އާއްމުކޮށް ބޭނުންކުރާ ފައިދާ ހުރި ރަނގަޅު ކާނާ، ހެޔޮ އަގުގައި ބާޒާރުން ލިބޭނެ މަގު ފަހިކުރާނަން: ރައީސް

ރާއްޖޭގައި އާއްމުކޮށް ބޭނުންކުރާ ފައިދާ ހުރި ރަނގަޅު ކާނާ، ހެޔޮ އަގުގައި އަބަދު ވެސް ބާޒާރުން ލިބޭނެ މަގު ފަހިކުރަން ފިޔަވަޅުތައް އަޅަމުން އަންނަ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދުނިޔޭގެ ކާބޯތަކެތީގެ ދުވަހުގެ ތަހުނިޔާ ފޮނުއްވައި، ރައީސް ސޯޝަލް މީޑިއާގައި ކުރެއްވި ޕޯސްޓުގައި ވިދާޅުވީ ދުންފަތާއި ވޭޕްގެ ބާވަތްތަކާ އާއްމުން ދުރުހެލިކުރަން ސަރުކާރުން ފެށި މަސައްކަތުގެ ބޭނުމަކީ، ހަށިގަނޑަށް ގެއްލުން ލިބޭ ކެއިންބުއިމުގެ އާދަތަކުން ދުރުހެލިކުރުން ކަމަށެވެ. އެ ފިޔަވަޅަށް ފަހު، ރާއްޖޭގައި އާއްމުކޮށް ބޭނުންކުރާ ފައިދާ ހުރި ރަނގަޅު ކާނާ، ހެޔޮއަގުގައި އަބަދުވެސް ބާޒާރުން ލިބޭނެ މަގު ފަހިކުރަން މަސައްކަތްކުރަމުން އަންނަ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ބަލިތަކާ ދުރުހެލި އަދި ދުޅަހެޔޮ މުޖްތަމައެއް ހޯދުމާއި ދަރިންނަކީ ސިއްހަތު ރަނގަޅު ބަޔަކަށް ހެދުމުގައި އެންމެ އިސްކަން ދޭން ޖެހޭ އެއްކަމަކީ ކެއިންބުއިމުގައި ސިއްހީ ރަނގަޅު އާދަތައް ހިފެހެއްޓުމެވެ.

"ގައުމީ ފެންވަރުގައި މިކަންކަމަށް ރައްޔިތުން ހޭލުންތެރިކުރުމުގެ މަސައްކަތް ފުޅާ ދާއިރާއެއްގައި ސަރުކާރުން ކުރިއަށް ގެންދާނަން،" އެ މަނިކުފާނު ވިދާޅުވި އެވެ.

ދުޅަހެޔޮ ޖީލެއް ބިނާކުރުމުގެ މަގުސަދުގައި ރާއްޖެއަށް ވޭޕް އެތެރެކުރުން މިދިޔަ ނޮވެމްބަރު 15 އިން ފެށިގެން ވަނީ މަނާކޮށްފަ އެވެ. އަދި އެ ތަކެތި ބޭނުންކުރުން މިދިޔަ ޑިސެމްބަރު 15 އިން ފެށިގެން ވަނީ މަނާކޮށްފަ އެވެ.

ސިއްހަތަށް ފައިދާ ހުރި ކާބޯތަކެތީ ހެޔޮ އަގެއްގައި ލިބޭނެ އިންތިޒާމުތައް ހަމަޖައްސަމުން އަންނައިރު، މި ފަހުން ޑޮކްޓަރުންގެ ޖަމިއްޔާއިން ވެސް ވަނީ މޭވާ އާއި ތަރުކާރީ ފަދަ ބާވަތްތައް ވިއްކުމުގައި ލުއިތަކެއް ދިނުމަށް ގޮވާލައިފަ އެވެ.