ޓޫރިޒަމާއި އެއާޕޯޓް ޓެކްސްތައް ބޮޑުކުރާ ބިލް ތަސްދީގު ކުރައްވައިފި

ޓޫރިޒަމް ދާއިރާއިން ނަގާ ޓީޖީއެސްޓީ އާއި ގްރީން ޓެކްސްގެ އިތުރުން އެއާޕޯޓު ޑިވެލޮޕްމެންޓް ފީ އާއި ޑިޕާޗާ ޓެކްސް ބޮޑުކުރަން ތިން ގާނޫނަކަށް ގެނައި އިސްލާހުތައް ރައީސް ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

އެކަމާ ގުޅޭ ތިން ބިލެއް މަޖިލީހުން ފާސްކުރީ މިދިޔަ ހަފްތާގެ ބުރާސްފަތި ދުވަހު އެވެ. އެއާޕޯޓު ޑިވަލޮޕްމެންޓް ފީ އާއި ޑިޕާޗާ ޓެކުހަށް ގެނައި ބަދަލުތަކަށް އަންނަ މަހުގެ ފުރަތަމަ ދުވަހުން ފެށިގެން އަމަލު ކުރަން ފަށާނެ އެވެ. އަދި ގްރީން ޓެކުހަށް ގެނައި ބަދަލުތަކަށް އަމަލު ކުރަން ފަށާނީީ އަންނަ އަންނަ އަހަރުގެ ޖެނުއަރީ މަހުން ފެށިގެންނެވެ. އަދި ޓީޖީއެސްޓީ 17 ޕަސެންޓަށް ބޮޑުކުރަން ނިންމި ނިންމުމަށް އަމަލު ކުރަން ފަށާނީ އަންނަ އަހަރުގެ ޖުލައި މަހުން ފެށިގެންނެވެ.

އެއާޕޯޓު ޑިވެލޮޕްމެންޓް ފީ އާއި ޑިޕާޗާ ޓެކްސްއަށް ގެނައި ބަދަލާއެކު، އިކޮނޮމީ ކްލާހުގައި ރާއްޖެއިން ބޭރަށް ދަތުރުކުރާ ދިވެހިންގެ އަތުން ނަގާ ޓެކްސްއަށް ބަދަލެއް ނަޔަސް، ބިދޭސީންގެ އަތުން ނަގަމުން އައި 30 ޑޮލަރުގެ ބަދަލުގައި 50 ޑޮލަރަށް ބޮޑުވާނެ އެވެ. އަދި ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގާ ފީ ވެސް 120 ޑޮލަރަށް ބޮޑުވާއިރު، ފަސްޓް ކްލާހުގައި ދަތުރުކުރާ މީހުންގެ އަތުން ނަގާ ފީ 240 ޑޮލަރަށް ބޮޑުވާނެ އެވެ.

މީގެ އިތުރުން ޕްރައިވެޓް ޖެޓުގައި ދަތުރު ކުރާ މީހުންގެ އަތުން 480 ޑޮލަރު ނަގާނެ އެވެ. އެއީ ކުރިން ނަގަމުން އައި އަދަދަށް ވުރެ 300 ޕަސެންޓުގެ އިތުރުވުމެކެވެ.

ޓީޖީއެސްޓީ އާއި ގްރީން ޓެކުހަށް ގެންނަ ބަދަލު

އަންނަ އަހަރުން ފެށިގެން، ކުރިން ހަ ޑޮލަރު ދައްކަމުން އައި ތަންތަނުން 12 ޑޮލަރު ދައްކަން ޖެހޭނެ އެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެ އެވެ. މިއީ ކުރިން ދައްކަމުން އައި އަދަދަށް ވުރެ 100 ޕަސެންޓު އިތުރު އަދަދެކެެވެ.

ޓީޖީއެސްޓީ ބޮޑު ކުރަނީ 17 ޕަސެންޓަށެވެ.

ޓެކްސް އާއި ފީތަކަށް ގެނައި ބަދަލުތަކާ އެކު، ދައުލަތުގެ އާމްދަނީ އަށް 2.7 ބިލިއަން ރުފިޔާ އިތުރު ކުރެވޭނެ ކަމަށް ފިނޭންސް މިނިސްޓްރީން ބުނެފައިވެ އެވެ.

- އެއާޕޯޓް ޑިވަލޮޕްމެންޓް ފީ އާއި ޑިޕާޗާ ފީ: އިތުރު 1.5 ބިލިއަން ރުފިޔާ

- ގްރީން ޓެކްސް: އިތުރު 964 މިލިއަން ރުފިޔާ

- ޓީޖީއެސްޓީ: އިތުރު 202 މިލިއަން ރުފިޔާ

ޓެކްސް ބޮޑުކޮށްގެން ހޯދާ 40 ޕަސެންޓަކީ ސީދާ ޓޫރިޒަމް ދާއިރާ އިތުރަށް ހޯދާ އާމްދަނީ އެވެ.