މަސްކުގެ ޕެޓިޝަންގައި ސޮއިކުރާ މީހުންނަށް ދުވާލަކު އެއް މިލިއަން ޑޮލަރު

އެމެރިކާގެ ރިޔާސީ އިންތިހާބުގައި ވޯޓުލާން "ސްވިންގް" ސްޓޭޓްތަކުން ރަޖިސްޓްރީކުރާ މީހުންގެ ތެރެއިން މީހަކަށް ރިޔާސީ އިންތިހާބާ ހަމަޔަށް ކޮންމެ ދުވަހަކު އެއް މިލިއަން ޑޮލަރު ދޭން، ޓެސްލާ އަދި ސްޕޭސްއެކްސްގެ ވެރިޔާ އިލޮން މަސްކް ހުށަހަޅައިފި އެވެ.

ރިޔާސީ އިންތިހާބުގައި ވާދަކުރައްވާ ކުރީގެ ރައީސް ޑޮނަލްޑް ޓްރަމްޕްގެ ކެމްޕެއިނަށް މިހާރު ވެސް 75 މިލިއަން ޑޮލަރު ހަދިޔާކޮށްފައިވާ މަސްކް އިއުލާނުކުރި ގޮތުގައި އެއް މިލިއަން ޑޮލަރު ލިބޭނީ "ގާނޫނުއަސާސީގެ ދިފާއުގައި" އޭނާ ހަދާފައިވާ އޮންލައިން ޕެޓިޝަންގައި ސޮއިކުރާ މީހުންގެ ތެރޭގައި ގުރުއަތު ލައިގެންނެވެ. އެކަމަކު އެ ފައިސާ ލިބޭނީ ޕެންސިލްވޭނިއާ، ޖޯޖިއާ، ނެވާޑާ، އެރިޒޯނާ، މިޝިގަން، ވިސްކޮންސިން އަދި ނޯތު ކެރޮލައިނާގެ ވޯޓުދޭ މީހުންނަށް އެކަނި ކަމަށް ވަނީ ކަނޑައަޅައިފަ އެވެ.

ބިލިއަނަރު މަސްކް ބުނީ ނޮވެމްބަރު 5 ގައި ރިޔާސީ އިންތިހާބު ފެށެންދެން ކޮންމެ ދުވަހަކު މި މީހުންގެ ތެރެއިން ކޮންމެވެސް އެކަަކު ގުރުއަތުން ހޮވައި އެއް މިލިއަން ޑޮލަރު ދޭނެ ކަމަށެވެ.

މިކަން އިއުލާނުކޮށްފައި ވާއިރު އޭނާ ބައިވެރިވި އެއްވުމަކަށް ދިޔަ މީހަކަށް ހޮނިހިރު ދުވަހު އެއް މިލިއަން ޑޮލަރުގެ ޗެކެއް ވަނީ ދީފަ އެވެ. އަދި އިއްޔެ ވެސް ހަމަ މިގޮތަށް މީހަކަށް އެއް މިލިއަން ޑޮލަރު ދިނެވެ.

އެކަމަކު މަސްކުގެ މި ނިންމުމާ ގިނަ ބަޔަކު ދަނީ ސުވާލު އުފައްދަމުންނެވެ.

ނައިބު ރައީސް ކަމަލާ ހެރިސްއަށް ތާއީދުކުރައްވާ، ޑިމޮކްރެޓިކް ޕާޓީއަށް ނިސްބަތްވާ ޕެންސިލްވޭނިއާގެ ގަވަރުނަރު ޖޯޝް ޝަޕީރޯ ވަނީ މަސްކުގެ މި ނިންމުމާ މެދު ވަރަށް ކަންބޮޑުވާ ކަމަށް ވިދާޅުވެފަ އެވެ.

ޝަޕީރޯ ވިދާޅުވީ މިއީ ތަހުގީގު ކުރަންޖެހޭ މައްސަލައެއް ކަމަށެވެ.

މިލިއަން ޑޮލަރު ލިބޭނީ ޕެޓިޝަންގައި ސޮއިކޮށް އަދި ވޯޓު ލާން ވެސް ރަޖިސްޓްރީކުރުމުން ކަމަށް ވާއިރު އިންތިހާބުގައި ވޯޓު ދިނުމަށް ބާރު އެޅުމުގެ ގޮތުން ފައިސާ ހުށަހެޅުމަކީ ގާނޫނީ ކުށެކެވެ. އަދި މަކްސް ހަދައިގެން އުޅޭ ޕެޓިޝަންގައި ސޮއިކުރާ މީހުން ހިއްސާކުރަންޖެހޭ މައުލޫމާތަށް ބަލާއިރު އިންތިހާބީ ކެމްޕޭންތަކުގައި ބޭނުންކުރެވިދާނެ ގިނަ މައުލޫމާތުތަކެއް ވެސް ހިމެނޭތީ އެކަމާ އުފައްދާ ސުވާލުތައް ގިނަ އެވެ.

މިއީ ވޯޓު ގަތުމަށް ފައިސާ ހުށަހެޅުމުގެ މައްސަލައެއް ކަމަށް ބެލެވިދާނެ ކަމަށް ތަޖުރިބާކާރުން ގަބޫލުކުރެ އެވެ. އެމެރިކާގެ ގާނޫނުތަކުގެ ދަށުން މިފަދަ ކުށަކަށް 10،000 ޑޮލަރުގެ ޖޫރިމަނާއެއް ނުވަތަ ފަސް އަހަރުގެ ޖަލު ހުކުމެއް ކަނޑައެޅިދާނެ އެވެ.

ފޯބްސް މަޖައްލާގެ އަންދާޒާތަކުން ދައްކާ ގޮތުގައި މަސްކްގެ މިލްކިއްޔާތުގައި 248 ބިލިއަން ޑޮލަރު (ތިން ޓްރިލިއަން ރުފިޔާ) އެބަހުއްޓެވެ. އޭނާ އަކީ މިހާރު ދުނިޔޭގެ އެންމެ މުއްސަނދި މީހާ އެވެ.