ކޮޕް29 ސަމިޓުގައި މުހިންމު ލީޑަރުން ބައިވެރިއެއް ނުވޭ

މޫސުމީ މައްސަލަތަކާ ބެހޭ ގޮތުން އދ. އިން ބާއްވާ ކޮޕް29 ސަމިޓަށް ދުނިޔޭގެ ގިނަ އަދަދެއްގެ ލީޑަރުން މިއަދު އަޒަރުބައިޖާނަށް ވަޑައިގަންނަވަން ފައްޓަވާއިރު، ބޮޑެތި އެތައް ގައުމެއްގެ ލީޑަރުން ބައިވެރިވެވަޑައެއް ނުގަންނަވަ އެވެ.

ސަމިޓުގައި ބައިވެރިވެ ވަޑައިގަތުމަށް، ކުރިއަށް އޮތް ދެ ދުވަހު ބާކޫއަށް 75 އަށް ވުރެ ގިނަ ލީޑަރުން ވަޑައިގަންނަވާނެ ކަމަށް ބެލެވޭ އިރު، އެންމެ ބާރުގަދަ އަދި ވައި ނުސާފުވުމަށް މެދުވެރިވާ ކަންކަން އެންމެ ގިނައިން ހިނގާ އިގްތިސާދުތަކުގެ އިސްވެރިން އޭގެ ތެރެއަކު ނުހިމެނެ އެވެ.

ޖައްވަށް ޖައްވަށް ބޭރުކުރާ ގްރީންހައުސް ގޭހުގެ 80 ޕަސެންޓް ހިއްސާކުރާ ޖީ-20ގެ ގައުމުތަކުގެ ލީޑަރުންގެ ތެރެއިން ސަމިޓަށް ވަޑައިގަންނަވާނީ މަދު ބައެކެވެ. އޭގެ ތެރޭގައި އިނގިރޭސިވިލާތުގެ ބޮޑުވަޒީރު ކެއިރް ސްޓާމާ ހިމެނެ އެވެ.

"މޫސުމީ މައްސަލަތަކަކީ ގައުމީ ސަލާމަތާއި ރައްކާތެރިކަމާ ގުޅޭ ކަމެއްގެ ގޮތުގައި މި ސަރުކާރުން ގަބޫލުކުރޭ،" ސްޓާމާގެ އެނާޖީ ސެކްރެޓަރީ އެޑް މިލިބޭންޑް ހޯމަ ދުވަހު އެކްސްގައި ވިދާޅުވެފައިވެ އެވެ.

އެމެރިކާގެ ރައީސް ޖޯ ބައިޑަން، ޗައިނާގެ ރައީސް ޝީ ޖިންޕިން، އިންޑިއާގެ ބޮޑުވަޒީރު ނަރެންދުރަ މޯދީ އަދި ފްރާންސްގެ ރައީސް އެމަނުއެލް މެކްރޮން ވެސް މި ސަމިޓުން ނުފެންނާނެ އެވެ. ތަޖުރިބާކާރުން ދެކޭ ގޮތުގައި މިއީ އެމެރިކާގެ ރައީސް ކަމަށް ޑޮނަލްޑް ޓްރަމްޕް އަލުން އިންތިހާބުވުމާ އެކު، މޫސުމީ ކަންކަމުގައި އެމެރިކާގެ އެއްބާރުލުން ކުރިއަށް އޮތް ތަނުގައި ލިބުން ނާދިރު ކަމަށް ގަބޫލުކުރެވޭތީ އެ ކަންބޮޑުވުމާ ހެދި ދިމާވި ގޮތެވެ.

އެކަމަކު އެމެރިކާގެ މޫސުމީ ކަންކަމާ ބެހޭ މަންދޫބު ވަނީ ޓްރަމްޕް ވެރިކަމަށް ވަޑައިގަތުމަކީ ދުނިޔެ ހޫނުވުމާ ގުޅޭ ގޮތުން އެމެރިކާއިން ކުރަމުން އަންނަ މަސައްކަތްތަކަށް ނިމުމެއް އަންނާނެ ކަމެއް ނޫން ކަމުގެ ޔަގީންކަން ދޭން ވާހަކަ ދައްކަވައިފަ އެވެ.

އދ.ގެ ކްލައިމެޓް ޗީފް ސައިމަން ސްޓިއެލް ވެސް ވަނީ މޫސުމީ މައްސަލަތަކުގައި އުންމީދު ކަނޑާލާ ހިސާބަށް ނުދާ ކަމަށާއި އެކަމުގައި ގައުމުތަކުން އެއްބައިވަންތަކަން ދެއްކުމަށް އިލްތިމާސްކުރައްވައިފަ އެވެ. ނަމަވެސް އިއްޔެ ފުރަތަމަ މަޝްވަރާތައް ފެށުނީ ވެސް މައްސަލަގަނޑަކުންނެވެ. ރަސްމީ އެޖެންޑާއާ މެދު އުފެދުނު ދެބަސްވުމުގައި މަޝްވަރާތައް އެތައް ގަޑިއިރެއް ލަސްވެގެން ދިޔަ އެވެ.

ނަމަވެސް ދުނިޔޭގެ ކާބަން މާކެޓަށް އދ. އިން އާ މިންގަނޑުތެއް ކަނޑައަޅައި ސަރުކާރުތަކުން އިއްޔެ ވަނީ ރުހުން ދީފަ އެވެ. މިއީ މޫސުމީ ލަނޑުދަނޑިތައް ހާސިލުކުރުމަށް ގައުމުތަކަށް މުހިންމު ފިޔަވަޅެއްގެ ގޮތުގައި ވަނީ ބެލެވިފަ އެވެ.

އަޒަރުބައިޖާންގައި ކުރިއަށްދާ ސަމިޓްގައި ގާތްގަނޑަކަށް 50،000 މީހުން ބައިވެރިވެފައިވާއިރު، އޭގެ ތެރޭގައި މޫސުމީ ކާރިސާތަކުގެ ސަބަބުން އެންމެ ބޮޑަށް ގެއްލުންވާ އެފްރިކާ، އޭޝިއާ އަދި ލެޓިން އެމެރިކާގެ ގިނަ ގައުމުތަކުގެ ލީޑަރުން ހިމެނެ އެވެ.