ނައިބް ރައީސް މި އަހަރު ވެސް ވެޓްރަންސްގައި ކުޅުއްވާ

ކުރީގެ މަޝްހޫރު ފުޓްބޯޅަ ކުޅުންތެރިންނަށް އަމާޒު ކޮށްގެން ކޮންމެ އަހެއްހެ ރޯދަ މަހު ބާއްވާ އެފްއޭއެމް ވެޓެރަންސް ލީގުގައި، ރާއްޖޭގެ ނައިބު ރައީސް ހުސައިން މުހައްމަދު ލަތީފް މި އަހަރު ވެސް ބައިވެރިވެ ވަޑައިގެންފި އެވެ.

މިދިޔަ އަހަރެކޭ އެއްގޮތަށް ނައިބު ރައީސް މި އަހަރު ވެސް ކުޅުއްވަނީ މުއިވެޔޮ ފްރެންޑްސް ވެޓެރަންސް ޓީމަށެވެ. އެމަނިކުފާނަކީ އެ ޓީމުގެ ކެޕްޓަނެވެ. އެ ޓީމާ އެކު ނައިބު ރައީސް ވަނީ މިދިޔަ އަހަރުގެ ފައިނަލުގައި ކުޅުއްވައިފަ އެވެ.

މުއިވެޔޮ ފްރެންޑްސް މި އަހަރު ހިމެނެނީ މުބާރާތުގެ ގުރޫޕް ބީގަ އެވެ. އެ ޓީމުގެ ފުރަތަމަ މެޗުގައި އިއްޔެ ދަ ގްރާންޑޭ ސްޕޯޓްސްއާ ދެކޮޅަށް ކުޅުނު މެޗު ނިމުނީ 1-1 އިން އެއްވަރު ވެގެންނެވެ.

މެޗުގެ ދެ ވަނަ ހާފުގައި ދަ ގްރާންޑޭގެ އިބްރާހިމް ޒައީމް ވަނީ ޕެނަލްޓީއަކުން ލަނޑެއް ޖަހައި ލީޑު ނަގައިފަ އެވެ. އޭގެ ދެ މިނިޓު ފަހުން މުއިވެޔޮ އަށް ނަތީޖާ އެއްވަރު ކޮށްދިނީ އަހުމަދު ނިޔާޒް އެވެ.

މިހާރުގެ އިމިގްރޭޝަންގެ ޑެޕިއުޓީ ކޮންޓްރޯލާ ޖެނެރަލް، ކުރިން ގައުމީ ޓީމަށް ކުޅުނު އަހުމަދު އަޝްފާން (އަޝްކޮ) ވެސް މި މުބާރާތުގައި ކުޅެ އެވެ. އަޝްފާން ކުޅެނީ ދަ ގްރާންޑޭއަށެވެ.

މުބާރާތުގެ ގުރޫޕް ބީގައި ހިމެނެނީ މުއިވެޔޮ ފްރެންޑްސް އާއި ދަ ގްރާންޑޭގެ އިތުރުން ސްޓެލްކޯ، ކްލަބް އީގަލްސް އަދި ޕޮލިސް ކްލަބެވެ. ގުރޫޕް އޭގައި ހިމެނެނީ ހުޅުމާލެ، ވިލިމާލެ، ދިވެހި ސިފައިންގެ ކްލަބް (ޑީއެސްސީ)، ޒެލޮޓް އަދި ހުއްރިއްޔާ އެވެ.