"ކަޅުއޮއްފުންމި" ސިފައިންގެ ބެލުމުގެ ދަށަށް

ރާއްޖޭގެ މިނިވަންކަމަށް 50 އަހަރު ފުރުން ފާހަގަ ކުރުމަށް މިލިޔަނަކަށް ވުރެ ގިނަ ރުފިޔާ ހަރަދުކޮށް 2015 އަހަރު ބަން "ކަޅުއޮއްފުންމި" ސިފައިންގެ ބެލުމުގެ ދަށަށް ގެންގޮސްފި އެވެ.

ޕޯޗުގީޒުންގެ އަޅުވެތިކަމުން ރާއްޖެ މިނިވަން ކުރުމަށް ބޮޑުތަކުރުފާނު ދަތުރުކުރެއްވި ކަޅުއޮށްފުންމީގެ ނަމޫނާއެއްގެ ގޮތަށް ބަން މި އޮޑި މިހާތަނަށް ބާއްވާފައި އޮތީ މާލޭގެ ސިޓީ ޕާކުގަ އެވެ.

އެމްއެންޑީއެފުން ބުނީ ކަޅުއޮއްފުންމި އެތަނުގެ ބެލުމުގެ ދަށަށް ގެންގޮސްފައިވާ ކަމަށާއި މަރާމާތު ކުރުމުގެ މަސައްކަތް ވަރަށް އަވަހަށް ފަށާނެ ކަމަށެވެ.

އެނގިފައިވާ ގޮތުގައި ސައުދީ ރަސްގެފާނު ރާއްޖެ ވަޑައިގަންނަވާއިރު ބާއްވާ ބައެއް ހަރަކާތްތަކުގައި ކަޅުއޮއްފުންމި ބޭނުންކުރާ ގޮތަށް ވަނީ ހަމަޖެހިފަ އެވެ.

މިނިވަން ފަންސާހުގެ ރަސްމިއްޔާތުތަކުގައި ބޭނުންކުރުމަށް ފަހު، ކަޅުއޮއްފުންމި ބާއްވަން ނިންމީ ހުޅުމާލޭގައި ހުންނަ ހެރިޓޭޖް އިމާރާތުގަ އެވެ. ނަމަވެސް އެ އިމާރާތް ހަދައި ނުނިމޭތީ ސަރުކާރުން ވަނީ އެ ތަނަށް އޮޑި ގެންދިއުމުގެ ބަދަލުގައި މާލޭގައި އާންމުންނަށް ފެންނާނެހެން ބެހެއްޓުމަށް ނިންމައިފަ އެވެ.

އެކަމަކު މިހާތަނަށް އައި އިރު ވެސް އެ ޕާކު ރަސްމީކޮށް އާއްމުންނަކަށް ހުޅުވައެއް ނުލަ އެވެ.

ފަންސާހަކަށް ފޫޓުގެ މި އޮޑި ބަނދެފައިވަނީ ވަކަރު ބޭނުންކޮށްގެން ހދ. ނޭކުރެންދޫގަ އެވެ. އެ މަސައްކަތް ކުރީ މެރިޓައިމް އެންޑް އަންޑާ ވޯޓާ ހެރިޓޭޖް ޖަމިއްޔާ އިންނެވެ.