ވިލާ ކޮލެޖާއި ސްކޫލަށް 17 އަހަރު، ގާސިމް ފަހުރުވެރިވާ މަސައްކަތެއް

އިލްމު ފެތުރުމުގައި ދިވެހި ގައުމު ބިނާކުރުމުގައި މިދިޔަ 17 އަހަރު ވިލާ ކޮލެޖާއި ވިލާ އިންޓަނޭޝަނަލް ސްކޫލުން ކުރި މަސައްކަތަށް އުފާކުރައްވައި، ފަހުރުވެރިވާ ކަމަށް ވިލާގެ ޗެއާމަން ގާސިމް އިބްރާހިމް މިއަދު ވިދާޅުވެއްޖެ އެވެ.

ވިލާ ކޮލެޖާއި ވިލާ ސްކޫލަށް 17 އަހަރު ފުރުމުގެ މުނާސަބަތާ ގުޅިގެން އެކްސްގައި ކުރެއްވި ޕޯސްޓެއްގައި ގާސިމް ވިދާޅުވީ، ރާއްޖޭގައި މަތީ ތައުލީމުގެ ޒަމާނީ ފެންވަރުގެ ފުރިހަމަ ފުރުސަތު ފޯރުކޮށްދިނުމުގެ މަގުސަދުގައި އޭނާ ފެއްޓެވި މަސައްކަތުގައި މަތީ ތައުލީމުގެ ފެންވަރު ރަނގަޅު ފުރުސަތުތަކެއް ދިވެހި ދަރިވަރުންނަށް ފޯރުކޮށްދީފައިވާ ކަމަށެވެ.

ދިވެހި އެތައް ދަރިވަރުންނަކަށް ހިލޭ މަތީ ތައުލީމަށް ކިޔަަވައި ދިނުމަށްޓަކައި ބޮޑެތި ހޭދަތަކެއް ކުރައްވަމުން ގެންދަވާ ގާސިމް ވިދާޅުވީ، ދުނިޔޭގެ ނަން ހިނގާ ޔުނިވާސިޓީތައް ގަބޫލުކުރާ އެންމެ މަތީ މިންވަރަށް އަދި ރާއްޖޭގެ ކޮލިފިކޭޝަން އޮތޯރިޓީ ގަބޫލުކުރާ އެންމެ މަތީ މިންގަނޑަށް ފެތޭ އޭލެވެލާއި ސެޓްފިކެޓް ލެވެލްގެ ޕްރޮގްރާމްތަކާއި ޑިޕްލޮމާ އާއި ބެޗެލާސް ޑިގްރީ އާއި މާސްޓާސް ޑިގްރީގެ ކޯސްތައް ވިލާ ކޮލެޖުން ފޯރުކޮށްދޭ ކަމަށެވެ. އެތައް ހާސް ދަރިވަރުން އެ ހިޔާވަހިކަމުގެ ދަށުން ތައުލީމް ހާސިލުކޮށް، އުޖާލާ ދިރިއުޅެމެއް އުޅެމުން އަންނަ ކަމަށް ވިދާޅުވި އެވެ.

"... ނަތީޖާ އެއްގެ ގޮތުން އިލްމު ފެތުރުމުގެ ތެރެއިން ދިވެހި ގައުމު ބިނާކުރުމާއި، ގައުމުގެ މާދަމާގެ މުސްތަގުބަލު އުޖާލާކުރުމުގައި ވިލާ ކޮލެޖާއި، ވިލާ އިންޓަނޭޝަނަލް ހައި ސްކޫލުން މިވަނީ، ދިވެހި ގައުމުގެ ނިސްބަތުން ނުހަނު ފުރިހަމަ ދައުރެެއް ވޭތުވި 17 އަހަރުގައި އަދާކޮށްދީފަކަމީ، އަޅުގަނޑު ނުހަނު އުފާކުރާ އަދި އެހާމެ ފަހުރިވެރި ކަމާ އެކު ފާހަގަކޮށްލަން ބޭނުންވާކަމެކެވެ،" ވިލާ ކޮލެޖާއި ވިލާ ސްކޫލުގައި ކިޔަވާ ދަރިވަރުންނަށް ދުވަހުގެ ތަހުނިޔާ ފޮނުއްވަމުން އެކްސްގައި ކުރެއްވި ޕޯސްޓުގައި ގާސިމް ވިދާޅުވި އެވެ.

އޭނާ ވަނީ ވިލާ ކޮލެޖް ހިންގުމުގައި ފުރަތަމަ ދުވަހުން ފެށިގެން ރެކްޓަރު ޑރ. އަހުމަދު އަންވަރު ކުރައްވާފައިވާ މަސައްކަތްތައް ފާހަގަކުރައްވައި ޝުކުރު އަދާކުރައްވަައިފަ އެވެ. އަދި ކޮލެޖުގެ ވައިސް ރެކްޓަރުންނާއި ޑީނުންނާއި ލެކްޗަރާއިންނާއި އިދާރީ މުވައްޒަފުންގެ މަސައްކަތަށް ވެސް ޝުކުރު އަދާކުރެއްވި އެވެ.

ދިވެހި ސަރުކާރުން ދޭ ހިލޭ ޑިގްރީ ޕްރޮގްރާމްތަކާއި ކިޔެވުމަށް ފަހި ފުރުސަތުތައް ނެތް ދުވަސްވަރުގައި ގާސިމްގެ އަމިއްލަ ހަރަދުގައި ވަނީ އެތައް ބަޔަކަށް ކިޔަވައިދީފަ އެވެ.