ޣައްޒާއިން ކަރަންޓު ކަނޑާލުމުގެ ނަތީޖާ ވަރަށް ގޯސްވެދާނެ: އދ

އިޒްރޭލުން ސުންނާފަތިކޮށްފައިވާ، ފަލަސްތީނުގެ ޣައްޒާއިން ކަރަންޓު ކަނޑާލާފައި ވާތީ ވަރަށް ކަންބޮޑުވާ ކަމަށާއި މިހާރުވެސް ހަނގުރާމައިގެ ސަބަބުން ހާލުގައި ޖެހިފައިވާ އާންމުންގެ ހާލަތު އެކަމުގެ ސަބަބުން ވަރަށް ނުރައްކާވެދާނެ ކަމަށް އދ. އިން އިއްޔެ ބުނެފި އެވެ.

އިޒްރޭލުން ޣައްޒާއިން ކަރަންޓު ކަނޑާލާފައި ވަނީ އެ ސަރަހައްދަށް އެހީގެ ސާމާނު ވެއްދުން ވެސް ހުއްޓުވުމަށް ފަހުގަ އެވެ.

ހަމާސް އިން ރަހީނުކޮށްފައިވާ އިޒްރޭލު މީހުން މިނިވަންކުރުމަށް ޕްރެޝަރު ކުރުމަށް ކަމަށް ބުނެ އިޒްރޭލުން ޣައްޒާއަށް ކަރަންޓު ކަނޑާލުމުން މިހާރު ވަނީ ޣައްޒާގެ ފެން ޕްލާންޓަށް ކަރަންޓު ލިބެން އޮތް ހަމައެކަނި މަގު ބަންދުވެފަ އެވެ.

"އިންސާނީ އެހީ އާއި ދިރިއުޅުމަށް ބޭނުންވާ އެހެނިހެން ޒަރޫރީ ތަކެތީގެ އިތުރުން، ޖަނަރޭޓަރުތައް އޮޕަރޭޓް ކުރުމަށް ބޭނުންވާ ތެޔޮ އެތެރެވުން މިދިޔަ ހަފުތާގައި އިޒްރޭލުން މަނާކުރުމަށް ފަހު ޣައްޒާއިން ކަރަންޓު ކަނޑާލުމަކީ ވަރަށް ކަންބޮޑުވާ ކަމެއް،" އދ.ގެ އިންސާނީ ހައްގުތަކާ ބެހޭ އިދާރާގެ ތަރުޖަމާނު ސެއިފް މަގަންގޯ އޭއެފްޕީއަށް ފޮނުއްވި އީމެއިލްގައި ވިދާޅުވި އެވެ.

"ކަރަންޓު ނެތުމުން އަދި ތެޔޮ ލިބޭނެ މަގުތައް ބަންދުކުރުމުން، ޣައްޒާގެ ބާކީ ހުރި ފެން ޕްލާންޓްތަކާއި ސިއްހީ ހިދުމަތްދޭ ތަންތަނާއި ބޭކަރީތައް ބަންދުވުމުގެ ބިރު އެބައޮތް. އެކަމުގެ ސަބަބުން އާންމުންނަށް ނުރައްކާތެރި ހާލަތެއް ކުރިމަތިވެދާނެ."

މަގަންގޯ ވިދާޅުވީ އިޒްރޭލުގެ އިސްތިއުމާރުގެ ދަށުގައި ޣައްޒާ އޮންނައިރު އެތަނުގެ ރައްޔިތުންނަށް ބޭނުންވާ ތަކެތި ފޯރުކޮށްދިނުމަކީ އިޒްރޭލަށް އޮތް ގާނޫނީ ޒިންމާއެއް ކަމަށެވެ.

އޭނާ ވިދާޅުވީ ހަތިޔާރުއެޅި ޖަމާއަތަކަށް ޕްރެޝަރު ކުރުމަތިކުރުމުގެ ބޭނުމުގައި ކަމަށް ބުނެ އާންމު ރައްޔިތުންގެ ދިރިއުޅުމާއި އަސާސީ ކަންކަމަށް ދަތިކޮށް ޖުމްލަކޮށް އެންމެންނަށް އަދަބު ދިނުމަކީ ކަންބޮޑުވުން ވަރަށް ބޮޑަށް އޮތް މައްސަލައެއް ކަމަށެވެ.

އިޒްރޭލުން އޮކްޓޫބަރު 7، 2023 އިން ފެށިގެން ޣައްޒާއަށް ދެމުން ގެންދިޔަ ހަމަލާތައް މެދުކަނޑާލަން ހަމާސްއާ އެކު ހެދި އެއްބަސްވުމުގެ ފުރަތަމަ މަރުހަލާ މި މަހުގެ 1 ގައި ނިމި ދެ ވަނަ މަރުހަލާ ފެށުން ފަސްކުރަމުން ދާއިރު އެއްބަސްވުމާ ހިލާފަށް އެތައް ކަމެއް ދަނީ ކުރަމުންނެވެ. އެކަމަކު އަލުން މަޝްވާތައް ފެށުމަށް އދ.ގެ ޓީމެއް މިހާރު ވަނީ މިސްރަށް ގޮސްފަ އެވެ.