90 މިލިއަން ޑޮލަރުގެ "ބާސެލޯ ނަސަންދުރާ މާލެ" ހުޅުވަނީ

ކުރީގެ ނަސަންދުރަ ޕެލެސް ހުރި ބިމުގައި "ބާސެލޯ ނަސަންދުރާ މާލެ" ގެ ނަމުގައި ހެދި ފައިވް ސްޓާ ފެންވަރުގެ ހޮޓާ ހުޅުވުމުގެ ތައްޔާރީތައް ފަށައިފި އެވެ.

ގާތްގަނޑަކަށް 90 މިލިއަން ޑޮލަރު ހޭދަކުރި އެ ހޮޓަލުގައި 126 ކޮޓަރި އާއި 118 ސާވިސް އެޕާޓްމެންޓް ހުންނާނެ އެވެ. ފަސް ތަރީގެ އެ ހޮޓާ ހިންގަނީ ސްޕެއިންގެ ހޮޓެލް ޗެއިނެއް ކަމަށްވާ ބާސެލޯއިންނެވެ. ބާސެލޯ އިން އަންނަނީ ޔޫއޭއީ އާއި ތައިލެންޑާއި ޔޫރަޕްގެ ގައުމުތަކުގައި ވެސް ހޮޓަލުގެ ވިޔަފާރި ހިންގަމުންނެވެ.

ނަސަންދުރާ ހޮޓާ އެންމެ ފުރަތަމަ ހުޅުވައިލީ، މީހުން ދިރިއުޅުމަށް ބައެއް އެޕާޓްމެންޓްތައް ވިއްކުމަށެވެ. ނަމަވެސް، މިހާރު ހުރިހާ އެޕާޓްމެންޓެއް ވެސް ދުވަހު ރޭޓުގައި ދޭން ވަނީ ނިންމައިފަ އެވެ.

ދެ އިމާރާތަކަށްވާ ގޮތަށް ހަދާފައިވާ އެ ހޮޓާ އެންމެ ފުރަތަމަ ހުޅުވަން އޮތީ މި މަހުގެ އެއް ވަނަ ދުވަހު އެވެ. ނަމަވެސް، ކުރަން ހުރި ބައެއް ކުދި ކުދި މަސައްކަތާ ހެދި، އެ ދުވަހު ހުޅުވުން ފަސް ކުރީ އެވެ. އެ ހޮޓާ ރަސްމީކޮށް ޓޫރިސްޓުންނަށް ހުޅުވައިލާނެ ސީދާ ދުވަހެއް އަދި ނުބުނެ އެވެ.

ބާސެލޯ ނަސަންދުރާ މާލެ ހުޅުވުމުން އެތަން ވާނީ، މާލެ ސަރަހައްދުގެ އެންމެ ބޮޑު ހޮޓަލަށެވެ.

އެ ހޮޓަލަކީ ދިވެހި އަދި ލަންކާ ބައެއްގެ ހިއްސާ އޮންނަ އެންޕީއެޗް ކުންފުނީގެ ތަނެކެވެ. އެ ކުންފުނިން އަންނަނީ ބާސެލޯ ވޭލް ލެގޫން ރިސޯޓު ވެސް ހިންގަމުންނެވެ.