އަޒުމަކަށް ހަދަންވީ ދީނަށް އަމަލުކުރާ، ގަދަރުކުރާ މީހަކަށް ވުން: ރައީސް

ކޮންމެ ދިވެއްސެއްގެ ވެސް އަޒުމަކަށް ހަދަންވީ، އިސްލާމްދީނުގެ ރިވެތި އުސޫލުތަކަށް އަމަލުކުރާ، ދިވެހީންގެ ހަރުދަނާ ސިފަތަކަށް ގަދަރުކުރާ މީހަކަށް ވުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދިވެހި ގައުމިއްޔަތު ދިރުވައި އާލާކުރާ ދުވަހުގެ މުނާސަބަތުގައި ދެއްވި ހިތާބުގައި އެ މަނިކުފާނު ވިދާޅުވީ، ދިވެހީންގެ ތެރޭގައި މިއަދު ދިވެހި ގައުމިއްޔަތުގެ މާނަތައް އަލުން ހަރުލައްވަން މަސައްކަތްތަކެއް ކުރަން ޖެހިފައިވާ ކަމަށެވެ.

އެކަމަށްޓަކައި މި ޒަމާނުގައި ބޭނުންވަނީ އިލްމީ ހަމަތަކެއް ކަމަށައި އިލްމީ ހަމަތަކުގެ މަތިން ދިވެހި ގައުމިއްޔަތު އުނގަންނައިދީ، ދިވެހީންގެ ތަޖުރިބާތަކާއި ހުނަރުތައް ފަހަށް ރައްކާ ކުރަމުން ދާނެ ކަމަށް ރައީސް ވިދާޅުވި އެވެ.

"ދިވެހި ގައުމިއްޔަތު ދިރުވައި އާލާކުރާ ދުވަހުގެ އަޒުމަކަށް ވާންވީ، އިސްލާމްދީނުގެ ރީތި އުސޫލުތަކަށް އަމަލުކުރާ، ދިވެހީންގެ ހަރުދަނާ ސިފަތަކަށް ގަދަރުކުރާ މީހަކަށް ވުމުގެ އަޒުމެވެ. އޭރުން ރޫހާނީ ގޮތުންނާއި ނަފުސާނީ ގޮތުން ތާހިރުކަން ލިބުމާއެކު މަސައްކަތްތެރި މުރާލި ހުނަރުވެރި ތަހުޒީބު މީހަކަށް ވެވޭނެ އެވެ. އެ ފަދަ ގައުމަކީ ބާއްޖަވެރި އުފާވެރި ގައުމެކެވެ،" ރައީސްގެ ހިތާބުގައި ވިދާޅުވި އެވެ.

ވަޒަންވެރިވެ، ރާއްޖޭގައި މީހުން ދިރިއުޅެން ފެށި ތާރީހެއް އެނގެން ނެތް ކަމަށް ވާއިރު އެކަމުން އަންގައިދެނީ ދިވެހީންގެ ދޮށިކަމާއި ދިވެހީންގެ އަސްލުވެހިކަމާއި ދިވެހި ދައުލަތުގެ އެވޭލާކަމާ އެކު، ހައިބަތާއި ހަރުދަނާކަން ކަމުގައި ވެސް ރައީސް މުއިއްޒު ވިދާޅުވި އެވެ.