ނަސްރުﷲ އަވަހާރަކޮށްލީ ހިޒްބުﷲ އިން ހަމަލާތައް ހުއްޓާލަން އެއްބަސްވި ދުވަހު

ލުބްނާންގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލި ހަމަލާ އިޒްރޭލުން ދިނީ ހަމަލާތައް ހުއްޓާލަން އިޒްރޭލާ އެކު އެއްބަސްވެފައިވާ ކަމަށް އެ ޖަމާއަތުން ލުބްނާން ސަރުކާރަށް އެންގި ދުވަހު ކަމަށް ސަރުކާރުގެ އޮފިޝަލަކާ ހަވާލާދީ އޭއެފްޕީން ބުނެފި އެވެ.

މިހާތަނަށް ހިޒްބުﷲ އިން ބުނަމުން އައިސްފައިވަނީ އިޒްރޭލަށް ހަމަލާ ދިނުން ހުއްޓާލާނީ ފަލަސްތީނުގައި ހަމާސްއާ ދެކޮޅަށް ކަމަށް ބުނެ އިޒްރޭލުން ދޭ ހަމަލާތައް ވެސް ހުއްޓާލަން އެއްބަސްވުމުން ކަމަށެވެ.

"ސެޕްޓެމްބަރު 27 ވަނަ ދުވަހު ހިޒްބުﷲ އިން ރަސްމީކޮށް ވަނީ، ހަމަލާތައް ހުއްޓުމަކަށް ގެނައުމަށް ބައިނަލްއަގުވާމީ ގޮތުން މަސައްކަތްކުރި ފަރާތްތަކުގެ ހުށަހެޅުންތައް ގަބޫލުކުރިކަން ގާނޫނު ހަދާ މަޖިލީހުގެ ނައިބު ރައީސް ނަބީހް ބޭރީއާ މެދުވެރިކޮށް އަންގާފައި،" އޭއެފްޕީއާ ވާހަކަ ދެއްކެވި އޮފިޝަލް ވިދާޅުވެފައިވެ އެވެ.

ހަމަލާތައް 21 ދުވަހަށް މެދުކަނޑާލުމުގެ ހުށަހެޅުން އެމެރިކާ އާއި އެ ގައުމުގެ އެކުވެރި ގައުމުތަކުން ހުށަހެޅި ދުވަހު ބޮޑުވަޒީރު ނަޖީބް މީގާތީ ހުންނެވީ އދ.ގެ އާންމު މަޖިލީހުގައި ބައިވެރިވެރިވެ ވަޑައިގަތުމަށް އެމެރިކާގެ ނިއު ޔޯކްގަ އެވެ. މަޝްވަރާތަކުގައި ހިމެނޭ ގައުމުތަކުގެ ވެރިންނަށް މީގާތީ މިކަން އެންގެވި ކަމަށާއި އެ ފަރާތްތަކުން އޭގެ ފަހުން ތިބީ އިޒްރޭލުގެ ޖަވާބެއްގެ އިންތިޒާރުގައި ކަމަށް އޭއެފްޕީން ބުންޏެވެ.

އެކަމަކު ހަމަ އެ ދުވަހު އިޒްރޭލުގެ ބޮޑުވަޒީރު ބިންޔާމީން ނަތަންޔާހޫ އދ. ގައި ވަނީ އިޒްރޭލުގެ ބޯޑަރުގެ ރައްކާތެރިކަން ކަށަވަރު ނުވަނީސް ހަމަލާތައް ނުހުއްޓާނެ ކަމަށް ވެސް ބުނެފަ އެވެ. ނަސްރުﷲ އަވަހާރަވި ހަމަލާ އިޒްރޭލުން ދިނީ ނަތަންޔާހޫގެ ވާހަކައަށް ފަހުންނެވެ.

އޭއެފްޕީއާ ވާހަކަ ދެއްކެވި އޮފިޝަލް ވިދާޅުވީ ނަސްރުﷲގެ މަރަށް ފަހު ލުބްނާން ސަރުކާރާއި ހިޒްބުﷲ އާ ދެމެދު އެއްވެސް މުއާމަލާތެއް ނުހިނގާ ކަމަށެވެ.

މިދިޔަ އަހަރުގެ އޮކްޓޫބަރު ހަތް ވަނަ ދުވަހު ހަމާސް އިން އިޒްރޭލަށް ދިން ހަމަލާތަކާ އެކު އިޒްރޭލުން ފަލަސްތީނުގެ ޣައްޒާއަށް ހަމަލާދޭން ފެށި ހަމަލާތަކާ ދެކޮޅު ހަދައި ހިޒްބުﷲ އިން ރައްދު ހަމަލާތައް ދޭން ފެށި އެވެ. މިކަން ހުއްޓުވަން ކަމަށް ބުނެ މިދިޔަ މަހުގެ 23 ވަނަ ދުވަހުން ފެށިގެން ހިޒްބުﷲ އާ ދެކޮޅަށް ލުބުނާނުގައި އިޒްރޭލުން ހަމަލާތައް އިތުރުކޮށް މިހާތަނަށް 1،190 އަށް ވުރެ ގިނަ މީހުން ވަނީ މަރާލައިފަ އެވެ. އަދި މިލިއަނަކަށްވުރެ ގިނަ މީހުން ވަނީ ގެދޮރު ދޫކޮށް އެހެން ތަންތަނަށް ދާން ޖެހިފަ އެވެ. -- އޭއެފްޕީ