ވިޔަފާރި ފްރޮމޯޓްކުރުމުގެ ފަހު މަންޒިލެއްގެ ގޮތުގައި ރައީސް ބެންގަލޫރަށް

ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ރާއްޖޭގެ ވިޔަފާރި ޕްރޮމޯޓްކުރުމުގެ ފަހު މަންޒިލެެއްގެ ގޮތުގައި ދެންމެ ބެންގަލޫރަށް ވަޑައިގެންފި އެވެ.

ރައީސް މުއިއްޒު އިންޑިއާއަށް ކުރައްވަމުން ގެންދަވާ ފުރަތަމަ ފުރަމާނަ ދަތުރުފުޅުގެ ތެރެއިން އެމަނިކުފާނު އިންޑިއާއަށް ވަޑައިގަތުމުން އެ ގައުމުގެ ސަރުކާރުން ވަނީ ހޫނު މަރުހަބާއެއް ދަންނަވައިފަ އެވެ.

މާދަމާ ނިންމަވާލައްވާ މި ދަތުރުފުޅުގެ އެންމެ ފަހު މަންޒިލެއްގެ ގޮތުގައި ބެންގަލޫރަށް ވަޑައިގެންނެވިއިރު މި ތަނުގައި ބިޒްރަސް ފޯރަމެއް ބާއްވަން ވަނީ ނިންމައިފަ އެވެ. ބެންގަލޫރަކީ ގިނަ އަދަދެއްގެ ވިޔަފާރިވެރިން އުޅޭ ސިޓީއެކެވެ.

އެ ފޯރަމަކަށް ފަހު، އެތަނުގައި އުޅޭ ދިވެހިންނާ ވެސް ރައީސް ބައްދަލުކުރައްވާނެ އެވެ.

ރައީސް ބެންގަލޫރަށް ވަޑައިގެންނެވިއިރު މިދިޔަ ހޯމަ ދުވަހު އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި ރައީސް ވަނީ ބެންގަލޫރުގައި ދިވެހި ކޮންސިއުލޭޓެއް ގާއިމުކުރުމަށް ވެސް މަޝްވަރާ ކުރައްވައިފަ އެވެ.

ބެންގަލޫރުގައި ގިނަ އަދަދެއްގެ ދިވެހި ދަރިވަރުން ވެސް ކިޔަވަމުން އަންނައިރު އެ ސިޓީއަށް ސިއްހީ އެކި ބޭނުންތަކަށް ދާ ދިވެހިންގެ އަދަދު ވެސް ވަނީ ވަރަށް ބޮޑުތަނުން އިތުރުވެފަ އެވެ.

އެމަނިކުފާނު ވަނީ އިއްޔެ މުމްބާއީގައި ރާއްޖޭގެ ވިޔަފާރި އާއި ޓޫރިޒަމް ޕްރޮމޯޓް ކުރައްވައިފަ އެވެ. ބޮލީވުޑުގެ މަޝްހޫރު ތަރިން ވެސް ބައިވެރިވި މި އިވެންޓުގައި ރައީސް މުއިއްޒު ވަނީ ރާއްޖޭގައި ބޮލީވުޑްގެ ފިލްމުތައް ޝޫޓްކުރުމަށް އިންޑިއާގެ ފިލްމީ އިންޑަސްޓްރީއަށް ދައުވަތުދީފަ އެވެ.

ރައީސް ވިދާޅުވީ މި އަހަރުގެ މިހާތަނަށް އެކަނިވެސް އިންޑިއާ އިން އެއްލައްކައާ ގާތްކުރާ އަދަދަކަށް ޓޫރިސްޓުން ރާއްޖެ އަށް ޒިޔާރަތް ކޮށްފައިވާ ކަމަށާއި އޭގެ ސަބަބުން ދެ ގައުމުގެ ގުޅުން ވަރަށް ބޮޑަށް ބަދަހިވަމުން އަންނަ ކަމަށެވެ.

މިދިޔަ އާދިއްތަ ދުވަހު ރައީސް އިންޑިއާއަށް ފެއްޓެވި ދަތުރުފުޅުގައި ވަނީ ބޮޑުވަޒީރު މޯދީއާ ބައްދަލުކުރައްވައި ދެ ގައުމުގެ ރަސްމީ ވާހަކަތައް ވެސް ނިއު ދިއްލީގައި ބާއްވައިފަ އެވެ.

