މި ހުތޫރަތްތެރި ދަނޑިވަޅުގައި އިންޑިއާގެ އެހީއަކީ ވަރަށް ބޮޑު ލުޔެއް: ހަލީލް

ރާއްޖޭގެ އިގުތިސާދު މިހާރު އޮތް ހުތޫރަތްތެރި ހާލަތަށް ބަލާއިރު ރައީސް ޑރ. މުހައްމަދު މުއިއްޒުގެ ދަތުރުފުޅާ އެކު، އިންޑިއާ އިން ދިން އެހީތަކަކީ ވަރަށް ބޮޑު ލުޔަކަށް ވާނެ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.

ރައީސް މުއިއްޒު އިންޑިއާ އަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، އިންޑިއާ އިން ރާއްޖެއަށް 400 މިލިއަން އެމެރިކާ ޑޮލަރުގެ ކަރަންސީ ސްވޮޕް ފެސިލިޓީއެއް ދިނުމުގެ އެއްބަސްވުމެއްގައި އިއްޔެ ވަނީ ސޮއިކޮށްފަ އެވެ. އެ 400 މިލިއަން ޑޮލަރުގެ ސްވޮޕްގެ އިތުރުން 30 ބިލިއަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގޭނެ އެވެ.

"އެހެންވީމާ 760 މިލިއަން ޑޮލަރު އިކުއިވެލެންޓުކޮށް، ކަރަންސީ ސްވޮޕްގައި އެ ވަނީ ސޮއިކުރެވިގެން ގޮސްފައި. އެހެންވީމާ ވަރަށް ބޮޑަށް މިކަމުގެ ސަބަބުން، ޑޮލަރަށް މި އޮތް ބަރޯސާވުން ނުވަތަ ދަތިކަމަށް ހައްލުތަކެއް އަންނާނެ،" މިދިޔަ ހަފުތާގައި ފޮރިން މިނިސްޓަރުކަމާ ހަވާލުވެވަޑައިގެންނެވި ކުރީގެ ހެލްތު މިނިސްޓަރު ހަލީލް މީޑިއާއާ ވާހަކަ ދައްކަވަމުން ވިދާޅުވި އެވެ.

އޭނާ ވިދާޅުވީ، އިންޑިއާގެ އިންސްޓެންޓް ޕޭމެންޓް ސިސްޓަމް، ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ރުޕޭ ކާޑު ރާއްޖެ އަށް އިއްޔެ ތަރާއަފު ކުރުމާއި ފްރީ ޓްރޭޑް އެގްރީމަންޓެއްގައި ސޮއިކުރަން ދެ ގައުމުން އެއްބަސްވުމަކީ ވެސް ވަރަށް ބޮޑު ކުރިއެރުމެއް ކަމަށެވެ.

މިނިސްޓަރު ވިދާޅުވިގޮތުގައި، މި ހުތޫރަތްތެރި ދަނޑިވަޅުގައި މިއީ ދިވެހި ރައްޔިތުންނަށާއި ރާއްޖޭގެ އިގުތިސާދަށް ވެސް ލިބޭނެ ލުޔެކެވެ.

ހަލީލް ވިދާޅުވީ، ރައީސް މުއިއްޒު އިންޑިއާ އަށް ކުރައްވަމުން ގެންދަވާ ފުރަތަމަ ފުރަމާނަ ދަތުރުފުޅުގައި ދަންނަވާފައި ވަނީ ރާއްޖޭގެ އެއްވެސް ރައީސަކަށް ނުކިޔާ ވަރުގެ ހޫނު މަރުހަބާއެއް ކަމަށެވެ.

އޭގެ މައިގަނޑު ސަބަބަކީ އޭނާ ވިދާޅުވިގޮތުގައި، ރައީސް މުއިއްޒަކީ "ވަރަށް ހިތްތިރިކަމާ އެކު" ހުރިހާ ގައުމަކާ ވެސް ގުޅުން ބާއްވަން ބޭނުންފުޅުވާ ބޭފުޅެއްކަން އެ މަނިކުފާނުގެ މަސައްކަތްޕުޅުތަކުން ހާމަވެފައި ވުމެވެ.

އިންޑިއާ އަށް ތައުރީފު ކުރައްވަމުން މިނިސްޓަރު ވިދާޅުވީ، މިއީ އަބަދުވެސް ރާއްޖެ އަށް ވަރަށް ކައިރިން އެހީތެރިވާ ގައުމެއް ކަމަށެވެ. ދިވެހިންނަށް ކުރިމަތިވާ އެކި ކަންތައްތަކުގައި އަބަދުވެސް އެންމެ ގާތުން މަސައްކަތްކުރާ އެއް ގައުމަކީ އިންޑިއާ ކަމަށް އޭނާ ވިދާޅުވި އެވެ.

ހަލީލް ވިދާޅުވީ، ދެ ގައުމުގެ ދެމެދުގައި "ވިޝަން ޑޮކިއުމަންޓެއް" އެކުލަވާލާފައިވާ ކަމަށާއި އެއީ ދިވެހިންނަށް ވަރަށް ބޮޑަށް ފައިދާވާނެ ކަންތައްތައް ހިމެނޭ ކަމަށެވެ.

ރައީސް މުއިއްޒު މިދިޔަ އާދިއްތަ ދުވަހު އިންޑިއާ އަށް ފެއްޓެވި މި ދަތުރުފުޅުގެ ދިއްލީގެ އިވެންޓުތައް މިއަދު ނިންމަވާލައްވައި މުމްބާއީ އަށް ފުރަވާޑައިގަންނަވާނެ އެވެ. މުމްބާއީ އަށް ވަޑައިގަންނަވާނީ ތާޖުމަަހަލް އަށް ކުރައްވާ ޒިޔާރަތަށް ފަހު އެވެ.

ރައީސް މުއިއްޒު ވަނީ އިއްޔެ ވަނީ އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައިފަ އެވެ. ދެ ގައުމުގެ ރަސްމީ ވާހަކަތަކާއި އެއްބަސްވުންތަކުގައި ސޮއިކުރުމާއި ބައެއް ޕްރޮޖެކްޓްތައް ނިންމުމާއި ފެށުން ވެސް އިއްޔެ އިފުތިތާހުކުރި އެވެ. ރައީސް މުއިއްޒުގެ ދެކަނބަލުންގެ ޝަރަފުގައި އިންޑިއާގެ ރައީސް ދެއްވި ރަސްމީ ޖާފަތް ވެސް ރޭ ބޭއްވި އެވެ.

ރައީސްގެ ދަތުރުފުޅުގެ ފަހު މަންޒިލަކީ ބެންގަލޫރެވެ. މުމްބާއީ އާއި ބެންގަލޫގައި މައިގަނޑު ގޮތެއްގައި އޮންނާނީ ރާއްޖޭގައި ހުރި ވިޔަފާރީގެ ފުރުސަތުތައް އިންޑިއާގެ ވިޔަފާރިވެރިންނަށް ކިޔައި ދިނުމެވެ.