގައި އާ ބެގެޖް ހެންޑްލިން ސިސްޓަމެއް ތައާރަފްކުރުމަށް މަސައްކަތް ކުރާ ކަމަށް ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު އިއްޔެ ވިދާޅުވެއްޖެ އެވެ.

އެ ކުންފުނިން ވިންޓާ ސީޒަނަށް ތައްޔާރުވުމުގެ ގޮތުން، އޮޕަރޭޝަން ޑިވިޝަނާ އެކު ބޭއްވި ބައްދަލުވުމުގައި ޝަރީފު ވިދާޅުވީ އެ ސިސްޓަމްގެ ސަބަބުން އެއާޕޯޓުގެ މަސައްކަތްތައް މިހާރަށް ވުރެ ހަލުއިވެ، ފަސިންޖަރުންނަށް ދޭ ހިދުމަތުގެ ފެންވަރު ރަނގަޅު ކުރެވޭނެ ކަމަށެވެ.

ޝަރީފް ވަނީ އެމްއޭސީއެލްގެ އިކުއިޕްމަންޓް އަޕްގްރޭޑް ކުރުމާއި ހިދުމަތްތައް ރަނގަޅު ކުރުމަށް އިސްކަން ދެއްވާ ކަމަށް ވިދާޅުވެފަ އެވެ. އެ ކުންފުނީގެ ލަނޑުދަނޑިތަކާ އެއްގޮތްވާގޮތުގެ މަތިން މުވައްޒަފުންނާއި މެނޭޖްމަންޓް ގުޅިގެން މަސައްކަތްތައް ކުރިއަށް ގެންދާނެ ކަމަށް ވިދާޅުވި އެވެ.

އެމްއޭސީއެލް އިން ބުނި ގޮތުގައި މި ބައްދަލުވުމަކީ ކުރިއަށް އޮތް ޓޫރިސްޓް ސީޒަންގައި އެއާޕޯޓް އޮޕަރޭޝަންސްއަށް ދިމާވާ ގޮންޖެހުންތައް މަޝްވަރާކޮށް، އެ ކަންކަން ހައްލުކުރަން މަސައްކަތްތައް އިންތިޒާމް ކުރުމަށް ބޭއްވި ބައްދަލުވުމެކެވެ.

މި ބައްދަލުވުމަގައި އެމްއޭސީއެލްގެ އެމްޑީ ޝަރީފުގެ އިތުރުން ޑެޕިއުޓީ މެނޭޖިން ޑިރެކްޓަރު މުޖްތަބާ ލަތީފް އަދި ކުންފުނީގެ އިސް ބޭފުޅުން ބައިވެރިވެވަޑައިގެންނެވި އެވެ.

އެމްއޭސީއެލްއިން ބުނީ ކުރިއަށް އޮތް ތަނުގައި މިފަދަ އިތުރު މަޝްވަރާތައް ކުންފުނީގެ ހިއްސާދާރުންނާ އެކު ބޭއްވުމަށް ވަނީ ނިންމާފައިވާ ކަމަށެވެ.

ވެލާނާ އިންޓަރނޭޝަނަލް އެއާޕޯޓުން ޓޫރިސްޓް ޕީކް ސީޒަނަށް ތައްޔާރުވުމަށް އަންނަނީ ގިނަ މަސައްކަތްތަކެއް ކުރަމުންނެވެ. އޭގެ ތެރޭގައި މިހާރު ބޭނުންކުރާ ޓާމިނަލް ސަރަހައްދު ތަނަވަސްކޮށް، ކާރުބާރޫބޮޑުވުމުގެ މައްސަލަ ހައްލުކުރުމުގެ މަސައްކަތް ވަނީ ފަށައިފަ އެވެ.