އިންފަންޓީނޯ އަށް ރައީސް ދެއްވީ ފުޓްބޯޅަ ކުރިއަރުވާނެކަމުގެ ޔަގީންކަން

ރަސްމީ ދަތުރެއްގައި މިއަދު ހެނދުނު ރާއްޖެ ވަޑައިގެންނެވި ފީފާގެ ރައީސް ޖިއާނީ އިންފަންޓީނޯ، ރައީސް ޑރ. މުހައްމަދު މުއިއްޒުގެ އަރިހަށް މިއަދު މެންދުރުފަހު އިހުތިރާމުގެ ޒިޔާރަތެއް ކުރައްވައިފި އެވެ.

ރައީސް އޮފީހުގައި އޮތް މި ބައްދަލުކުރެއްވުމުގައި، އިންފަންޓީނޯއާ އެކު ރާއްޖެ ވަޑައިގެންނެވި ފީފާގެ ޖެނެރަލް ސެކްރެޓަރީ މަޓިއަސް ގްރަފްސްޓްރުމް އެހެން އިސްވެރިން ބައިވެރިވެވަޑައިގެންނެވި އެވެ. އަދި މިވަގުތު ޗުއްޓީއަކަށް ރާއްޖެ އައިސްހުރި، އިޓަލީ ގައުމީ ފުޓްބޯޅަ ޓީމުގެ ކުރީގެ ޑިފެންޑަރު މާކޯ މަޓެރާޒީ ވެސް ވަފުދުގައި ހިމެނުނެވެ.

މި ބައްދަލުކުރެއްވުމުގައި ރައީސް ވަނީ އިންފަންޓީނޯ އަށް މަރުހަބާ ވިދާޅުވެ، ވަގުތު ހުސްކުރައްވައިގެން ރާއްޖެ އަށް ދަތުރެއް ކުރެއްވީތީ އޭނާ އަށް ވަރަށް ބޮޑަށް ޝުކުރުއަދާކުރައްވައިފަ އެވެ.

ފުޓްބޯޅައަކީ ރާއްޖޭގެ އެންމެ މަގުބޫލު ކުޅިވަރަށްވެފައި، އަދި އެއީ ހުރިހާ ދިވެހީން އެއްބައިވަންތަކުރާ ކުޅިވަރުކަން ފާހަގަކޮށް، ރައީސް ވަނީ ރާއްޖޭގައި ފުޓްބޯޅަ ކުރިއެރުވުމަށް އެމަނިކުފާނުގެ ސަރުކާރުން ވަރަށް ބޮޑަށް މަސައްކަތްކުރަމުން އަންނަ ކަމުގެ ޔަގީންކަން އިންފަންޓީނޯ އަށް ދެއްވައިފަ އެވެ.

މީގެ އިތުރުން އެމަނިކުފާނު ވަނީ ރާއްޖޭގެ ހުރިހާ ހިސާބެއްގައި ކުޅިވަރު ވަސީލަތްތައް ގާއިމްކުރުމަށް މިއަހަރާއި، އަންނަ އަހަރު ރާވާފައިވާ މަސައްކަތްތަކުގެ ތަފްސީލް ދެއްވައިފަ އެވެ.

ރައީސް ވަނީ، ރާއްޖޭގައި ފުޓްބޯޅަ ކުރިއެރުވުމަށް އެފްއޭއެމް އާއި އެ އެސޯސިއޭޝަނުގެ ލީޑާޝިޕުން ކުރަމުން އަންނަ މަސައްކަތަށް ފުރިހަމަ އިތުބާރާއި، ސަޕޯޓް އޮތް ކަމަށް ވެސް ވިދާޅުވެފަ އެވެ.

ދުނިޔޭގެ ފުޓްބޯޅައިގެ އެންމެ މަތީ އިދާރާގެ ރައީސް އިންފަންޓީނޯ ވެސް ވަނީ ރާއްޖޭގައި ފުޓްބޯޅަ އިތުރަށް ދިރުވައި އާލާކުރުމަށް އެ އިދާރާ މަސައްކަތްކުރަމުން އަންނަކަމުގެ ޔަގީންކަން ރައީސަށް ދެއްވައިފަ އެވެ. އެފްއޭއެމްގެ ކުރިއެރުމަށް މަސައްކަތްކުރާނެ ކަމަށާއި، ދެ ފަރާތް ގުޅިގެން މަސައްކަތްކުރާނެ އިތުރު ދިމާތައް ހޯއްދަވާނެ ކަމަށް ވެސް އޭނާ ވިދާޅުވި އެވެ.

މި ބައްދަލުކުރެއްވުމުގައި ރައީސް ވަނީ، ގައުމީ ފުޓްބޯޅަ ޓީމުގެ ޖާޒީއެއް އިންފަންޓީނޯ އަށް ހަދިޔާކުރައްވައިފަ އެވެ. އަދި އިންފަންޓީނޯ ވަނީ އަންނަ އަހަރުގެ ފީފާ ވޯލްޑް ކަޕުގެ ރަސްމީ ބޯޅަ ރައީސަށް ހަދިޔާކުރައްވައިފަ އެވެ. މީގެ އިތުރުން އިންފަންޓީނޯ ވަނީ ރައީސް އޮފީހުގެ މެހެމާނުން ސޮއިކުރައްވާ ފޮތުގައި ސޮއިކުރައްވައިފަ އެވެ.

ފީފާގެ ރައީސަކު މީގެ ކުރިން ރާއްޖެ އަށް ވަޑައިގަތީ 2006 ގަ އެވެ. އޭރުގެ ރައީސް ސެޕް ބްލެޓާ ވަޑައިގަތީ ސުނާމީގައި ގެއްލުން ލިބުނު ގައުމުތަކަށް ކުރެއްވި ދަތުރެއްގެ ތެރެއިންނެވެ.