އެންމެ ބޮޑު އިސްކަމެއް އޮތީ ދެ ގައުމުގެ ވިޔަފާރީގެ ގުޅުން ބަދަހިކުރަން: ހައި ކޮމިޝަނަރު

ރާއްޖެ އާއި އިންޑިއާއާ ދެމެދު ވިޔަފާރީގެ ގުޅުން ބަދަހި ކުރުމަކީ އިންޑިއާ ހައި ކޮމިޝަނުން އެންމެ އިސްކަންދޭ ކަންތައްތައް ކަމަށާއި އިންޑިއާގެ ވިޔަފާރިވެރިން ބޭނުންވާ ހުރިހާ އެހީތެރިކަމެއް ދެއްވާނެ ކަމަށް ރާއްޖޭގައި ހުންނަވާ އެ ގައުމުގެ ހައި ކޮމިޝަނަރު މުނޫ މަހާވަރު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު އިންޑިއާ އަށް ކުރައްވަމުން ގެންދަވާ ފުރަމާނަ ދަތުރުފުޅުގައި މުމްބާއީގައި ބޭއްވި ބިޒްނަސް ފޯރަމްގައި ހައި ކޮމިޝަނަރު ވިދާޅުވީ، ރާއްޖެ އާއި އިންޑިއާއާ ދެމެދު އިގުތިސާދީ ގުޅުން ގާއިމް ކުރުމަކީ އިންޑިއާ ސަރުކާރުން އެންމެ އިސްކަންދޭ ކަންތައް ކަމަށެވެ.

"އަޅުގަނޑުމެން ހައި ކޮމިޝަންގެ އެއްބާރުލުން ވިޔަފާރިވެރިންނަށް ލިބޭނެ. ތިޔަ ހުރިހާ ވިޔަފާރިވެރިންގެ ހިދުމަތުގައި އަޅުގަނޑުމެން 24 ގަޑިއިރު ތިބޭނަން. ދިވެހި ސަރުކާރާ ގުޅިގެން އަޅުގަނޑުމެން ކަންކަން ފަހިކޮށްދޭން މަސައްކަތް ކުރާނަން. ވިޔަފާރީގެ މި ގުޅުން ބަދަހިކުރުމަށްޓަކައި ތިޔަބޭފުޅުން ބޭނުންވާ ކަންކަން ހުށަހަޅުއްވާ،" މުނޫ ވިދާޅުވި އެވެ.

އޭނާ ވިދާޅުވި ގޮތުގައި ރާއްޖެ އާއި އިންޑިއާގެ ވިޔަފާރީގެ ގުޅުން ބަދަހިކުރުމަށްޓަކައި ކުރިއަށް އޮތް ތަނުގައި އިތުރު ގިނަ މަސައްކަތްތަކެއް ކުރާނެ އެވެ.

މިހާރު ވެސް ރާއްޖޭގައި އިންޑިއާގެ ގިނަ އިންވެސްޓްމަންޓުތަކެއް ކުރިއަށް ގެންދާކަން ހައި ކޮމިޝަނަރު ފާހަގަކުރެއްވި އެވެ. އޭގެ ތެރޭގައި ހާއްސަކޮށް ޓޫރިޒަމާއި ރިއަލް އެސްޓޭޓް ވިޔަފާރި އާއި ގެދޮރުގެ ވިޔަފާރި ހިމެނޭ ކަމަށް ވިދާޅުވި އެވެ.

"މިދިޔަ ހަތަރު އަހަތަށް ބަލާއިރު ރާއްޖެ އަށް އެންމެ ގިނަ ޓޫރިސްޓުން ޒިޔާރަތްކުރީ އިންޑިއާ އިން. ރާއްޖެ އާއި އިންޑިއާއާ ދެމެދު ދަތުރުކުރުމުގައި އޮތީ ދެ ގައުމަށް ވެސް ވިސާ ފްރީ ކޮށްދީފައި. ދިވެހިން ވެސް ތަފާތު ބޭނުންތަކަށް ރާއްޖެ އަށް އެބަ ދަތުރުކުރޭ. މިއީ ވަރަށް ބަދަހި ގުޅުމެއް،" ހައި ކޮމިޝަނަރު ވިދާޅުވި އެވެ.

އޭނާ ވިދާޅުވީ، ރައީސް މުއިއްޒު މިހާރު އިންޑިއާ އަށް ކުރައްވަމުން ގެންދަވާ ދަތުރުފުޅުގައި ދެ ގައުމުގެ ލީޑަރުންގެ މަޝްވަރާތަކުގައި ގުޅިގެން ކުރިއަށް ދާނެ ގޮތުގެ ތަސައްވުރެއް އެކުލަވާލާފައިވާ ކަމަށާާއި އޭގައި ވެސް އެންމެ ބޮޑު އިސްކަމެއް ދީފައި ވަނީ އިގުތިސާދު ނުވަތަ ވިޔަފާރީގެ ގުޅުން ބަދަހި ކުރުމަށް ކަމަށެވެ.

ރައީސް މުއިއްޒުގެ ދަތުރުފުޅުގައި މިހާރު ވަނީ ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމެއްގައި ވެސް ސޮއިކުރަން ނިންމައި އޭގެ ކަރުދާހުގެ މަސައްކަތްތައް ފަށަން އެއްބަސްވެފަ އެވެ.

އިންޑިއާގެ ވިޔަފާރިވެރިން ބުނާ ގޮތުގައި އެއީ ދެ ގައުމަށް ވެސް ވަރަށް ބޭނުންތެރި އަދި އަވަސް ނިންމުންތަކެއް ނިންމަން ޖެހޭ ކަމެކެވެ.

ރައީސް މުއިއްޒުގެ ދަތުރުފުޅުގައި ދިއްލީ އާއި މުމްބާއީގައި ވެސް ވަނީ ބިޒްނަސް ފޯރަމެއް ބާއްވައިފަ އެވެ. އަދި އިންޑިއާގައި ވިޔަފާރީގެ މައި ހަބުގެ ގޮތުގައި ބަލާ ބެންގަލޫރުގައި ވެސް މިއަދު ހަވީރު އެ މަނިކުފާނު ބައިވެރިވެވަޑައިގެން ބިޒްނަސް ފޯރަމެއް ބާއްވާނެ އެވެ. ރާއްޖޭގައި ހުރި ވިޔަފާރީގެ ފުރުސަތުތަކާއި ލުއިތައް އަދި ރާއްޖޭގެ އިގުތިސާދު ޑައިވާސިފައި ކުރަން ނިންމާފައިވާ ކަންކަން ދިވެހި ސަރުކާރުގެ ފަރާތުން ހުށަހަޅަ އެވެ. އަދި ދިވެހި ސަރުކާރުގެ އިސްވެރިން އިންޑިއާގެ ވިޔަފާރިވެރިންނާ ވަކިން ބައްދަލުކޮށް ވެސް ތަފާތު މަޝްވަރާތައް ބައްދަލުވުމުގެ ހަވާސާ ތެރެއިން ކުރިއަށް ގެންގޮސްފައި ވެ އެވެ.