މާފުއްޓާ ޖެހުމުން އޭދަފުށި ދިޔައީ ސުމަކުން

ނައިންޓީ ޕްލަސް ގޯލްޑް ކަޕްގެ ގުރޫޕް ސްޓޭޖްގެ ދެވަނަ ބުރުގައި ކ. މާފުށި އިން ފުޓްބޯޅައިގެ ވަރުގަދަ ބ. އޭދަފުއްޓާ ވާދަކޮށް 2-0 އިން މޮޅުވެއްޖެ އެވެ.

މާފުށިން މޮޅަށް ކުޅެ އޭދަފުށީގެ ގޯލާ ދިމާއަށް ގިނަ ހަމަލާތަކެއް ފޮނުވާލި މި މެޗުގައި އެޓީމުން ވަނީ ފުރަތަމަ ހާފުގައި ލީޑު ނަގައިފަ އެވެ. އޭރިއާ ބޭރުން ފޮނުވާލި ހަމަލާ ގޯލުގެ ތިރީ ކަމަށް އަމާޒު ކޮށްލައިގެން މި ގޯލު އެޓީމަށް ޖަހައިދިނީ އިބްރާހިމް އަތީގު ހަސަން (އިއްބެ) އެވެ.

މާފުށީ ސަޕޯޓަރުންގެ ފޯރި ފުރިހަމައަށް ދައްކާލި މި މެޗުގައި އެޓީމުގެ ދެވަނަ ގޯލު ޖެހީ ފުރިހަމަ ވަގުތު ހަމަވެފައި ވަނިކޮށެވެ. ހޫދު ނާޒިރު އޭރިއާ ތެރެއަށް ވަދެ ފޮނުވާޅި ހަމަލާ، އޭދަފުށީގެ ކީޕަރު އަލީ އަޖުފާން އަމްޖަދު ދެ ފަހަރަށް މަތަ ކުރުމުން ވެސް ރީބައުންސްވި ވަގުތު ބޯޅަ ހޯދައި މި ގޯލު ޖަހައިދިނީ އިސްމާއިލް މަފާޒް ހުސެއިން އެވެ.

އިތުރު ވަގުތުގައި އޭދަފުށީގެ ކީޕަރު އަޖުފާން އަށް ވަނީ ރަތް ކާޑު ވެސް ދައްކައިފަ އެވެ. އޭނާއަށް ރަތް ކާޑު ދެއްކީ އޭރިއާ ބޭރުން މާފުށީގެ ކުޅުންތެރިޔަކަށް ފައުލް ކޮށްގެންނެވެ. އޭދަފުށީގެ ބެންޗުގައި ކީޕަރެއް ނެތުމުން ފަހު ވަގުތު ގޯލަށް އެރީ އެޓީމުގެ ޑިފެންޑަރު ރައްޒާން ރަޝީދެވެ.

އޭދަފުއްޓަކީ ގުރޫޕް ސްޓޭޖުގެ ފުރަތަމަ ބުރުގައި ކުޅުނު ތިން މެޗު ވެސް ކާމިޔާބު ކުރި ޓީމެކެވެ. ނަމަވެސް މާފުށި ދެވަނަ ބުރުން ޖާގަ ހޯދީ ގުރޫޕްގެ ތިންވަނަ ޓީމުގެ ގޮތުގަ އެވެ.

ފުރަތަމަ ދެ މެޗުން މޮޅެއް ނުހޯދުނު މާފުށި ވަނީ ގުރޫޕް ސްޓޭޖުގެ ފުރަތަމަ ބުރުގެ ފަހު މެޗުގައި 1-0 އިން، އެ ޓީމު ހިމެނުނު ގުރޫޕްގެ އެއްވަނަ ހޯދި އަލިފުށި ބަލިކޮށްފަ އެވެ. އަދި މިރޭ އޭދަފުށި ބަލިކޮށް މާފުށިން މި ވަނީ ކުއާޓާ ފައިނަލްގެ ޖާގައެއް ހޯދުމާ ވެސް ގާތަށް ޖެހިލައިފަ އެވެ.

ގުރޫޕް ސްޓޭޖުގެ ދެވަނަ ބުރުގައި އޭދަފުއްޓާއި މާފުށި ހިމެނެނީ ހއ. ދިއްދުއާ އެއް ގުރޫޕެއްގަ އެވެ. ކުއާޓާ ފައިނަލަށް ދާނީ ގުރޫޕްގެ އެންމެ ރަނގަޅު ދެ ޓީމެވެ.