މިދިޔަ އަހަރު ޑްރަގް މައްސަލަތަކުގައި 20 މީހަކު އުމުރަށް ޖަލަށްލި، 10 މިލިއަންގެ ޖޫރިމަނާ

މަސްތުވާތަކެތީގެ މައްސަލަތަކުގައި މިދިޔަ އަހަރުގެ ތެރޭގައި 20 މީހަކު އުމުރަށް ޖަލަށްލާން ކްރިމިނަލް ކޯޓުން ހުކުމްކޮށްފައިވާ ކަމަށް އެ ކޯޓުގެ ތަފާސްހިސާބުތައް ދައްކައިފި އެވެ.

ކްރިމިނަލް ކޯޓުން ބުނީ 2024 ވަނަ އަހަރުގެ ތެރޭގައި އެ ކޯޓުން މަސްތުވާތަކެތީގެ 137 މައްސަލައެއް ނިންމި ކަމަށެވެ. އޭގެ ތެރޭގައި މަސްތުވާތަކެތި ބޭނުން ކުރާ ކަމަށް އިއުތިރާފުވުމުން ޑްރަގު ކޯޓަށް ފޮނުވުމަށް އަނބުރާ ގެންދިޔަ މައްސަލަތަކާއި ދައުލަތުގެ ފަރާތުން އަނބުރާ ގެންދިޔަ މައްސަލަތައް ވެސް ހިމެނެ އެވެ.

ކޯޓުން ބުނި ގޮތުގައި މަސްތުވާތަކެތީގެ މައްސަލަތަކުގެ ތެރެއިން މިދިޔަ އަހަރުގެ ޝަރީއަތް ހިންގައި މައުޟޫއީ ގޮތުން ނިންމި މައްސަލަތަކުގެ ތެރެއިން ސާބިތުނުވަނީ އެންމެ ހަތް މައްސަލަ އެވެ. އެހެންކަމުން ހުކުމްކޮށް ނިންމި މައްސަލަތަކުގެ ތެރެއިން 95 ޕަސެންޓަށް ވުރެ ގިނަ މައްސަލަ ސާބިތުވި ކަމަށް ކޯޓުން ބުންޏެވެ.

މިދިޔަ އަހަރުގެ ތެރޭގައި މަސްތުވާތަކެތީގެ ވިޔަފާރިކުރުމުގެ ކުށް ސާބިތުވެ 20 މީހަކު އުމުރަށް (25 އަހަރު) ޖަލަށްލުމަށް ކޯޓުން ހުކުމްކޮށްފައިވާ ކަމަށް ކޯޓުން ބުންޏެވެ. އަދި އެކި މައްސަލަތަކުގައި ހަތް މީހަކު 12 އަހަރަށްވުރެ ދިގު މުއްދަތަކަށް ޖަލަށްލާން ހުކުމް ކޮށްފައިވާ ކަމަށް ވެސް ބުންޏެވެ.

އަދި މި މައްސަލަތަކާ ގުޅިގެން 10.2 މިލިއަން ރުފިޔާއަށް ވުރެ ގިނަ އަދަދެއްގެ ފައިސާ ޖޫރިމަނާގެ ގޮތުގައި ދައުލަތަށް ދައްކަން ވެސް ހުކުމް ކޮށްފައިވާކަން އެ ކޯޓުން ފާހަގަކުރި އެވެ.