ކޮމިޝަނެއް އުފައްދައި، މީޑިއާގެ މިނިވަންކަން "ކަފުން" ކުރާތީ އެމްޑީޕީން ކަންބޮޑުވެއްޖެ

ރާއްޖޭގައި މިވަގުތު މީޑިއާ އާއި ނޫސްވެރިކަން ރެގިއުލޭޓް ކުރަމުން އަންނަ މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) އުވާލައި ރައީސަށް ކޮންޓްރޯލް ލިބޭ ކޮމިޝަނެއް އުފައްދަން ރައްޔިތުންގެ މަޖިލީހަށް ހުށަހެޅި ބިލާ ގުޅިގެން އިދިކޮޅު އެމްޑީޕީން މިއަދު ކަންބޮޑުވުން ފާޅުކޮށްފި އެވެ.

އެ ބިލް މަޖިލިހަށް ހުށަހެޅުއްވީ ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާން އަބޫބަކުރު އެވެ.

އެ ބިލާ ގުޅޭ ގޮތުން، ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕްގެ ލީޑަރު އިބްރާހިމް ފަލާހު "މިހާރު" އަށް ވިދާޅުވީ، އެއީ ސަރުކާރުގެ ފަރާތުން ހުށަހެޅި ބިލެއް ނޫން ކަމަށެވެ. އޭނާ ވިދާޅުވީ، އެ ބިލާ ގުޅޭ ގޮތުން، ރައްޔިތުންގެ މަޖިލިހުގެ ސުޕަ މެޖޯރިޓީ ޕާޓީ އަދި ސަރުކާރު ހިންގާ ޕާޓީ ޕީއެންސީން ގޮތެއް ނިންމާނީ ޕާލަމެންޓަރީ ގްރޫޕްގައިި މަޝްވަރާ ކުރުމަށް ފަހު ކަމަށެވެ.

"އަޅުގަނޑުމެން ބިލު ރަނގަޅަށް ދިރާސާ ކޮށްފައި ގޮތެއް ނިންމާނީ،" އޭނާ ވިދާޅުވި އެވެ.

މީޑިއާ ކޮމިޝަންގެ ބިލުގައި ވަނީ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އާ ކޮމިޝަނެއް އުފެއްދުމަށެވެ. އަދި ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެމްބަރަކާއި މީޑިއާތަކުން އައްޔަންކުރާ ތިން މެމްބަރުންނެެވެ.

މި ކޮމިޝަނުގެ ރައީސާއި ނައިބު ރައީސް އައްޔަންކުރުމުގެ ބާރު ވެސް ބިލްގައި ދީފައި ވަނީ ރައީސަށެވެ.

އެ ބިލާ ގުޅިގެން އެމްޑީޕީން ނެރުނު ބަޔާނެއްގައި ބުނީ، ސަރުކާރުން ކޮންޓްރޯލް ކުރާ ކޮމިޝަނެއް އުފައްދަނީ މީޑިއާގެ މިނިވަންކަން ކަފުން ކުރުމުގެ ބޭނުމުގައި ކަމަށާއި ބިލާ މެދު ކަންބޮޑުވާ ކަމަށެވެ.

އެމްޑީޕީން ބުނީ އެމްއެމްސީ އާއި ބްރޯޑްކޮމް އެއްކޮށްލުމަށް ސަރުކާރުގެ ވިސްނުން ހުރި ކަމަށް ބަންޑާރަ ނައިބު އަހުމަދު އުޝާމް ވެސް ހާމަކުރައްވާފައި ވަނިކޮށް، މި ބިލް އަމިއްލަ މެމްބަރެއް ލައްވައި މަޖިލީހަށް ހުށަހަޅާފައި ވަނީ ސަރުކާރުގެ މަކަރުވެރި ރޭވުމެއްގެ ތެރެއިން ކަމަށް އެ ޕާޓީން ދެކޭ ކަމަށެވެ.

