އޭއެފްސީ ޗެލެންޖް ލީގުގެ ގްރޫޕް ސްޓޭޖުން މާޒިޔާ ކަޓައިފި

އޭއެފްސީ ޗެލެންޖް ލީގުގެ ގުރޫޕް ސްޓޭޖުގައި ރާއްޖޭގެ ޗެމްޕިއަން މާޒިޔާ ސްޕޯޓްސް ކުޅުނު ދެ ވަނަ މެޗުން ވެސް ބަލިވެ، ނޮކްއައުޓް ބުރަށް ދިއުމުގެ ފުރުސަތު ގެއްލިއްޖެ އެވެ.

ކުވެއިތުގެ އަލް އަރަބީއާ ދެކޮޅަށް އެގައުމުގައި ރޭ ކުޅުނު މެޗުން މާޒިޔާ ބަލިވީ 2-0 އިންނެވެ. އަރަބީން ޖެހި ދެ ގޯލު ވެސް ޖަހާފައި ވަނީ މެޗުގެ ވަރަށް ކުރީކޮޅު އެވެ. އެގޮތުން ހަތް ވަނަ މިނިޓުގައި ޔޫސުފް މަޖީދު ލީޑު ނަގައިދިން އިރު، މިނިޓެއް ނުވަނީސް ލީޑު ފުޅާ ކޮށްދިނީ އަލީ ޚަލަފް އެވެ.

މި ހާފުގައި އަރަބީން ފޮނުވާލި އިތުރު ދެ ހަމަލާއެއް ގޯލުގެ ދަނޑީއަށް އަމާޒުވެފައި ވާއިރު، މާޒިޔާގެ ހަމްޒާ މުހައްމަދު (ހަމްޕު) އަށް ލިބުނު ހުސް ފުރުސަތެއްގައި ފޮނުވާލި ބޯޅަ، އަރަބޯގެ ގޯލްކީޕަރު ވަނީ ދިފާއު ކޮށްފަ އެވެ.

"މެޗުގެ ފުރަތަމަ 10 މިނެޓުތެރޭގައި ދެ ގޯލު ވަނުމުން މެޗުގެ ތެރެއަށް ވަންނަން މާޒިޔާ ކުޅުންތެރިންނަށް އުނދަގޫވި،" މެޗަށް ފަހު މީޑިއާއާ ވާހަކަދައްކަމުން މާޒިޔާގެ ކޯޗު ސާބިއާގެ ޑްރެގަން ޑުކަނޮވިޗް ބުންޏެވެ.

ޗެލެންޖް ލީގުގައި މާޒިޔާ ހިމެނޭ ގުރޫޕް ބީގައި ރޭ ކުޅުނު ފުރަތަމަ މެޗުގައި ތުރުކުމެނިސްތާންގެ އަރްކަޑާގް ވަނީ 2-0 އިން ކިރިގިސްތާންގެ އަބްދީޝް އަތަ ކަންޓް ބަލިކޮށްފަ އެވެ.

ފަހު މެޗުގައި އަބްދީޝް އަތަ ކަންޓްއާ ދެކޮޅަށް ހުކުރު ދުވަހުގެ ރޭ މާޒިޔާ ނުކުންނާނެ އެވެ.

ގުރޫޕްގެ ކޮންމެ ޓީމަކަށް ވެސް އެއް މެޗު ބާކީ އޮތް އިރު، ފުރަތަމަ މެޗުގައި އަރްކަޑާގް އަތުން 2-1 އިން ބަލިވެފައި ވުމުން މާޒިޔާ އަށް ވަނީ އަނެއް ބުރަށް ދިޔުމުގެ ފުރުސަތު ގެއްލިފަ އެވެ.

ދެ މެޗު ވެސް ކާމިޔާބުކޮށްގެން އަރްކަޑާގް ހަ ޕޮއިންޓާ އެކު އެއް ވަނައިގައި އޮތް އިރު، އަލް އަރަބީ އާއި އަބްދީޝް އަތަ ކަންޓް އަށް ވެސް ވަނީ ތިން ޕޮއިންޓް ލިބިފަ އެވެ.