އެފްއޭއެމްގެ ޑިސިޕްލިނަރީ ކޮމިޓީ އާއި އެޕީލްސް ކޮމިޓީ ހޮވުން މި މަހުގެ 15 އަށް ތާވަލް ކޮށްފި

އެފްއޭއެމްގެ އެކްސްޓްރާ އޯޑިނަރީ ކޮންގްރެސް މި މަހުގެ 15 ވަނަ ދުވަހުގެ ރޭ ބާއްވަން ތާވަލް ކޮށްފި އެވެ.

އެރޭ 9:15 ގައި ބާއްވާ ކޮންގްރެސްގެ ދައުވަތު، އެފްއޭއެމުން ކްލަބްތަކަށް ފޮނުވާފައި ވާއިރު ކޮންގްރެސްގެ އެޖެންޑާ ވެސް ވަނީ ފައިނަލް ކޮށްފަ އެވެ.

އެޖެންޑާގައި ވަނީ ފިޔަވަޅު އަޅާ ކޮމިޓީ އާއި އިސްތިއުނާފް ކޮމިޓީ އަދި އެތިކްސް ކޮމިޓީ ހޮވަން ހިމަނައިފަ އެވެ. ދެން އެޖެންޑާގައި އޮތީ މިދިޔަ ދެ އަހަރުގެ އެފްއޭއެމްގެ މުއާމަލާތްތައް އޮޑިޓް ކުރާނެ އޮޑިޓް ފާމެއް ކަނޑައެޅުމެވެ.

އަސާސީ ގަވާއިދަށް ބޮޑެތި ބަދަލުތަކެއް ގެންނަ ކޮންގްރެސްއެއް ފަހުން ބާއްވާނެ ކަމަށް އެފްއޭއެމްގެ އެކްޓިން ޖެނެރަލް ސެކްރެޓަރީ ޝުޖާއު ވަނީ ކުރިން ވިދާޅުވެފަ އެވެ. ފީފާ އިން ވެސް ވަނީ އެފްއޭއެމްގެ އަސާސީ ގަވާއިދަށް ބައެއް ބަދަލުތައް ގެނައުމަށް ހުށަހަޅައިފަ އެވެ.

މި ފަހަރުގެ ކޮންގްރެސްއަކީ، އެފްއޭއެމްގެ ހިންގުން ނޯމަލައިޒޭޝަން ކޮމީޓިއަކާ ހަވާލު ކުރި ފަހުން އެ ކޮމިޓީގެ ބެލުމުގެ ދަށުން ބާއްވާ ފުރަތަމަ ކޮންގްރެސް އެވެ. ކޮންގްރެސްގެ ރިޔާސަތު ބަލަހައްޓަވާނީ ނޯމަލައިޒޭޝަން ކޮމިޓީގެ މިހާރުގެ ޗެއާމަން އަދި ކުރީގެ ޕްރޮސިކިއުޓާ ޖެނެރަލް އަހުމަދު މުއިއްޒެވެ.

އެ ކޮމިޓީގެ ޗެއާމަނަކަށް ފީފާއިން މުއިއްޒު ހަމަޖެއްސީ މިދިޔަ ފެބްރުއަރީ 14 ވަނަ ދުވަހު އެވެ. އެ ނިންމުމުގެ ކުރިން ފީފާއިން ވަނީ ނޯމަލައިޒޭޝަން ކޮމިޓީގެ ޗެއާމަނަކަށް އޭރު ހުންނެވި ކުރީގެ ސްޕޯޓްސް މިނިސްޓަރު އަހުމަދު ޒުހޫރު މަގާމުން ވަކިކޮށްފަ އެވެ.

ފީފާއިން ނިންމީ، ކުރިން ފަސް މެންބަރުން ތިއްބެވި ކޮމިޓީގެ މެންބަރުންގެ އަދަދު ތިނަކަށް ދަށް ކުރުމަށެވެ. އެގޮތަށް ފީފާއިން ނިންމުމުން، އެ ކޮމިޓީގެ މެންބަރުކަމުން ގާނޫނީ އަދި ފައިނޭންސް ދާއިރާގެ ތަޖުރިބާކާރު އަހުމަދު އަލީ އަމިއްލަ އަށް އިސްތިއުފާ ދެއްވި އެވެ.