ރެއާލުގެ ދަނޑުގައި އެ ޓީމު ބަލިކޮށް ބާސާ ހަ ޕޮއިންޓުގެ ލީޑެއްގައި

ރެއާލް މެޑްރިޑުގެ އަމިއްލަ ދަނޑުގައި އެ ޓީމު ލަދުވެތި ގޮތަކަށް 4-0 އިން ބަލިކޮށް ބާސެލޯނާ އިން ސްޕެނިޝް ލީގުގެ އެއް ވަނައިގައި ހަ ޕޮއިންޓުގެ ލީޑެއް ނަގައިފި އެވެ.

އެންމެ ފަހުގެ ޔޫރަޕާއި، ސްޕެއިނުގެ ޗެމްޕިއަން ރެއާލުން މި ސީޒަނުގައި އެ ޓީމުގެ ވަރުގަދަ ސްކޮޑަށް ފްރާންސްގެ ތަރި ކީލިއަން އެމްބާޕޭ އިތުރުކޮށްފައިވުމާ އެކު ބެލެވިފައި އޮތީ އެ ޓީމުން ފަސޭހަކަމާ އެކު ލީގު ޑޮމިނޭޓްކުރާނެ ކަމަށެވެ.

އެކަމަކު ސީޒަނުގެ ފުރަތަމަ އަލް-ކްލަސިކޯ މެޗުގައި ބާސެލޯނާ މި ހޯދި މޮޅާ އެކު އެ ޓީމުން ވަނީ ލީގުގެ ފޭވަރިޓަކީ އެއީކަން ދައްކައިދީފަ އެވެ. ޗެމްޕިއަންސް ލީގުގައި މިދިޔަ ހަފުތާގައި ޖަރުމަނުގެ ގަދަބާރު ބެޔާން މިއުނިކް އަތުން 4-1 އިން މޮޅުވި ބާސެލޯނާ މިހާރު ވަނީ އެ މުބާރާތުގެ ފޭވަރިޓުންގެ ތެރޭގައި ވެސް ހިމެނިފަ އެވެ.

ރޭގެ މޮޅާ އެކު ބާސެލޯނާ ސްޕެނިޝް ލީގުގެ އެއް ވަނައިގައި އޮތީ 30 ޕޮއިންޓް ހަމަކޮށްގެންނެވެ. ރެއާލް ދެ ވަނައިގައި އޮތީ 24 ޕޮއިންޓާ އެކު އެވެ. ރޭގެ މެޗުން ރެއާލް މޮޅުވި ނަމަ އެ ޓީމަށް ބާސެލޯނާއާ ތިން ޕޮއިންޓަށް ކައިރިކުރެވުހީނެވެ. އަނެއްކޮޅުން ރޭގެ މެޗުން ރެއާލް ބަލިވުމުގެ ފައިދާ ނަގައި، ތިން ވަނައިގައި އޮތް ވިޔަރެއާލް ވަނީ 21 ޕޮއިންޓް ހަމަކޮށް ރެއާލްއާ ތިން ޕޮއިންޓަށް ކައިރިކޮށްފަ އެވެ.

ފުރަތަމަ ހާފުގައި ލަނޑެއް ނުފެނި ދިއުމަށް ފަހު ރޭގެ މެޗުގައި ބާސެލޯނާ އިން ލީޑު ނެގީ 54 ވަނަ މިނެޓުގައި ރޮބަޓް ލެވޮންޑޮސްކީ ޖެހި ގޯލުންނެވެ. އެ ގޯލަށް ފަހު ރެއާލަށް ހަމަޖެހިނުލެވެނީސް ލެވޮންޑޮސްކީ ވަނީ 56 ވަނަ މިނެޓުގައި ލީޑު ފުޅާކޮށްދީފަ އެވެ.

ރެއާލުން ފަހަތުން އަރަން މަސައްކަތްކުރި ނަމަވެސް އެ ޓީމުގެ އުއްމީދުތައް ފެނަށް ދިޔައީ 77 ވަނަ މިނެޓުގައި ލަމީން ޔަމާލް ބާސެލޯނާ އަށް ތިން ވަނަ ގޯލު ޖަހައިދިނުމުންނެވެ. މި ގޯލާ އެކު އުމުރުން 17 އަހަރުގެ ކުޅުންތެރިޔާ ވެފައިވަނީ އެލް-ކްލަސިކޯ މެޗެއްގައި ލަނޑު ޖެހި އެންމެ ހަގު ކުޅުންތެރިޔާ އެވެ. ބާސެލޯނާގެ މޮޅު ފުރިހަމަކޮށްދިނީ، މިދިޔަ ހަފުތާގައި ބެޔާން ކޮޅަށް ހެޓްރިކް ހެދި ރަފީނިއާ ވަނީ 84 ވަނަ މިނެޓުގައި ޖެހި ގޯލުންނެވެ.

މި މެޗުގައި ރެއާލުގެ ކޯޗު ކާލޯ އަންޗެލޮޓީ އެ ޓީމު ކުޅުވީ ޑިފެންސަށް އިސްކަންދީގެން، ބާސެލޯނާގެ ފަހަތުން ހުސްވާ ޖާގައަށް ދިގު ބޯޅައެއް ލުމަށް ފަހު އެމްބާޕޭ އާއި ވިނީޝިއަސް ޖޫނިއާގެ ހަލުވި ދުވެލީގެ ފައިދާ ނަގާ ގޮތަށެވެ. ފުރަތަމަ ހާފުގައި އެފަދަ ގިނަ ބޯޅަތަކެއް ކުރިއަށް ދިން ނަމަވެސް ބާސެލޯނާގެ ހައި ލައިންސް ޑިފެންސުން ވަނީ ރެއާލުގެ ފޯވާޑް ލައިން އޮފްސައިޑް މަޅީގައި ޖައްސައިފަ އެވެ.

"ފުރަތަމަ ހާފުގައި ކުޅުނީ ވަރަށް ރަނގަޅަށް. ގޯލު ޖެހުމާ ގާތަށް ދިޔަ އެކަމަކު ސީދާ ނުކުރެވުނީ،" އަންޗެލޮޓީ ބުންޏެވެ.

"މިއީ އުނދަގޫ ވަގުތެއް، ދަތި ވަގުތެއް، ހާއްސަކޮށް ބަލިނުވެ އެތައް މެޗެއް ދިއުމަށް ފަހު މިގޮތަށް ބަލިވުމުން."

އެލް-ކްލަސިކޯގައި ބާސެލޯނާ ބަލިވުމުގެ ސިލްސިލާ ހަތަރު މެޗަށް ފަހު ނިންމާލަދިނުމުގެ އެންމެ ބޮޑު ޝުކުރެއް ހައްގުވަނީ އެ ޓީމާ މި ސީޒަނުގައި ގުޅުނު ޖަރުމަން ކޯޗު ހަންސީ ފްލިކް އަށެވެ.