ރާއްޖެއާ އަބަދުވެސް ގާތް ގުޅުމެއް ބާއްވަމުން އަންނަ އިންޑިއާ އިން ވަނީ ކުރިއަށް އޮތްތަނުގައި ވެސް ރާއްޖެއަށް އެކި ރޮނގުތަކުން ވެދެވެން އޮތް އެހީތެރިކަން ފޯރުކޮށްދެވޭނެ ކަމުގެ ޔަގީންކަން ދީފަ އެވެ.

ރައީސް އާއި ބޮޑުވަޒީރު މޯދީގެ ބައްދަލުކުރެއްވުމަށް ފަހު ދެ ބޭފުޅުން އެކުގައި ދެއްވި މީޑިއާގައި ސްޓޭޓްމަންޓުގައި ރައީސް ވިދާޅުވީ އިންޑިއާއަކީ ރާއްޖޭގެ ޓޫރިޒަމް ސިނާއަތުގައި މުހިއްމު ދައުރެއް އަދާކުރާ ގައުމެއް ކަމަށެވެ. އެ ގައުމުން އިތުރު ޓޫރިސްޓުންނަށް މަރުހަބާ ކިޔާ ކަމަށް ރައީސް ވިދާޅުވި އެވެ.

ދިއްލީގައި ބޭއްވި ބިޒްނަސް ފޯރަމްގައި ވެސް ރައީސް ވަނީ ރާއްޖޭގެ ޓޫރިޒަމް ދާއިރާ ތަރައްގީކުރުމުގެ އިތުރުން އާމްދަނީ ލިބޭނެ އިތުރު ކަންކަން ތައާރަފުކުރެއްވުމުގެ ޝައުގުވެރިކަން ފާޅުކުރައްވައިފަ އެވެ. އޭގެ ތެރޭގައި ފައިނޭންޝަލް ސާވިސް އާއި މެރިޓައިމް އަދި ޑިޖިޓަލް އިކޮނޮމީ ފަދަ ދާއިރާތަކުން ކުރިއެރުމަށް އިންޑިއާގެ އެހީތެރިކަން ބޭނުންވާކަމަށް ރައީސް ވިދާޅުވި އެވެ.

ދިއްލީ އާއި މުމްބާއީގައި ބޭއްވި ބިޒްނަސް ފޯރަމްތަކުގައި ވެސް އެގައުމުގެ ގިނަ އަދަދެއްގެ ވިޔަފާރިވެރިން ބައިވެރިވި އެވެ.

ރައީސްގެ މި ދަތުރުފުޅުގެ ތެރެއިން ވަނީ އިންޑިއާ އިން ރާއްޖެއަށް 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއްގައި ސޮއިކޮށްފަ އެވެެ. އިގްތިސާދީ ނުތަނަވަސް ކަމެއް އޮތް މި ދަނޑިވަޅުގައި އެފަދަ އެހީތެރިކަމެއް އިންޑިއާ އިން ވުމުން ވަރަށް ބޮޑު ލުޔަކަށް ވާނެ ކަަމަށް ރައީސާ އެކު އިންޑިއާގައި ހުންނެވި ފޮރިން މިނިސްޓަރު އަބްދުﷲ ހަލީލް ވެސް ވިދާޅުވެ އެވެ. އޭގެ ސަބަބުން ޑޮލަރަށް ބަރޯސާވުން ނުވަތަ ދަތިކަމަށް ހައްލު އަންނާނެ ކަމަށް އޭނާ ވިދާޅުވި އެވެ.

އޭގެ އިތުރުން އިންޑިއާގައި ގިނަ ބަޔަކު ބޭނުންކުރާ ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ބޭނުންކުރާ ރޫޕޭ ކާޑު ރާއްޖޭގައި ބޭނުންކުރެވޭ ގޮތް ވެސް ވަނީ ހަދައިފަ އެވެ. އޭގެ ސަބަބުން ވެސް ރާއްޖޭގެ ޓޫރިޒަމަށް ރަނގަޅު ފައިދާއެއް ކުރާނެ ކަމަށް ސަރުކާރުން ބުނެ އެވެ.