އޮޅުވާލައިގެން ގެއަކަށް ގެންގޮސް، ފޭރުނު ތިން މީހުން އެއް އަހަރާއި ތިން މަހަށް ޖަލަށް

މާލޭގެ ގެއަކަށް މީހަކު އޮޅުވާލައިގެން ވައްދައި، ބަރަހަނާ ކުރުމަށްފަހު ބިރު ދައްކައިގެން ކޭޝް ކާޑުގެ ޕިން ނަމްބަރު ހޯދުމަށްފަހު އެކައުންޓްގައިވާ ފައިސާތައް ފޭރުނު މައްސަލާގައި ހިމެނޭ ތިން މީހުން އެއް އަހަރާއި ތިން މަސް ދުވަހަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

މިދިޔަ ޖުލައި މަހުގެ ތެރޭގައު މއ. މަސްފަން ގެއަށް މީހަކު ވައްދައިގެން މިދިޔަ ޖުލައި މަހުގެ ތެރޭގައި ފޭރުނު މައްސަލާގައި ދައުވާ ކޮށްފައިވަނީ މއ. މަސްފަން، އާއިޝަތު އާއި އެގޭ މުހައްމަދު ރީހާން އަދި ސ. ހިތަދޫ ސޯމާ، ޝަފީގު އިބްރާހީމްގެ މައްޗަށެވެ.

އެ މީހުންގެ މައްޗަށް ކޮށްފައިވަނީ އެނގި ހުރެ ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ ދައުވާ އާއި އަނިޔާއެއް ދިނުމުގެ ކުށުގެ ދައުވާގެ އިތުރުން ފޭރުމުގެ ދައުވާ އެވެ. އެ ތިން މީހުން ވަނީ ކޯޓުގައި ކުށަށް އެއްބަސްވެފަ އެވެ.

ފޭރުމުގެ ކުށުގެ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. އަދި އަނިޔާއެއް ދިނުމުގެ ކުށުގެ އަދަބަކީ ދެ މަހާއި 12 ދުވަހަށް ޖަލަށް ލުމެވެ. އަދި ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ.

އެހެންވެ ކޯޓުން މިދިޔަ ބުދަ ދުވަހު ކުރި ހުކުމުގައިވަނީ އެ ތިން މީހުން ޖުމްލަ އެއް އަހަރާއި ތިން މަސް ދުވަހަށް ޖަލަށްލުމަށެވެ.

އެ މައްސަލާގައި އެ މީހާ ހިފެހެއްޓުމަށްފަހު، އޭނާއަށް ބިރު ދައްކައިގެން އޭނާގެ އެކައުންޓުން އެހެން އެކައުންޓަކަށް 20،000ރ. ފޮނުވާފައިވާ ކަމަށާއި އަދި އަނިޔާ ލިބުނު މީހާގެ ކާޑު ބޭނުންކޮށްގެން އޭޓީއެމުން 25،000ރ. ނަގާފައިވެ އެވެ.

އެ މައްސަލާގައި ފުލުހުން ކުރިން ބުނެފައިވަނީ ބުނެފައިވަނީ އެ ހާދިސާ ހިނގި މަސްފަންގެއަކީ ތަކުރާރުކޮށް އެކި މީހުން އޮޅުވާލައިގެން ގެންގޮސް ބިރު ދައްކަން ބޭނުންކުރަމުން އައި ތަނެކެވެ.

އޮޅުވާލައިގެން މީހުން ގެންގޮސް، ފޭރުމާއި ބިރުދެއްކުމުގެ ކުށްތައް މާލެ ސަރަހައްދުގައި ފަހަކަށް އައިސް ވަނީ އިތުރުވެފަ އެވެ. އެ ކުށް ކުރަނީ ގްރޫޕް ހަދައިގެން ކަން ވެސް ފުލުހުން ބުނެފައިވެ އެވެ.