ސިމްޑީ ގްރޫޕަށް 24 އަހަރު ފުރުން ފާހަގަކޮށްފި

ރާއްޖޭގައި ފުޅާ ދާއިރާއެއްގައި ވިޔަފާރިކުރާ ސިމްޑީ ގްރޫޕަށް 24 އަހަރު ފުރުން ފާހަގަކޮށްފި އެވެ.

ސިމްޑީ ކުންފުންޏަށް 24 އަހަރު ފުރުމުގެ ގޮތުން މުވައްޒަފުންގެ އަގުވަޒަން ކުރުމަށް ހާއްސަ ރަސްމިއްޔާތެއް ވަނީ ބާއްވައިފަ އެވެ. އެ ރަސްމިއްޔާތުގައި ސިމްޑީ ގްރޫޕުގެ މެނޭޖިން ޑިރެކްޓަރު މިޝަލް ދީދީ ވިދާޅުވީ އެ ކުންފުނީގެ ކާމިޔާބީގެ ސިއްރަކީ ބައިނަލްއަގްވާމީ މައިދާނުގައި މަޝްހޫރު ބްރޭންޑުތަކާއެކު އޮންނަ ގުޅުމާއި ކަސްޓަމަރުން އެ ކުންފުންޏާއި ކުންފުނިން ވިއްކާ ޕްރޮޑަކްޓުތަކަށް ކުރާ އިތުބާރު ކަމަށެވެ.

"އަޅުގަނޑުމެންގެ ކުރިމަގު ބިނާކުރާނީ ވެސް އެންމެ ފެންވަރު ރަނގަޅު ޕްރޮޑަކްޓުތަކާއި ހިދުމަތްތައް ފޯރުކޮށްދިނުމުގައި, މާކެޓުގައި އަންނަ ބަދަލުތަކާއި އެއްކޮށް ވެސް ކަސްޓަމަރުންނަށް އެންމެ ފުރިހަމަ ހިދުމަތްތައް ފޯރުކޮށްދިނުމުގައި ދެމި ތިބޭނަން." މިޝަލް ވިދާޅުވި އެވެ.

އެ ރަސްމިއްޔާތުގައި ސިމްޑީ ގްރޫޕުގެ ޖެނެރަލް މެނޭޖަރު, ޔޫޝައު ސައީދު ވިދާޅުވީ އެ ކުންފުނީގެ މުވައްޒަފުންނާއި ނުލައި، ކާމިޔާބީ އާއި ކުރިއެރުންތައް ނުހޯދޭނެ ކަމަށެވެ.

"އަޅުގަނޑުމެންގެ ކުންފުނީގެ ކުރިއެރުމުގެ އަސްލަކީ މުވައްޒަފުން. އަޅުގަނޑުމެންނަށް ވިޔަފާރި ފުޅާކޮށް, ތަރައްގީ ކުރެވެނީ މުވައްޒަފުންނާ ގުޅިގެން ކުރިމަތިވާ ހުރިހާ ގޮންޖެހުންތަކުން އަރައިގަތުމަށް އެކުގައި ކުރަމުންދާ މަސައްކަތްތަކުގެ ސަބަބުން." ޔޫޝައު ވިދާޅުވި އެވެ.

ގިނަ އަދަދެއްގެ ޕްރޮޑަކްޓްތައް މާކެޓަށް ނެރެ ވިއްކަމުންދާ ސިމްޑީއަކީ އެކި ދާއިރާތަކާ ގުޅުން ހުރި ތަކެތި ވިއްކާ އަދި އެކި ދާއިރާތަކުން ހިދުމަތްދޭ ކުންފުންޏެކެވެ. އޭގެ ތެރޭގައި ހިފައި ގެންގުޅޭ ސާމާނާއި އިލެކްޓްރޯނިކްސް އަދި ފޮޓޯގްރަފީ އާއި ރިސޯޓުތަކަށް ހާއްސަ ސަޕްލައި ވިޔަފާރިތައް އެ ކުންފުނީ އަންނަނީ ކުރަމުންނެވެ. އަދި އެ ކުންފުނީގެ ދަށުން "ބިއޯންޑް"ގެ ނަމުގައި ލަގްޒަރީ އެއާލައިނެއް ވެސް ދަނީ ހިންގަމުންނެވެ.

އެ ކުންފުނިން 15,000 އަށް ވުރެ ގިނަ ޕްރޮޑަކްޓް އަންނަނީ ވިއްކަމުންނެވެ. އޭގެ ތެރޭގައި 200 ބްރޭންޑުގެ މުދާ ހިމެނެ އެވެ.

ސިމްޑީއަކީ އިލީ ކޮފީ އާއި ކެނޮން އަދި ދިލްމާ ޓީ ފަދަ މަގުބޫލު އެކި ބްރޭންޑުތަކުގެ ރާއްޖޭގެ އޮތޮރައިޒްޑް ޑިސްޓްރިބިއުޓަރެވެ.

ސިމްޑީގެ ދަށުން މި ވަގުތު ހިންގަމުންދާ 5 ވިޔަފާރިއެއް އޮވެ އެވެ. އެއީ ސިމްޑީ ރެސޫ އާއި ސިމްޑީ ޓެކް އާއި ސިމްޑީ ބެވްގެ އިތުރުން ސިމްޑީ ސީޕީޑީ އަދި ބިއޯންޑް އެއާލައިން އެވެ.