"މިއީ މީޑިއާގެ މިނިވަންކަން ކަފުން ކުރުމަށް ސަރުކާރު އަޑީގައި އޮވެގެން މަޖިލީހަށް ވައްދާފައިވާ ބިލެކެވެ،" އެ ބަޔާނުގައި އެމްޑީޕީން ބުންޏެވެ.

އެ ޕާޓީން ބުނީ، މީޑިއާ ކޮމިޝަނަށް މެމްބަރުން އައްޔަން ކުރުމުގެ ބާރާއި ކޮމިޝަންގެ ރައީސާއި ނައިބް ކަނޑައެޅުމަށް ރައީސަށް ބާރު ދީފައި ވުމަކީ މީޑިއާތައް އަމިއްލަ އަށް ރެގިއުލޭޓް ކުރުމަށް އޮތް މަގު ބަންދުކޮށް، ސަރުކާރުގެ ނުފޫޒު މީޑިއާތަކުގެ މައްޗަށް ހައްދެއް ނެތި ހިންގުމުގެ ފުރުސަތު ފަހިކުރުން ކަމަށެވެ.

އެމްޑީޕީން ބުނި ގޮތުގައި މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނާފައިވާ މައްދާތަކަކީ ގާނޫނުއަސާސީގައި ކަށަވަރު ކޮށްދީފައިވާ ދުލާއި ގަލަމުގެ މިނިވަންކަމަށް ހުރަސް އަޅައި، ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން ކުރަމުންދާ މަސައްކަތް ހުއްޓުވުމަށް ހިމެނި މާއްދާތަކެއް ކަމަށެވެ.

އެ ޕާޓީން ބުނީ، މީޑިއާތަކަކީ ސަރުކާރަށް ފާރަވެރިވެ، ސަރުކާރު ޖަވާބުދާރީ ކުރުމުގެ އެންމެ އިސް ޒިންމާ އަދާކުރާ ބަޔަކަށްވާއިރު މީޑިއާތަކުގެ މިނިވަންކަން ގެއްލޭ ގޮތަށް ހުށަހަޅާ އެއްވެސް ގާނޫނަކަށް އެ ޕާޓީން ތާއީދު ނުކުރާނެ ކަމަށެވެ.

އެހެންވެ، އެމްޑީޕީން ވަނީ ބިލު އަނބުރާ ގެންދިއުމަށް ވެސް ގޮވާލައިފަ އެވެ.

އެ ބިލުގައި އާ ކޮމިޝަނާ ހަވާލުކޮށްފައިވާ ޒިންމާތަކުގެ ތެރޭގައި، މީޑިއާތަކާއި ނޫސްވެރިންގެ މަޝްވަރާގެ މަތިން، މީޑިއާތަކާއި ނޫސްވެރިން އަމަލުކުރަންޖެހޭ ސުލޫކީ މިންގަނޑެއް އެކުލަވައިލުން ހިމަނާފައިވެ އެވެ.

ސުލޫކީ މިންގަނޑާ ތަކުރާރުކޮށް ހިލާފުވާ މީޑިއާތައް ޖޫރިމަނާ ކުރުމާއި ލައިސަންސް ހިފެހެއްޓުމާއި ޕްރޮގްރާމެއް ނުވަތަ ޕްރޮގްރާމެއް ބައެއް ހުއްޓުވައި، މާފަށް އެދެން އެންގުން ފަދަ ބޮޑެތި ބާރުތަކެއް ވެސް ކޮމިޝަނަށް އެ ބިލުން ލިބިދެ އެވެ.

ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބިލްގައި ވެ އެވެ. މީޑިއާތަކުގެ އިތުރުން، ވަކިވަކި ނޫސްވެރިން ވެސް 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރުމުގެ ބާރު ކޮމިޝަނަށް ލިބެ އެވެ.

އެ ބިލުގެ މައްސަލާގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވެސް ވަނީ ކަންބޮޑުވުން ފާޅުކޮށްފަ އެވެ.